حب في ازقه نينوى

البارت (40)

#حب_في_ازقة_نينوى
بقلم #احمد
البارت_40
.
.
نرجس: بال 9 بالليل اتصل عليه وحصلو واني واكفة عندو اسمعو كال وينك معتز وماعرف شنو سمع فجاءة وكع منو التيلفون وطلع يركض واني طلعت روحي من الخوف
.
.
جان يريد ينزل كلتلو بربك فهمني اندار علي عيونو كلها دموع كال معتز مسوي حادث هو وجماعتو ونزل ركض من كال هيج حسيت الدنيا انكلبت فوك راسي
.
.
اخير شي اتذكرو من اجت اسماء علي وبعدها فقدت الوعي جواد نزل تحت شاف امو وخاف عليها كال لابوه رائد العامل واكف خارج يريدك ومن طلع كال لابوه وراحو عالمستشفى
.
.
اسماء من شافتني وكعت راحت صاحت للحجية مسحت وجهي بماي وجنت اردد اسم معتز واني مادري بنفسي والحجية عرفت اكو شي صاير اتصلت على جواد وشافت التيلفون واكع عندي ورجعت اتصلت عالحجي
.
.
الحجي: هلا حجية .. ويحاول ما يبينلها
الحجية: بدموع .. وين ابني حجي
الحجي: ماكو شي توكلي بالله
.
.
الحجية: اروحلك فدوة جيبلي ابني
الحجي: إن شاء الله بس اهدي خلي نشوف شصاير وياه وانطيج خبر لحد الان ما شفناه
.
.
سكرت منو صحيت اني من شفتها تبجي نزلت دموعي وما اعرف شسوي اخذتها اسماء ونزلتها لغرفتها شوية واتصل الحجي
.
.
كال معتز عايش بس بالمستشفى والحجية كالت دز جواد يجي ياخذني حاول يقنعها ما اقتنعت شوية واجو هو وجواد واني لبست ملابسي بسرعة وطلعت وياهم
.
.
الحجي: وين رايحة بنيتي الدنيا ليل
نرجس: والرب ما ابقى دقيقة وحدة بالبيت بابا
الحجي: بنيتي هو نايم شتروحين تسوين
.
.
نرجس: ما دخلني اريد اروح
الحجي: استغفر الله اخذهن جواد واني ابقى عند اسماء والطفل
.
.
نرجس: اخذنا جواد احس الطريق صار سنة الحجية تبجي وتدعي وهو ضايج وطالعة الدنيا من عينو اني حطيت راسي عالجام واتذكر سوالفو وحركاتو وذكرياتنا ويا بعض
.
.
من نزلنا لكينا اهل منتظر وزياد جايين ورحنا احنا على معتز جان بالعناية المركزة وممنوع عنو الزيارة وكفت بالباب اباوعلو وجهو ازرك ايديه ورجليه عليهن كدمات واثار زرك
.
.
حطيت ايدي على  حلكي وابجي ليش هيج يصير وياي ليش ما تكمل فرحتي بدون وعي دفعت الباب ودخلت حاولو يسحبوني الحجية وجواد وصراخي ملى الدنيا وتركوني وطلعو
.
.
تقريت عليه مسكت طارف اصابعو وكعدت عند السرير وابجي اجى الدكتور وحاول يطلعني هو وجواد كلتلهم وربي اذا طلعتوني انتحر وخطيتي بركبتكم ثنينكم
.
.
ومن شافوني حالتي ما تسمح تركوني فحصو الدكتور وكال لجواد منا لباجر اذا ما صحى يدخل بغيبوبة واتمنى ما تبقون عندو وراح وجواد تركني وطلع
.
.
بقيت كاعدة عندو وادعيلو واتذكر ايامنا ويا بعض جواد طلع خارج عند الحجية شوية واجى واحد من اهل زياد انطاه رسالة كال هاي لكيناها ويا غراض زياد وهي من معتز
.
.
معتز: من مشينا كل ما تمشي السيارة احس كلبي ينقبض اكثر واكثر اخير شي شفت دفتر صغير عند ابو السيارة استرخصت منو واخذتو وكتبت رسالة لاهلي وكلت لزياد اذا صارلي شي وصلها لاهلي
.
.
زياد: دنجب شنو هالحجي
معتز: زياد بربك بس اخذها
زياد: معتز شبيك تخبلت
.
.
معتز: اذا تعزني اخذها
زياد: دجيب نعلة على غيرتك
معتز: ههههههههه
.
.
