حب في ازقه نينوى

البارت(17)حب_في_ازقه_نينوى الكاتب #احمد

#حب_في_ازقة_نينوى
بقلم #احمد
البارت_17
.
.
معتز: دموعها تجري ومو لابسة حجاب لاول مرة بعد ما اجت لبغداد ومبين عليها كلش خايفة ووجها اصفر حجت وحجيها متقطع كوة كالت ماما ووكعت واحس روحي وكعت وياها
.
.
ركضتلها وكلت لجواد بسرعة روح شوف امها شبيها شلتها بين اديني مثل الطفلة راحت اسماء جابتلي كلاص ماي حطيتها عالقنفة ومسحت وجها كامت تحجي بس حجيها مو واضح وفززني صوت جواد وراي
.
.
كمت ويا جواد ركض وكلتلهم ديرو بالكم عليها رحنا لكينا ام نرجس واكعة بالكاع شلتها وركضنا بيها للسيارة حطيتها بالسيارة واخذناها للمستشفى
.
.
هي ضعيفة ومبين عليها مريضة وصايرة اضعف من وصلنا المستشفى راح جواد ركض علمود يجيب سدية واني شلتا وركضت بيها ومن جاب السدية جواد حطيتها عليها
.
.
تجمعو عليها الدكاترة واخذوها للغرفة واني وجواد بقينا ننتظر واجاني اتصال من ابوي
.
.
الوالد: ها ابني شصاير وياها وليش طلعتو بدون ما تفهمونا شي
معتز: والله يابة ماعرف لكيناها واكعة بالكاع واخذناها للمستشفى ودا ننتظر الدكتور .. نرجس شلونها
.
.
الوالد: وجها اصفر الضاهر خايفة من الموقف
معتز: كعدت لو بعد
الوالد: لا بعد بس مابيها شي لا تاكل هم
معتز: تمام
.
.
سكرت منو بقينا ننتظر لحد ما طلع الدكتور كال لازم نسويلها فحوصات لان مانعرف شصاير بيها وهي فاقدة ماتكدر تحددلنا مكان الالم فالفحص احسن شي وراح
.
.
نرجس: احس اكو اصوات عندي بس عيوني ماكدر افتحهن فجأءة  اجت امي على بالي وهي واكعة كمزت كمزة الا فززتهم
.
.
الوالدة: بسم الله اهدي بنيتي ماكو شي إن شاء الله
نرجس: وينها ماما
الوالدة: اخذوها معتز وجواد للمستشفى هسا نخابرهم ونتطمن عليها
.
.
نرجس: عمو فدوة اخذني الها
الوالد: ارتاحي بالاول بنيتي إن شاء الله ماكو شي
.
.
نرجس: عمو اروحلك فدوة اخذني الها مالها احد غيري ومالي غيرها خليني اكون وياها
الوالد: روحي لعد البسي حجابج وعبايتج وتعاي
.
.
نرجس: كمت ركض لبست الجبة والحجاب ورجعت لكيتو ينتظرني بالسيارة ركبت وياه واتصل على معتز
.
.
معتز: هلا يابة
الوالد: شصار وياكم
معتز: ننتظر التحاليل
.
.
الوالد: بيا مستشفى انتو
معتز: ليش
الوالد: جبت نرجس وياي تريد تبقى عند امها
.
.
معتز: ليش ما تركتها ترتاح يابة
الوالد: اولا هاي امها مو غريبة ثانيا خلي تجي عدها علمود اذا تحتاج شي تكون وياها مرة تساعدها
.
.
معتز: رغم الموقف الي احنا بيه بس من كال هيج ابوي ابتسمت لا ارادي وكلت بكلبي ما لكيت الا نرجس هي شافتها واكعة اغمى عليها من الخوف انطيتو العنوان وسكرت منو وكلت لجواد يروح بالبيت لان ما بقى بس النسوان
.
.
