حب في ازقه نينوى

البارت(35)حب في ازقه نينوى الكاتب#احمد

35
ال الف واحد يقرونها حطولنا لايك الله يسعدكم ❤
#حب_في_ازقة_نينوى
بقلم #احمد
البارت_35
.
.
معتز: وجود زينب يحسسني بوجود حاجز بيني ويينها بس هسا اختلف الوضع واريد اتزوجها وارتاح علمود استقر بحياتي صار عمري 28 ولحد الان مو مستقر بحياتي
.
.
وعايش ضايع لا عائلة لا بيت رغم عندي ولد بس ماعندي زوجة تهتم بي وبشؤوني بس إن شاء الله هاي اخر سنة اكضيها هيج وبعدها ارتاح
.
.
نرجس: مشت بينا الايام عائلة ابو اسد راحو لبيتهم ثالث يوم العيد عائلة ابو رعد ما بين ولا واحد منهم الحجي مبين انو زعلان بس يحاول يضهر غير هالشي
.
.
ولان جانو عندو عائلة ابو اسد ماراح لابو رعد ومن يتصل عليه ما يرد عالاتصال من راحو عائلة ابو اسد خلص العيد ورجع الحجي وجواد لشغلهم بالمحلات
.
.
باحد الايام رجع جواد قبل المغرب لحالو جنت اني واسماء بالمطبخ ومعتز وامو وابنو بالصالة كعد عندهم جواد وكاللهم لعد ابوي وين
.
.
معتز: المفروض احنا نسألك
جواد: كالي رايح كدامك للبيت قبل نص ساعة تقريبا
معتز: ما اجى لحد الان
.
.
جواد: اتصل عليه شوف وينو
الحجي: دخل من باب الصالة .. ما يحتاج يتصل
جواد: شو تأخرت يابة
.
.
الحجي: مريت على بيت عمكم
معتز: يابة كل عقلك اذا ما يريد حتى يحجي ويانا على شنو تروحلهم وتنزل نفسك علمودهم
.
.
الحجي: اولا صلة الرحم واجب وبالاخص بالعيد ثانيا رحت اريد اعرف ليش يسوي هيج
معتز: وشنو جان جوابو
.
.
الحجي: ماعندو جواب
معتز: لان ماكو جواب غير انو كاطع
الحجي: ورحت هم علمود ام رعد
.
.
معتز: شبيها الثانية
الحجي: كول شنو المابيها
معتز: باستغراب .. ليش شصاير
.
.
الحجي: ماكلها الندم حتى ما تكدر تتحرك
معتز: كلو من ايدها يابة
الحجي: اعرف ابني اعرف كلو من ايدها
.
.
معتز: اي وشصار
الحجي: من شفت وضعها حتى ماكدرت اعاتبها تركتهم وجيت
معتز: خير ما فعلت بس يابة اريد اخذ رايك بموضوع
الحجي: شنو هو
.
.
معتز: بما انو الفلوس الي اخذناهن من الفصل موجودات واحتمال هم احصل تعويض من الحكومة علمود دوامي بالموصل
.
.
شنو رايك اجمعهن وافتح بيهن مشروع واخلي جواد يستلمو هم يكون عندو شغلة يسترزق منها وهم الفلوس ما يبقن هيج
.
.
الحجي: وبشنو ناوي تستخدمهن
معتز: والله يابة انتو اهل سوك وتعرفون اكثر مني
جواد: افتح بيهن مول
.
.
معتز: المول لازم اقل شي 100 مليون وما يكفن
جواد: ما كلتلك مول عالمي سوي مول صغير غذائية او البسة راح يمشي خوش مشي
.
.
معتز: وشنو رايك انت يابة
الحجي: فكرة اخوك خوش فكرة
معتز: يعني نتكل على الله
.
.
الحجي: ونعم الاتكال
معتز: ووين راح تبنوه
الحجي: نشوفلنا مكان زين وقريب من السوك
.
.
معتز: لعد انتو تصرفو براحتكم
الحجية: يلا اجلو سوالفكم لبعد العشى
نرجس: بابا انا كم مرة كلتلكم لا تحجون وقت الاكل
.
.