جان محتوى الرسالة (( السلام عليكم يابة هاي الرسالة في حال صارلي شي نرجس وعبدالهادي امانة بركبتكم انت وجواد ديرو بالكم عليهم واعرف انتو ما تقصرون بس لا تحسسونهم بفقداني .. معتز))
.
.
انطيتها لزياد واخذها بانزعاج وحطها بجيبو دا نمشي والسايق جان يريد يتجاوز سيارة شلون صار قريب عليه ابو السيارة الكدام بدون ما ينطي اشارة صار كدامنا
.
.
ولان حركتو صارت مفاجئة السايق حاول يخفف السرعة وسيارة ورانا دعمتنا وانكلبت السيارة والناس الي موجودين بالطريق طلعونا من السيارة ونقلونا لبغداد لان جنا قريبين عليها
.
.
اني لان من كدام صار عندي كسر بالرجل والايد اليمين والكزاز من تكسر جرح وجهي وعندي كسر بالضلع الخامس الايمن وكدمات على كل جسمي وارتجاج بالمخ
.
.
وزياد كسر بالحوض والرجل اليمين ومنتظر رجلو اليسار مكسورة وكتفو اليسار مخلوع وصاير عندو تمزق بعضلة الكتف وجان ويانا جندي ما نعرفو بس لان من بغداد اتفق يجي ويانا ووافقنا
.
.
والمسكين من اول جية انكسر عندو الحوض وايدو اليسار وانحراف بالعمود الفقري والسايق من كلبت السيارة انضرب راسو بقوة بالستيرن وبسبب الضربة صار عندو نزيف داخلي بالدماغ وتوفى قبل ما يوصلون المستشفى
.
.
نرجس: معتز فدوة كوم ما اكدر اعيش بدونك والرب بعد لا ابعد عنك ولا اتجاهلك بس كوم فدوة بعدني محتاجتك وعبدالهادي محتاجك
.
.
كوم بعد ما اكلو هدهد ولا ازعجك بس ارجعلي اعرف انو ازعجتك واذيتك هواي واعرف العيشة وياي صعبة بس صدكني ماكدر اعيش بدونك
.
.
حطيت راسي على السرير واحس الشهكة تسحب روحي وياها بحيث حنى حلكي كام يوجعني بقيت الليل كلو كاعدة يمو مرة احجي وياه مرة اعاتبو مرة ابجي مرة ابقى ساكتة
.
.
وكل دقيقة احسها سنة وانتظر يجي ثاني يوم علمود يكعد جان نايم ومغمض عينو وما يتحرك ابد جنت اتمنى يحرك ايدو لو اصابعو بس شوية اتطمن عليه وماكو الصبح اجى الدكتور باوعلي وعيونو بيها حزن على وضعي جيك وضعو
.
.
جواد: ها دكتور بشر إن شاء الله اكو تحسن
الدكتور: بعد مثل ما هو بس إن شاء الله يكعد اليوم 
جواد: إن شاء الله
.
.
الدكتور: بس يبقى احتمال انو يفوت بغيبوبة احتمال وارد
جواد: زين دكتور الغيبوبة اذا صارت لا قدر الله شكد تكون مدتها وبيها تأثير على ذاكرتو لو لا
.
.
الدكتور: لا ما بيها تأثير على ذاكرتو ومدتها مو معلومة احتمال يوم واحتمال سنة واحتمال اكثر
جواد: ليش سنة او اكثر
.
.
الدكتور: لان صاير عندو ارتجاج بالمخ بسبب الحادث وهالشي يخلي الدماغ بحالة خمول وما يكعد الا الدماغ يتأكد انو يكدر يعيش طبيعي وما يتأثر
.
.
جواد: مشكور دكتور
الدكتور: العفو وعندو العافية
جواد: الله يعافيك .. نرجوسة
.
.
نرجس: ها جواد
جواد: خليني اخذج عالبيت ترتاحين وبعدها ترجعين
نرجس: لا ما اروح
.
.
جواد: ارجعج وعد بس ارتاحي شوية
نرجس: ما اتحرك منا بدون معتز
جواد: معتز حتى اذا كعد ما يكدر يطلع لان متأذي
.
.
نرجس: فدوة عوفني جواد ما اروح
جواد: براحتج
.
.
نرجس: طلع والي عرفتو ان الحجية مرتفع ضغطها وحاطيلها مغذي وبعدها موديها جواد للبيت ومن الدكتور جيك وضع معتز وطلع جواد راح للبيت واجو الحجي واسماء
.
.