نرجس: يمشي ابو معتز واحس الطريق صار سنة اول ما وصلنا شفنا جواد سألناه وكاللنا على الطابق ورقم الغرفة ودخلنا بسرعة من وصلت جان معتز موجود كاعد على الكرسي وينتظر
.
.
الوالد: ها معتز ما طلعت نتائج  التحاليل
معتز: لا والله يابة بعد .. انتي ليش جيتي نرجوسة لو باقية مرتاحة وباجر تجين
.
.
نرجس: مستحيل اعوف ماما لحالها
معتز: على راحتج لعد
.
.
دا نحجي وشفت الدكتور اجى كمت تقدمت عليه وكلتلو بصوت ناصي البنية هاي بنت المريضة واذا اكو شي ياريت ما تحجي كدامها لان حساسة كلش فكالي تعال وياي للغرفة
.
.
نرجس: خلي اجي وياكم
معتز: ما يحتاج عيوني مجرد يفحصها ونطلع
نرجس: ماشي
.
.
معتز: دخلنا داخل جانت امها بعدها نايمة والدكتور مبين على وجهو القلق ويريد يحجي بس ما يعرف شلون يفتح الموضوع كلتلو احجي قلقتني
.
.
الدكتور: المريضة عدها سرطان بالامعاء
معتز: شنووووو
الدكتور: ولازم فورا تبدا بالعلاج الكيمياوي
.
.
معتز: واكو امل او لا دكتور
الدكتور: بصراحة المرض متفاقم ولو جايتنا قبل بوقت جان احسن وماعرف انتو ليش صبرتو هالكد عليها
.
.
معتز: يا صبرنا دكتور جانت مابيها شي فجأءة وكعت
الدكتور: مستحيل لان بسبب المرض صاير عدها سوء بالتغذية
معتز: هي عايشة بملحق بظهر بيتنا واحنا متكفلين بيها هي وبنتها بس ما سمعنا بيها شي
.
.
الدكتور: ماعرف بس اعراض المرض مبينة ومحد جايبها للمستشفى
.
.
معتز: طيب دكتور سوي الي تكدر عليه بس ياريت تكول التهاب بالامعاء لان هاي البنية يتيمة اب ومالها غير امها بالدنيا وما اريدها تنفجع بلكي ربي يرحمها ويخلي امها عايشة
.
.
الدكتور: إن شاء الله
معتز: مشكور
.
.
طلعت من عندو كلت لنرجس وابوي التهاب بالامعاء اعرف نرجس من حقها تعرف شبيها امها بس بنفس الوقت شلون اكللها امج بيها سرطان واحتمال باي لحضة تموت
.
.
هي بس شافتها واكعة صار بيها هيج اذا لا قدر الله وماتت تموت وراها من الصدمة بقيت ادعي الله تكوم بالسلامة وترجع لنرجس
.
.
بقينا للفجر كعدت ام نرجس اجى الدكتور دخلنا اني وياه عليها بلغها بمرضها وخطية دموعها غركن المخدة من خوفها على نرجس
.
.
الاء: معتز اذا صارلي شي نرجس امانة بركبتك ليوم الدين لا تزعلها ولا تجبرها على شي ابد
معتز: توكلي بالله إن شاء الله ترجعيلها بخير وسلامة
.
.
الاء: اني اعرف انو الرب قادر على كلشي بس هذا المرض مالو علاج
معتز: كوني قوية لخاطر بنتج ولا تستسلمين فترة وتعدي إن شاء الله
الاء: اوعدني تصون الامانة
.
.
معتز: ما تحملت الموقف لان جان كلش صعب اخذت ايدها بين اديني ونزلن دموعي عليها كلتلها .. اقسملج بالله الي ماكو افضل منو اكون سند لنرجس طول عمري وما اخليها تحتاج مخلوق ثاني وإن شاء الله تكومين بخير وسلامة وتشوفين هالشي بعيونج
.