الحجي: ههههههه امرج باباتي امرج
نرجس: عفية وليدي
جواد: لو جواد ومعتز كايلين هيج
.
.
معتز: الا يشك حلوكنا
جواد: اي والله بس نرجس خط احمد
الحجي: تغارون من بنيتي
.
.
نرجس: اي بابا يغارون مني
الحجي: خلي يولون لا تهتمين لكلامهم
نرجس: عبدالهادي روح اضرب جواد
.
.
راح اضرب جواد باوع عليه جواد بعصبية اندار علي ويأشر لجواد ويكولو اما على اساس ماما كالتلي اضربك من سوا هيج كلنا ضحكنا عليه
.
.
جواد يكول من شاف الموضوع كبر ومايكدر يفلت تخلى عن نرجس وعبدالهادي رجع عندي علمود اوكلو وياي
.
.
مشت بينا الايام بروتين طبيعي معتز رجع لدوامو جواد اشترى قطعة ارض علمود يبني بيها مول وقررو يتساعدون بينهم معتز وجواد وابوه علمود يبنوه
.
.
جواد تأجل عرسو لان حاليا محتاجين كل دينار عندهم لحد ما يخلصون المول بدا جواد يبني بيه ويوميا يروح الصبح ما يرجع للمغرب
.
.
ومن يكون عندو وقت فراغ يروح على ابوه بالمحلات بلش دوام الجامعات ورجعنا اني واسماء لدوامنا هالمرة هي مرحلة ثالثة واني ثانية
.
.
مرة من المرات جنت مخلصة محاظرات وكاعدة على كرسي وانتظر اسماء فجاءة كعد عندي شخص انداريت عليه وابتسمتلو
.
.
معتز: شلونج يا حلوة
نرجس: هلا يا حلو
معتز: شلون المفاجئة
.
.
نرجس: حلوة مثلك
معتز: كومي وياي
نرجس: وين
.
.
معتز: عازمج على كلاص عصير
نرجس: المفروض اني اعزمك لان انت جاي للجامعة
معتز: لا اني عازمج امشي
.
.
نرجس: رحنا للنادي كعدت انتظرو وراح هو جاب عصير برتقال الي وهو اخذ عصير موز
.
.
معتز: ايمتى تخلص اسماء
نرجس: ماعرف يجوز بعد شوية ويجوز تتأخر
معتز: شنو رايج نروح اني وياج
.
.
نرجس: وين
معتز: ماعرف المهم نطلع نتونس
نرجس: لا هسا ينشغل بالها علي
.
.
معتز: تيلفونها وياها مو
نرجس: اي بس تيلفوني اني بالبيت
معتز: مو مشكلة
.
.
نرجس: دزلها رسالة وطلعنا اني وياه اول شي رحنا لمطعم تغدينا وبعدها رحنا لمدينة العاب جان الجو كلش حلو وما بيه حر وكضينا وقت كلش حلو
.
.
بقينا بمدينة الالعاب للمغرب واشترينا شعر بنات ورجعنا وبالطريق وكف عند محلات ونزل جاب موطة للعيلة كلها ورجعنا
.
.
من دخلت جان عبدالهادي يلعب ويا جواد ويضحك من شافني برطم ونزلت دموعو فتحتلو حضني واجى يركض حضني وكام يبجي كلتلو تروحلك فدوة ماما يا روحي
.
.
اخذت شعر بنات وكلتلو شوف شنو جابتلك ماما رفع راسو وعيونو مليانة دموع مسحت دموعو وفتحت الجيس وانطيتو شوية وعجبو الطعم
.
.
كعدت بالصالة بملابس الجامعة حتى ما بدلت ووكلتو لحد ما خلص الجيس وبستو
.
.
وكمت رحت لغرفتي بدلت ملابس وحتى ما الي واهس ادرس من التعب تعب الدوام وتعب الروحة تركت كلشي ونزلت تحت اخذت عبدالهادي بحضني والعب وياه
.
.
الحجية: تعشيتو
نرجس: لا ماما
الحجية: هسا اسماء تحط العشى
نرجس: لعد خلي اساعدها
.
.