بس لان عناية مركزة مو مسموح يدخلون واني لو ما حلفت انتحر جان هم طلعوني بس من حركة كلبي حتى ما فكرت بحالة معتز
.
.
كل الي فكرت بيه انو ابقى يمو واكون اول شخص يتطمن عليه الحجي جابلي عصير وكيك وياه وما اكلت وكالي اكلي علمود تبقين عند معتز وما تدوخين ويطلعوج
.
.
ومن كال يطلعوج فورا اقتنعت فتحت الكيك واكلت ولان مو متعشية البارحة وبقيت سهرانة جنت جوعانة واكلت هواي من الكيك بدون ما احس بنفسي
.
.
الظهر راحو الحجي واسماء ورجع جواد واني بمكاني مرات من يتعب جسمي كلش امشي شوية بالغرفة او احرك نفسي وارجع اكعد عند ايدو واباوعلو عيوني انتفخن وصارن حمر من السهر والبجي
.
.
اجى الدكتور مرة ثانية جيك وضعو وطلع والخوف بدا يزيد لان ماكعد والوقت يمشي والدكتور رايح راجع على معتز وهو نايم وكل ما يجي الدكتور يزيد خوفي
.
.
وصلت لدرجة من يطلع احرك ايدو المس وجهو علمود يكعد وهو بس نفس لا حركة ولا صوت الدنيا صارت مغرب والدكتور اجى وبقى بالغرفة
.
.
اني احس التعب اخذ من عمري عمر بحيث حتى ماكدر اتحرك بس الامل بكعدة معتز ينطيني طاقة علمود اتحمل صار وقت اذان العشاء
.
.
انداريت شفت جواد والحجي واسد وابوه واكفين عند الباب اجت عيني بعين الحجي ونزلت دموعي وكمت ابجي بس بدون صوت وهو نزلت دموعو وياي وبعدها دخل عالغرفة
.
.
الحجي: ها دكتور ترا ما بقى بي صبر بعد
الدكتور: للاسف حجي المريض دخل بغيبوبة
الحجي: زين ايمتى يكعد
.
.
الدكتور: ماعرف ماكو مدة محددة
الحجي: يعني مانكدر نسوي شي
الدكتور: للاسف واني استرخص والله يعينكم
.
.
نرجس: من كال هيج احس انضربت ضربة قوية على راسي وبدت الدنيا تسود بوجهي اجى الحجي يريد ياخذني وما قبلت اخير شي اجى جواد ورفعني غصب عني وسحبني
.
.
كلتلو .. جواد فدوة عوفني لا تبعدني عنو فدوة معتز ما يعوفني حتى بالموصل ما تخلى عني مستحيل هسا يتخلني الله يخليك عوفنييييي
.
.
جواد: نرجس اهدي الله يخليج
نرجس: عوفني لا تبعدوني عنو مستحيل اعيش بدونو خلوه نايم بس المهم اكون قريبة عليه وما ابتعد عنو بابا الرب يخليك كولو يعوفني ارجع الرب يخليك بابا
.
.
جنت احجي ومنفعلة كلش وجواد لان اقوى مني ماكدرت افلت منو والحجي صاير كدامي ويسحبني ويا جواد ويبجي واسد وابوه جانو واكفين خارج الغرفة اخير شي فقدت الوعي
.
.
بسبب التعب والانهيار الي صار عندي ما كعدت للصبح من كعدت لكيت جواد عندي كمت مثل المخبلة اريد اروح لمعتز ومسكني جواد كلتلو فدوة عوفني
.
.
جواد: نرجس الله يخليج لا تسوين هيج
نرجس: نار وشاعلة بكلبي جواد افهمني
جواد: اعرف يا عيني اعرف بس تحملي
.
.
نرجس: شلون اتحمل ومعتز بين الحياة والموت
جواد: لا الحمدلله وضعو احسن صحيح دخل بغيبوبة بس وضعو الصحي احسن وطلعوه من العناية المركزة
.
.
نرجس: زين خليني اشوفو
جواد: بشرط
نرجس: شنو الشرط
.
.
جواد: تروحين للبيت ترتاحين وبعدها اني بنفسي اجيبج واتركج عند معتز موافقة لو لا
نرجس: اني اريد ابقى عندو ما ارجع
.
.
جواد: اذا ما توافقين ما اخذج
نرجس: بيأس موافقة يلا خلينا نروحلو
جواد: يلا امشي
.
.
نرجس: اخذني ورحنا لغرفة دخلنا داخلها جان معتز موجود بيها وبعدو نايم تقدمت عندو ونزلت دموعي واحس احلامي كلهن تحطمن
.
.