.
الدكتور: اخوي لازم انطيها ابرة الكمياوي وبعدها تكدرون تاخذونها للبيت
معتز: تمام
.
.
طلعت من عندو ضربها الابرة وبعدها اخذناها حاولت اقنعهن يجن ويانا بالبيت ورفضن من وصلنا سندت ام نرجس ودخلتها لغرفتها ورجعت لاسماء كلتلها تبقين وياهن لحد ما اني اكولج لان نرجس لحالها وما تعرف شنو تسوي
.
.
نرجس: رجعنا للبيت امي تمددت بفراشها بس تون ومبين عليها الوجع واني خايفة عليها ماعرف شسوي اجت اسماء عندي تواسيني وتهدي بي بس منظر ماما وصوت ونينها احسو يذبحني ذبح
.
.
اخير شي صار صوتها عالي ودموعها تجري من الوجع واني تخبلت ماعرف شسوي ماسكة ايدها وابجي راحت اسماء ركض على معتز شوية واجى
.
.
كال .. الدكتور انطاها علاج قوي ولازم تتحمل الوجع بقى ويانا لحد ما طلعت الشمس شوية خف الوجع على ماما ونامت اني اخر شي اتذكرو من نامت ماما بعدها ماعرف شصار
.
.
معتز: منظرهن وهن يبجن على بعض حتى اليهودي ما يتحملو بقيت وياهن لحد ما طلعت الشمس ام نرجس نامت بفراشها ونرجس نامت وهي ماسكة ايد امها
.
.
حطيتها بفراشها وغطيتها ورجعت للبيت لكيت زينب نايمة بدلت ملابسي ونمت كعدت الظهر مقفل بس بالي عند نرجس وامها بدلت ملابسي عالسريع وطلعت
.
.
رحت الهن لكيتهن كاعدات ونرجس دا توكل امها شوربة لان خفيفة عالمعدة تطمنت عليهن ووجود اسماء وياهن يخليني اطمأن اكثر
.
.
رجعت للبيت وجان ببالي اعاتب نرجس لان ما كالتلنا امها مريضة بس تراجعت لان اذا سويت هيج وصار على امها شي لا قدر الله راح يبقى ضميرها يعذبها وتحس هي السبب بموت امها وما ترتاح بحياتها كلها لهذا سكتت
.
.
اول ما رجعت طلبت اكل من زينب ورحت غسلت وجهي وصليت بين ما كمل الاكل جابتو ونزلتو عندي بانزعاج وراحت واني مالي خلك اتناقش وياها
.
.
نرجس كعدت قبل الظهر لكيت نفسي بفراشي وامي نايمة كمت بتكاسل لان مو شبعانة  نوم شفت نعال عند باب الغرفة الثانية فتحتو لكيت اسماء نايمة بيها
.
.
جان يوم خميس كلت همزين عندي عطلة يومين اكدر اهتم بامي بيهن رحت سويت شوربة تمن لان الدكتور وصانا عليها خفيفة وما تأثر على التهاب الامعاء
.
.
وبين كل شوية اروح اشوف امي كعدت لو لا من خلصت خليتها على صفحة وسويت مقالي الي ولاسماء من كعدت ماما حطيتلها شوربة ورحت اوكلها
.
.
اجى علينا معتز تطمن علينا وراح امي مبين من عيونها عدها حجي هواي بس ما حبيت اسألها واضغط عليها كلت الا ما يجي يوم وهي تحجيلي
.
.
من خلصت جبت كلينس حطيت عليه شوية ماي ومسحت حلكها وانطيتها علاجها وخليتها ترجع تنام ورحت كعدت اسماء علمود تصلي وتتغدا
.
.
من تغدينا رجعنا نمنا ثنينا لان تعبنا كلش بالليل العصر كعدت نظفت البيت واجن علينا ام معتز وزينب يتطمنن على امي كعدن وياها واني سويتلهن جاي ووديتو الهن
.