كمت اريد اروح وجلب بملابسي عبدالهادي وكالت ابقي وياه مشتاقلج ورجعت كعدت ورجعت العب وياه لحد ما حطتلنا العشى اسماء
.
.
تعشينا وبعد العشى تعللنا واكلنا شعر البنات والموطة بال 10:30 نعست كلش اخذت عبدالهادي ونمت وهو بقى بحضني لحد مانام
.
.
معتز: نزلت من دوامي الصبح وصلت البيت بس امي وعبدالهادي موجودين ارتاحيت شوية وشربتلي ستكانة جاي صفيت بالي وبعدها رحت على جواد
.
.
شفتو دا يكمل بالمول ومو باقي هواي يخلصو ومريت عالحجي هم سلمت عليه ومن صارت الدنيا ضهر اتصلت على امي سألتها عالبنات كالت ما اجن
.
.
كلتلها راح اخذهن ونطلع نتونس كالت بكيفكم لعد ركبت سيارتي ورحت للجامعة دا امشي وشفت عصفورتي كاعدة لحالها على كرسي
.
.
عزمتها على عصير وسألت على اسماء وفكرت بيني وبين نفسي كلت ماطول اسماء عندها محاظرة خلي نطلع اني ونرجس لحالنا
.
.
اخذتها وتونسنا كلش بس بمدينة الالعاب ما قبلت تلعب بشي بقت بس تراقب الناس ومبتسمة واني فرحان على فرحها
.
.
جنت مقرر اخذها للموصل تشوف بيت اهلها ومحلات ابوها بس جنت خايف لا تشوف خوالها ويجبروها تبقى جان يوم اربعاء كلت اشوفها اذا تريد تروح لازم اشوفلي طريقة واخذها
.
.
نرجس: كعدت الصبح عبدالهادي نايم تركتو وكمت بدلت ملابسي ونزلت دا نتريك اني واسماء واجى معتز وحجى وياي
.
.
معتز: نرجوسة اخذي تيلفونج وياج
نرجس: ليش
معتز: محتاجج بموضوع بعد الدوام
.
.
نرجس: تمام
معتز: من تخلصين دوام اتصلي علي
نرجس: ماشي
.
.
معتز: وهم من اليوم اخذي وياج دائما خاف تحتاجين شي وتكون اسماء عندها محاضرة او ما موجودة
نرجس: فكرت بكلامو وجان كلامو منطقي ووافقت عليه
.
.
من خلصت اخذت تيلفوني واجانا الخط ورحنا جان بالي مشغول شنو يريد مني معتز جان يوم خميس ولان نهاية اسبوع والطلاب الي بالمحافضات اكثرهم رايحين لاهلهم جانت محاضراتنا قليلة
.
.
من خلصت اتصلت على معتز كلتلو تعال خلصت محاضراتي وتلكيني بمكان البارحة وسكرت منو ورحت انتظرو بالكرسي نفسو جنت كاعدة واجى ولد يدرس وياي بنفس القسم والقاعة اسمو مهند ولد كلش خلوق وكل الطلاب يحبوه
.
.
مهند: مرحبا نرجس
نرجس: هلا اخوية هلا بمهند
مهند: شلونج
.
.
نرجس: زينة انت شلونك
مهند: الحمدلله .. بقى ساكت
نرجس: محتاج شي مهند
.
.
مهند: اكدر اخذ دقيقة من وقتج
نرجس: اي اكيد تفضل
مهند: ........ قبل ما يحجي وصل معتز
.
.
معتز: السلام عليكم
مهند&نرجس: عليكم السلام
معتز: ها نرجوسة خلصتي
.
.
نرجس: اي .. صدك اعرفك هذا مهند زميل بنفس القاعة .. مهند هذا معتز
معتز: تشرفت بيك حبيبي
.
.
مهند: الي الشرف
معتز: عندكم موضوع تحجون بيه 
نرجس: اي مهند جان يريد يحجي
.
.
مهند: محتاج دفتر ملاحضاتج اذا مابيها زحمة لان باجر جمعة واكدر اخلصو بهاليومين
نرجس: طيب بس اصورو علمود اراجع بالبيت
.
.
معتز: ما يحتاج نرجس عندنا شغل هاليومين ماراح تلحكين تدرسين
.
