حب في ازقه نينوى

البارت(29)حب_في_ازقه_نينوى الكاتب احمد

اليوم استراحتي ونزلتلكم البارت لهذا اريد تفاعلكم وياه ❤️
#حب_في_ازقة_نينوى
بقلم #احمد
البارت_29
.
.
كضينا وقت حلو وياهم (اهل عامر) بس جنا شوية متقيدين لان ما متعودين عليهم واول مرة نروحلهم العصر تشكرو الحجي  والحجية منهم ورجعنا لبيت ابو اسد وكملنا اليوم عدهم بالليل اخذت عبدالهادي وصعدت فوك ونمنا اني وياه
.
.
ثاني يوم كعدت الصبح عبدالهادي كاعد وعلى طبيعتو هادئ بس يباوع بعيونو فتحت كماطو وكمت العب وياه وهو شبعان ضحك التهيت وياه ونسيت انزل للريوك ههههه الا اجت اسماء علينا
.
.
اسماء: راح نروح وانتي بعدج ما تريكتي
نرجس: وين تروحون
اسماء: نروح للبيت الي بمزرعة عمي نبقى لباجر
نرجس: وليش نبقى لباجر
.
.
اسماء: ابوي جان يريد يرجع لبغداد اليوم بس عمي قنعو نروح للمزرعة اليوم ونبقى لباجر ومن هناك نطلع للبيت يعني لا تبقين شي هنا
.
.
نرجس: تمام لعد بس ابدل لعبدالهادي واريكو ونروح
اسماء: انطينياه اني اكملو وروحي انتي تريكي وتعاي جهزي نفسج
.
.
نرجس: انطيتها عبدالهادي ونزلت تحت جانو مو مخلصين ريوك كعدت اكلت كم لكمة عالسريع ورجعت جهزت نفسي وحطيت ملابسي الزايدات وملابس عبد الهادي وغراضو بالجنطة
.
.
وجانت اسماء مجهزتو خليت الجنطة عندها ونزلت اني وياه رحنا للمزرعة جانت مليانة اشجار وبالوسط بيها بيتين الاول فارغ لعائلة ابو اسد من يجون والثاني لحارس المزرعة
.
.
الساعة جانت 11 اخذت جواد وعبدالهادي وطلعنا نتمشى ونستكشف المزرعة جانت جبيرة وجواد كال خلي نبقى عند البيت والعصر اخذج لخزان الماي ووافقت
.
.
بال 12 خلصت رحلة استكشافنا ورجعنا للبيت رضعت عبدالهادي ونومتو وطلعت لكيتهم يجهزون للغدا وزوجة الحارس مسوية دولمة وكبة
.
.
وجان ابو اسد متفق وياه انو اول يوم يجي عالمزرعة سوا وياه خطار او بس هو وعائلتو زوجة الحارس تسوي الغدا وهو ينطيهم مصرف الغدا واكرامية لزوجة الحارس علمود تعبها
وتعاملو الزين وياهم مخليهم كلش يحبوه
.
.
تغدينا جان طبخها كلش طيب ورا الغدا شربنا جاي وطلعنا كلنا اسد وجواد والبنات كلهن جنت اتمنى عبدالهادي كاعد علمود اخذو وياي بس جان نايم وما اكدر اخذو وصيت الحجية عليه وطلعنا
.
.
مشينا مسافة كيلو متر تقريبا وصلنا عند حفرة كبيرة وصابين طوارفها ومليانة ماي نزعت نعالي وحطيت رجليني بالماي جان بارد وكلش حلو الشعور
.
.
اسد: نرجس ديري بالج ترا الماي خطر
نرجس: ليش
اسد: الكاع مليانة حياية ولان الماي بارد يطبن بيه
.
.
نرجس: من كال هيج فزيت وسحبت رجليني وهم يضحكون على فزتي بس مو بايدي اني خوافة وتخيلت تجي حية وتلدغ رجليني وهن بالماي
.
.
جواد: شوفي نرجس
نرجس: شنو
جواد: باوعي هناك زين
.
.
باوعت عالمكان الي مأشر عليه جانت حية بالماي ورايحة لطارف الماي من الجهة الثاني من شفتها حتى جلدي كزبر من الخوف
.