معقولة اني وجهي نحس عليه بحيث بداية زواجنا الي ما تم لحد الان صار بيه هيج زين عبدالهادي شنو ذنبو يفقد ابو هم
.
.
جواد واكف ودموعو تجري على اخوه الي بغيبوبة وعلى وضعي لان حاسبني مثل اختو مسكت ايد معتز واني احس الكلام يطلع من جوة كلبي
.
.
كلتلو وعد علي ووعد الحر دين راح ابقى منتظرتك ومتمسكة بيك لاخر يوم بحياتي وراح ابقى وياك وما ابتعد عنك ابد بس هسا لازم انفذ اتفاقي ويا جواد وراح ارجعلك باقرب وقت
.
.
سمعت صوت الباب من طلع جواد بست معتز من كصتو وطلعت رجعت ويا جواد للبيت ما اهتميت لاحد فورا من الباب لغرفتي
.
.
شوية واجى عبدالهادي كال ماما انداريت شفتو بالغرفة ماعرف منو جابو وراح اخذتو ومددتو بحظني ودموعي تنزل بس لان راسي مرتفع ما يشوف دموعي
.
.
بقيت متمددة لحد ما نمت كعدت الساعة 4 العصر وعبدالهادي مو موجود ماعرف منو اخذو كمت غسلت ونزلت تحت
.
.
تلاكيت ويا ام اسد كدام المطبخ سلمت عليها ودخلت للمطبخ سلمت على بسمة ونسمة وطلعت جان جواد كاعد بالصالة كلتلو يلا جواد اخذني
.
.
الحجي: وين رايحة بنيتي
نرجس: لمعتز
الحجي: بنيتي معتز بغيبوبة شتسوين رايحة
.
.
نرجس: ما دخلني اريد اروحلو
جواد: تمام بس روحي اكلي شي علمود ما تتخربطين مرة ثانية وارجعج من هناك مثل الصبح
.
.
نرجس: رجعت للمطبخ حطيتلي اكل واكلت وبسبب وجود بسمة ونسمة التهيت واكلت لحد ما شبعت وهم فكرت بيني وبين نفسي وكلت اكل احسن لان اذا ما اكل جسمي ما ينحمل واتخربط بس اذا اكل اكدر ابقى عندو
.
.
لهذا مرة ثانية اكل علمود معتز مو علمودي خلصت اكل وكلت لجواد وحاولو يقنعوني ابقى ما اقتنعت جنت واكفة واجى عبدالهادي كال ماما ومسكني من رجلي واحتاريت شلون اطلع واعوفو بعدين شلتو واخذتو وياي ورحنا
.
.
من وصلنا دخلنا عندو نزلت عبدالهادي ولان صغير ما يشوف وجه ابوه وماكدر ارفعو لان وجه معتز مضمد وعليه زراك واذا شافو عبدالهادي اكيد يخاف ويبجي
.
.
بقيت كاعدة عندو وعبدالهادي بحظني جواد طلع خارج وماعرف شصار عندو بقيت كاعدة وافكر بمعنز واتذكر ايامنا الي راحت مع بعض
.
.
عبدالهادي يفتر بالغرفة وكل شوية يجي ويضحكلي واني ابتسملو علمود لا يضوج خطية هو ما دخلو واقهرو وياي
.
.
المغرب اجى الحجي دزيت عبدالهادي وياه واني بقيت حاول يقنعني وما رحت وهو كعد شوية عند معتز وبعدها راح واني طلعت فتريت شوية بالممر
.
.
وبعدها رجعت عالغرفة وبقيت كاعدة اسولف وياه عن ايام قبل من جان يلحكني واسولفلو شكد جنت مزعوجة منو واتمنى يتركني ويروح
.
.
واسولفلو عن هند من جانت تنصحني واسولفلو على كتلة امي وخالي عيسى جنت مثل المخبلة من احجي مرة ابتسم ومرة ازعل ومرة اضحك ومرة اضوج واني اسولفلو عن الماضي الي عشتو اول ما تعرفت عليه
.
.
وفعلا الدنيا دوارة تحولت من وحدة عايشة بعيد عنو وتريد تخلص منو الي انسانة عايشة وياه وتريد رجعتو باقرب وقت ممكن بقيت وياه لحد الساعة 10 بالليل واجى جواد اخذني
.
.
........... يتبع
تعليق حلو مثلكم ❤
حطولنا ارائكم وتوقعاتكم ❤
م/ اعذروني البارت ناقص 200 كلمة لان انشغلت وتأخرت بيه باجر إن شاء الله اعوضكم