.
نرجس: شكو
معتز: هو علمود الموضوع الي كلتلج محتاجج بيه
نرجس: تمام
.
.
طلعت الدفتر انطيتو لمهند وطلعت مع معتز واني مستغربة شيريد مني رحنا لحديقة عامة وكعدنا سوا وبلش هو يحجي
.
.
معتز: احجي بالموضوع
نرجس: اي احجي قلقتني
معتز: حابة تروحين لبيت اهلج
.
.
نرجس: بفرحة .. يعني تكدر تاخذني
معتز: اي إن شاء الله اكدر اخذج
نرجس: اي اريد اروح
.
.
معتز: لعد باجر نروح بس احتمال نلتقي بخالج هناك
نرجس: انت تجي وياي مو
معتز: اي اكيد
.
.
نرجس: ماطول انت وياي ما اخاف من الدنيا كلها
معتز: لعد من نرجع حظري نفسج باجر نروح
نرجس: ماشي
.
.
من كال نروح لبيت اهلج احس الدنيا ما وسعتني من الفرحة شكد جنت مشتاقتلو اخيرا راح اشوفو بعد كل هالانتظار المميت
.
.
بعدها رحنا تغدينا بمطعم ورجعنا للبيت لكيناهم متغدين اخذت عبدالهادي نومتو وماعرف شنو اخذ وياي بس جهزت اوراق البيت وهويتي وهوية ماما
.
.
لان جان البيت والمحلات باسمها بعد وفاة بابا وكلت اذا احد حاول يمنعنا يكون هذا اثبات ملكية البيت والمحلات جنت متحمسة كلش للروحة
.
.
معتز حجى لاهلو جانو مو مقتنعين بس هو عرف شلون يقنعهم كضينا اليوم طبيعي اسماء من كلتلها وشافت فرحتي فرحتلي وكالت لا تتأخرون
.
.
جان الي شاغل بالي شلون اعوف عبدالهادي لا اكدر اخذو وياي واذا عفتو راح اشتاقلو بس لازم اروح بالليل ما نمت لل 12:30 وكعدتني الحجية وقت صلاة الفجر
.
.
كالت معتز يكول خلي نروح كمت سويت ريوك وتريكنا وبعدها بدلت ملابسي وبست عبدالهادي ورحنا مشينا كالي معتز اذا سألو نكوللهم زوجتي بس بعد ما جددنا الهويات كلتلو ماشي
.
.
من وصلنا مدخل بغداد انطاهم معتز الهوية العسكرية سألو عني كاللهم زوجتي وبدون ما ياخذون هويتي رجعو هويتو
.
.
جنت من تمشي السيارة اشوف اثار الحرب بالبيوت الي عالطريق والسيارات المتفجرة او المحروكة وجان معتز يحجيلي هنا صارت فلان معركة وهنا جانو القوة الفلانية
.
.
وشفت بعض الاماكن الي هو جان موجود بيها بس اثار الحرب والدمار جانت موجودة بكل مكان وجانت اكثر الجسور متفجرة وهذا الي خلى معتز يسلك طرق ابعد
.
.
بحيث طلعنا الفجر من بغداد والسيارة تمشي بس توقفنا مرة وحدة علمود البانزين وكملنا طريقنا ما وصلنا للعصر طبينا مشارف الموصل وبدت ترجعلي الذكريات وحدة وحدة
.
.
المدرسة جانت على طريقنا من شفتها رجعتلي ذكرياتي ويا هند ومن جان معتز يلحكني من تعارك ويا الولد على مودي جنت اباوع للشوارع وبكل شارع الي ذكريات
.
.
طبينا فرعنا احس كلبي رجف المسافة الي من طارف الفرغ لبيتنا احسها سنة صارت من وصلنا نزلت ركض صاحني معتز ما رديت دفعت الباب ودخلت
.
.
جانت الحديقة يابسة الحوش مليان تراب البيت مضروب عليه طلق بس الحمدلله مو مقصوف ولا واكع عليه هاون حسيت من ادخل مثل قبل الكي امي تنتظرني ومجهزة الغدا
.
.