.
كعدن وياها شوية وبعدها رجعن للبيت اسماء سوت العشى واني خليتها تخابر جواد يجيبلنا كلينس مرطب لان احتاجو
.
.
جابو النا ابو معتز ومن الباب سأل عن ماما وتطمن عليها وراح من خلصنا عشى اسماء راحت تدرس بغرفتها واني بقيت عند امي ادرس علمود من تحتاج شي اكون اني يمها
.
.
الاء: نرجوسة
نرجس: نعم ماما
الاء: اذا اوصيج على شي تنفذين وصيتي
.
.
نرجس: ماما ليش تحجين هيج وكانو تريدين تتركيني لحالي
الاء: لا هاي وصيتي اذا بقيت عايشة واذا متت وما اريد شي ثاني بس المهم تنفذيها
نرجس: شنو هي ماما
.
.
الاء: مهما يصير وياج ومهما كانت ضروفج صعبة ما اريدج تهملين دراستج ابد دراستج هي سلاحج بهالدنيا واذا نجحتي وتوضفتي راح تكدرين تعيشين احسن عيشة
.
.
بس اذا ما نجحتي تبقين عايشة حياتج بنقص صحيح معتز واهلو مو مقصرين ويانا وفضلهم ما ننساه بس ما راح يكون مثل من تتوضفين وتصرفين على نفسج من راتبج وتعبج
.
.
نرجس: اوعدج ماما الا اخليج تفتخرين بي
الاء: العذراء تحفظج الي
نرجس: وتحفظج الي
.
.
بقيت ادرس يمها وهي تشجعني ونحسسني باهتمامها وباهمية دراستي من نامت اني هم نعست سكرت كتبي ونمت واسماء ما شفتها واكيد من خلصت دراسة نامت
.
.
معتز تغديت وخلصت رجعت لغرفتي اريد انام ولحكتني زينب وشدو روسكم يا كرعان بدت رحمة الله
.
.
زينب: معتز شعدك البارحة شايلها بحضنك مو كلت تركتها
معتز: وشبيها
زينب: شنو شبيها ترا انت زوجي مو زوجها شكو تشيلها وفوكها كدامي
.
.
معتز: تمام المرة الثانية اتركها مشمورة بالكاع واوكف مثل الحيوان اتابع مو
زينب: حشاك بس ما يصير تشيلها هيج
معتز: لعد شسوي
.
.
زينب: خلي جواد يشيلها مو هو اخوك وتعتبرو اخوها
معتز: زينب انتي شفتي الوضع الي جنا بيه وهذا تحقيقج ما منو فايدة شي صار وانتهى
.
.
زينب: اذا هيج تكرهني ليش وافقت تتزوجني ومو كلت اذا تصيرين زينة ما اتزوج عليج وهاي اني من اول يوم تزوجنا بيه دا احاول دائما اكون زينة واهتم بيك انت واهلك ونرجس وامها ما وصلتلهن ابد شتريد اسويلك بعد اكثر
.
.
معتز: اولا تعرفين السبب الي خلاني اوافق ثانيا اني ما نكرت انج متغيرة بالعكس تغيرج هذا كلش حبيتو بس انتي دا تحاسبيني على شي صار خارج عن ارادتي
.
.
من شفتها بالكاع ما تحملت اشوفها هيج حتى لو ما احبها يكفي انها انسانة وواجبي انو اساعدها يا زينب هاي يتيمة واني اريد اكسب بيها اجر عند ربي بتعاملي وياها وانتي اذا سويتي نفس الشي رب العالمين مستحيل ينسى هالشي واني مجرد شلتها من الكاع للقنفة
.
.
زينب: خوش
معتز: عندج بعد شي لو انام
زينب: لا نام وارتاح
.
.