.
اسد شال حجرة وضربها واجت براس الحية وشال عصى وراح يركض عليها هو وجواد من طلعت كامو يضربون بيها علمود يكتلوها
.
.
بسمة: ترا راح يجيبوها علينا خلي ننهزم
اسماء: اي بربي حجيها صدك
نرجس: لعد خلي نشرد
.
.
كمنا بدون ما ينتبهون ونطكها ركضة للبيت وهم شافونا وجابوها وركضو ورانا وصارلنا صراخ بالبستان وهم يضحكون وجانو شوية بعيدين بس اسرع من عدنا
.
.
طبينا البيت وصراخنا تارس الدنيا بحيث الي بالبيت طلعو على صراخنا من دخلن البنات قفلت الباب علمود لا يطبون وكوة اسحب النفس من الخوف والتعب
.
.
الحجية: شكو خير يا ستار شبيكن
نرجس: جواد واسد جايبين حية ولحكونا يريدون يخوفنا بيها
الحجي: وينهم هسا
.
.
اسماء: اجو ورانا بس ما لحكو علينا
الحجي: جواد ما راح يترك سوالفو
اسماء: ولا علم اسد هم
.
.
نرجس: طلعو ابو اسد والحجي شوية واجو وياهم اسد وجواد ومبين مترزلين وجاب حبل الحجي وربطهم وابو اسد لف الحية على ركبتهم
.
.
واحنا نضحك عليهم وهم مو مهتمين لان الحية ميتة بقو نص ساعة مربوطين بعدها زت الحية ابو اسد وفكهم وهم يضحكون لان من ربطوهم يتشاقون وياهم
.
.
عبدالهادي جان بحضن الحجية يلعب باوعتلو من بعيد ومديت اديني الو وتخبل بس يريد يوصلني ورحت اخذتو والضحكة تطلع من كلبو من الفرح
.
.
البيت جان تصميمو اعتيادي مثل اي بيت اول شي بابين باب عاليسار للاستقبال وباب لداخل البيت اول ما تدخل ممر مسافة 5 امتار تقريبا وعاليمين مطبخ
.
.
بنهاية الممر اليسار الصالة وعاليمين الدرج والحمام وبين الصالة والاستقبال غرفة ثالثة ومقابيل الممر غرفتين ومن خارج حديقتين وحدة من جهة الجنوب وحدة من جهة الغرب وجانت الحديقة مربعة 5×5 يمكن وداير ما يدورها ورود ملونة
.
.
جانت الدنيا مغرب فرشن بيها البنات فراش وكعدنا بيها والحجية وام اسد تكفلن بالطبخ لان اعتبرن هاليومين استراحة للبنات
.
.
اني ملتهية ويا عبدالهادي والبنات لحد ما اجت ام اسد اخذت البنات يساعدنهم بالعشى واني بقيت ويا عبدالهادي دنكت عليه كلتلو اروحن فدوة لوليدي الي مريحني من الشغل
.
.
الحجي: ههههههه هاي مستمسك عليج
نرجس: هههههه لا بابا انت ما سمعت دا احجي لوليدي
ابو اسد: ماكو تورطتي ويا ابوج بعد
.
.
نرجس: بمكر .. بابا صدك تورطت وياك
الحجي: شو اذا تبجين اسامحج
نرجس: ههههههه ماعرف ابجي بهيج موقف
.
.
الحجي: لعد تحملي
نرجس: يلا فدوة لوليدي خلي اتورط
الحجي: ههههههههه تمام
.
.
نرجس: دنكت عليه وابوسو من خدودو واكول خطية يتحسرون على وليد مثل وليدي شوفو شكد حلو يخبل وهو مكيف ويضحك
.
.
حطولنا العشى جانت جمعتنا عالاكل كلش حلوة بس ناقصها معتز وتكمل ومانعرف ايمتى يرجع اول مرة يتأخر هيج بس اكيد بسبب الحرب الي بالموصل ما يكدرون يرجعون ويتركوها
.
.
بعد ما خلصنا عشى دخلنا داخل لان الجو صار شوية بارد كملنا تعليلتنا داخل بقينا لل 11:30 اني وعبدالهادي كلش نعسنا ترخصت منهم ورحت لغرفتي بدلت لعبدالهادي وكمطتو وخليتو بحضني لحد ما نام ونمت اني وياه للصبح
.