دخل وياي معتز اني امشي ومع كل خطوة احس الف دمعة تنزل من كثر دموعي دخلت للمطبخ بعدو مثل ما تركناه بس مليان تراب ومو نظيف مثل ما تركناه
.
.
هو بيتنا بس مابيه الدفو الي جان موجود بوجود امي مابيه حنان ذيج الايام صعدت للطابق الثاني شفت غرفتي وتذكرت الداعشي احس جسمي كلو رجف مو بس كلبي من الخوف
.
.
دخلت عليها بعدها مثل ما هي انداريت عالحياط ورجعت بذكرياتي لكل صليب اشتريتو بكل واحد ذكرى خاصة من طفولتي لحد ما كبرت
.
.
جان اكو صندوق صغير حاطة بيه اقلامي من خلصت دراسة فتحتو وشفت اقلامي حطيت ايدي على وجهي اريد اكتم صوتي ماكدر احس جبل من الذكريات فوكي ومو كادرة اتحمل
.
.
اجى معتز يريد يسحبني كلتلو فدوة عوفني حاول يجبرني وما اقتنعت وتركني رجعت الصندوق ملابسي الباقيات كلهن موجودات بس صايرات صغار علي وقديمات
.
.
شفت البوم صور اخذتو حطيتو على صفحة شفت دفاتري وملازمي مالت الخامس ضحكت ودموعي ينزلن بنفس الوقت
.
.
جان عندي اكسسورات ضامتهن بصندوق هم طلعتهن حطيتهن على صفحة انداريت شفت معتز كاعد عالسرير وصافن علي كلي كملي على راحتج جنت اريد اطلع من الغرفة شفت المكان الي جان بيه بابا من حلمت بيه وفزيت لا ارادي
.
.
معتز: شبيج نرجس اكو شي .. حجاها وهو يباوع للمكان
نرجس: لا بس تذكرت الحلم
معتز: شنو من حلم
.
.
نرجس: حجيتلو الحلم
معتز: مجرد حلم لا تهتمين
نرجس: ماشي
.
.
طلعت من غرفتي دخلت عالغرفة الي جان بيها الدواعش من حبسهم معتز شفتها الكاع بيضة ماعرف ليش وبيها ريحة مو حلوة بس خفيفة
.
.
نرجس: شنو هاي الريحة
معتز: خفت احجيلها عن الدواعش وتخاف كلتلها ماعرف
نرجس: كانو ريحة شي ميت بس خفيفة
.
.
معتز: يجوز فارة ميتة
نرجس: صدك الدواعش الي حبستهم شصار عنهم
معتز: ماعرف من دخلنا عالموصل ما لكيت احد
.
.
نرجس: الرب ياخذهم
معتز: هو اخذهم بعد
نرجس: شعرفك اخذهم
.
.
معتز: لان ماتو هواي من الدواعش فاكبر احتمالية انهم ماتو مع الدواعش الماتو
نرجس: يستاهلون
.
.
طلعت من الغرفة صعدت للسطح شفت المكان الي صعد منو معتز لحد الان البيت الي ورانا هيكل مو بيت كامل من شفتو ابتسمت
.
.
معتز: الله يجعلها ابتسامة خير
نرجس: تتذكر من صعدت منا علمودي
معتز: اتذكر كل حرف حجيتو او حركة سويتها علمودج
.
.
نرجس: يا ترا متندم
معتز: لو يجي بايدي ارجع اسويها مرة ثانية
نرجس: يعني ما تحجيها مجاملة الي
.
.
معتز: نرجس انتي تعرفين لحد الان احبج ومستحيل اتخلى عنج ولو ما احبج ما اتعنى من بغداد للموصل بس علمود اشوف فرحتج بشوفة بيتكم
.
.
نرجس: الرب يسعدك مثل ما اسعدتني وفرحتني
معتز: ويسعدج ويفرحج دائما
نرجس: آمين
.
.
جنت احجي ويا معتز ومندمجين بالحجي ومنظر الشمس كدامنا وهي تغرب جان موقف كلش حلو وقطع اندماجنا الصوت الي اجى من داخل البيت
.
.
......... يتبع
لايك وتعليق حلو مثلكم ❤
حطولنا ارائكم وتوقعاتكم ❤