معتز: نمت وبصراحة وياها حق بس مو بايدي كلبي ما تحمل اشوفها هيج واكعة اني بس شفتها خايفة طار عقلي انوب توكع بالكاع كعدت المغرب تعشيت وطلعت رحت لمكان دوامنا اني والشباب جان واجب منتظر ودخلت عند زياد وكعدنا نحجي
.
.
زياد: شبيك يالحبيب ضايج
معتز: صار وياي مصيبة مو حاسب حسابها
زياد: يا ساتر احجي
.
.
معتز: ام نرجس بيها سرطان
زياد: شنوووووو
معتز: قسم بالله يخوي احس جبل ونزل على راسي
.
.
زياد: ونرجس شنو وضعها
معتز: زلمة اليكدر يحجيلها هي شافتها وكعت بالكاع وكعت وياها انوب تسمع بيها سرطان تموت بمكانها فكلتلها التهاب بالامعاء
.
.
زياد: وشنو كال الدكتور
معتز: كل اسبوع عدها ابرة كيمياوي لازم تاخذها
زياد: والله يخوي صدمتني بهالحجي
.
.
معتز: من جهة خايف احجي لنرجس ومن جهة اكول اذا عرفت بعدين راح تزعل
زياد: يمعود شتحجيلها غير تتخبل بلكي يفيدها الكيمياوي وتتعالج
.
.
معتز: واني هاي امنيتي
زياد: توكل بالله وهي تهون
معتز: شلون الدوام
زياد: الحمدلله اهم شي ما نسمع ركع الهاونات
.
.
معتز: حجينا شوية وحجيتلو عن موقف نرجس من وكعت وعن كلام زينب وكال معذورين ثنينكم انت تحبها وما تحملت وهي تحبك وغارت عليك
.
.
طلعت من عندو رجعت للبيت لكيت اهلي كاعدين يتعللون كعدت وياهم بس محد بيهم يعرف بمرض ام نرجس بس اني وهي
.
.
نرجس: كعدت ثاني يوم مر اليوم بروتين طبيعي المغرب سوينا كبة اني واسماء علمود من نرجع من المدرسة بس نحميها وناكلها ووجود اسماء وياي كلش فادني حسيتها اختي ودا تساعدني
.
.
ثاني يوم الصبح كعدت ماما قبل ما اروح للدوام ريكتها وانطيتها علاجها وخليتها ترجع تنام وام معتز جابت قرانها واجت هم تبقى عند امي وهم تقرا قران وكلش ارتاحيت لانها راح تبقى عند امي
.
.
بقينا على هاي الحالة يوميا الصبح اريك ماما وترجع تنام ومن نريد نطلع للدوام اني واسماء تجي ام معتز تبقى عند امي ومن نرجع تروح هي
.
.
واني اول ما ارجع اغدي ماما ونروح نتغدا اني واسماء ومرات نتغدا ويا ماما ونتساعد بتنظيف البيت والمواعين نخلص العصر ونبلش دراسة لوقت العشى نتعشى ونرجع ندرس لحد ما ننام
.
.
معتز وجواد وابوهم يوميا يسألون عن ماما ويتطمنون عليها بعدها باسبوع صادف يوم اربعاء ولازم ماما تضرب ابرة التهاب بالمستشفى
.
.
معتز كال من تروحين للمدرسة اخذها اضربها ابرة وارجعها ونبقى وياها لحد ما ترجعين من المدرسة حاولت اقنعو من ارجع او اغيب عن المدرسة ورفضو هو وامي وانجبرت اوافق
.
.
رحت داومت وبالي مشغول على ماما ماعرف شلون خلصت الدوام ورجعت بسرعة
.
.
معتز: اجى وقت الابرة الثانية من العلاج الكيمياوي وجان لازم اخذ ام نرجس للمستشفى واستغليت دوام نرجس كفرصة علمود ما تجي وتكتشف مرضها
.
.
من داومت بال ٩ تقريبا اخذتها للمستشفى اجى الدكتور كال هاي الابرة راح يكون المها جدا قوي وراح تحس بحرقة بالجسم كلو وراح ترتفع درجة حرارتها بس ماكو طريقة ثانية
.
.
خطية هي من سمعت عيونها غوركن من الخوف واني الرجال خفت شلون هي المرة وهي شافت الويل من الاولى الله يعينها عالثانية
.
.
بقيت ادعي لربي يساعدها ويكون بعونها ويخفف وجعها والدكتور كال استغل الفرصة انو اول ما اضربها تاخذها للبيت علمود من يمشي مفعول الابرة تكون هي بالبيت احسن ما تبقى هنا
.
.
جهز الابرة وضربها الساعة جانت ١١ تقريبا اول ما خلصت اخذتها للبيت واني ادعيلها وهي تبجي من الخوف لان كلام الدكتور جان رعب بكل معنى الكلمة
.
.
وصلنا وبدا المفعول وياريتني مو موجود واشوفها هيج تريد تكطع نفسها من الوجع والحرقة الي بجسمها حاطة وصلة بين سنونها عاضة عليها وتصرخ بكل صوتها واني انخبصت وخايف من ردة فعل نرجس من تجي وتشوفها هيج
.
.
نرجس: من خلص الدوام رجعنا اني واسماء واني امشي بسرعة بس اريد اوصل اول ما دخلت باب الملحق اجى صوت صراخها باذني احس رجليني صارت خيوط ووجهي انخطف لونو
.
.
زتيت الجنطة بالباب وركضتلها اول ما دخلت جانت متمددة بالفراش وما انتبهت لوجود معتز وامو كعدت عند السرير اخذت ايدها بايدي وابوسها وابجي واحجي وياها كلتلها
.
.
ماما ابوس ايدج شبيج شنو سوالج الدكتور عفتج مابيج شي يا روح نرجس والرب اموت اذا يصيرلج شي هو اني بس انتي باقية الي بهالدنيا
.
.
انداريت شفت معتز واكف كمت وتخبلت عليه اضربو واكلو كلو بسببك انت اخذتها واذيتها جنت احجي بدون وعي من خوفي عليها هو مسك ايديني ودموعو تنزل على وضعي
.
.
معتز: اهدي يا روحي هو العلاج هيج
نرجس: كلو منك مو كلتلك خلي اجي وياكم
معتز: يعني شتسوين قابل تاخذين من الوجع من تجين ويانا
.
.
نرجس: عفتو ورجعت مسكت ايدي امي وابجي وكل ما تصرخ احس كلبي ينمرد وروحي تصرخ وياها بكل صرخة
.
.
الاء: نار وشاعلة بي دخيلكم مو كادرة اتحمل جسمي مشتعل بيه نار سوو اي شي اذبحوني بس خلصوني من هالعذاب ما اريد اعيش بس خلصوني من هالوجع
.
.
نرجس: ماما فدوة لا تحجين هيج هسا تطيبين وترجعين زينة بس تحملي يا روحي انتي اني منو الي بعدج شلون تعوفيني وتروحين
.
.
الاء: مو كادرة اتحمل فدوة خلصوني من هالعذاب
.
.
معتز: واكف مثل الصنم وماعرف شسوي لا اكدر امنع نرجس ولا اكدر اخفف وجع امها مجرد تمثال واكف ودموعي اني وامي واسماء تصب عليهن
.
.
اجت اسماء تريد تاخذ نرجس وما قبلت بقت ماسكة ايد امها وتبجي وتشجعها علمود تتحمل اخير شي ما تحملت وكع راسها فوك ايد امها
.
.
ركضت عليها شلتها وحطيتها على سريرها وجابتلي كلاص ماي اسماء مسحت وجها بلشت تفتح بس وجهها اصفر وعيونها ذبلانات ومبين عليها الخوف
.
.
......... يتبعhttps://www.facebook.com/الكاتب-احمد-106346968747988/