.
كعدت الساعة 7 على صوت العصافير حسيت نفسي بفلم مو حقيقة طلعت خارج جان الجو والمنظر مال الصبح خيال مو حقيقة على كد مو حلو شكد ما اوصف ما يكفي الوصف
.
.
رجعت صعدت فوك السطح واباوع للشجر من فوك مع ضو الشمس الخفيف والبرودة مالت الجو ماكدر اوصف شعور الراحة النفسية
.
.
من سمعتهم كعدو نزلت لكيت عبدالهادي هم كاعد بدلت ملابسو ونزلتو تحت هو ومميتو رضعتو بين ما جهز الريوك تريكنا وبعدها جهزنا نفسنا وتوكلنا للبيت
.
.
طبعا بالروحة وبالرجعة جواد وابوه يتناوبون على السيارة علمود ما يتعبون من وصلنا بغداد احس تعب الايام الي راحت طلع كلو علي
.
.
حطيت عبدالهادي بالغرفة ورحت للحمام اخذتلي دوش ورجعت للغرفة بدون ما امشط اخذت عبدالهادي لحضني ونمنا بحضن بعض
.
.
~~~~~~(((تسريع للاحداث)))~~~~~~
.
.
مشت بينا الايام جواد قدملي عالجامعة وطلع قبولي بكلية الطب وانتظر يبدا دوامي علمود اعيش الحياة الي حجتلي عنها اسماء
.
.
عبدالهادي ما يفاركني دائما وياي بس من يلاعبونو اهل معتز يفاركني جواد حجى للحجية علمود موضوع البنت الي يحبها وكاللها من يجي معتز إن شاء الله راح اخطبها وهي وافقت على قرارو
.
.
الحجي سجلني ويا اسماء بنفس الخط مال الجامعة اهل زينب انكطعت اخبارهم الملابس مالات زينب جمعتهن الحجية وانطتهن للفقراء بدال ما يبقن بدون فايدة
.
.
الجيش يتقدم بالموصل وهالشي يفرحنا وينطينا امل بعودة معتز اني انسجمت كلش ويا اهل معتز بحيث فعلا صرت منهم وبيهم لا اتقيد ولا شي
.
.
بس ملتزمة بحجابي كدام الحجي وجواد لان تعودت عليه واعرفهم يرتاحون اذا ابقى محجبة كدامهم
.
.
قبل ما يبلش دوام الجامعات اخذني جواد اني واسماء للسوك اخذنا ملابس للدوام غيرنا جو ورجعنا بلشت اسماء بالدوام قبلي لان اني سنة اولى وبين ما يكملون معلوماتنا والتقديم مال الدور الثاني وبعدها داومنا
.
.
اول يوم جنت مرتبكة لان حياة جديدة ونظام جديد ومكان جديد كعدت ويا اسماء الصبح دزيت عبدالهادي ويا اسماء للحجية وتريكنا سوا
.
.
من اجى الخط رحنا اول ما وصلنا جانت الجامعة كبيرة كلش جان لبسنا اني واسماء جبة وحجاب وباقي البنات اكو مثلنا واكو تلبس بنطلون او تنورة قصيرة وطويلة واكو محجبات واكو لا واكو لابسات خمار واكو مثلنا بدون خمار
.
.
وجود اسماء وياي ريحني وما ضعت مثل باقي الطلاب وصلتني هي للقاعة وراحت بدو يجون الطلاب والطالبات اني كاعدة واراقب مثل رادار المطار ههههههههه
.
.
بس اشوفهم يتجمعون اجت وحدة من البنات عرفتني عليها اسمها سرى عمرها 19 من بغداد رحبت بيها وعرفتها على نفسي وراحت تعرفت على باقي الطالبات
.
.
حسيتها طيبة بس ما اعرف عنها لان اول مرة التقي بيها شوية واجى الدكتور يالاول عرفنا على نفسو وعالنظام الي يتبعو بتدريسو وانو ممنوع يدخل وراه طالب
.
.
وطلب من الطلاب يكومون بالدور يعرفون عن نفسهم اسمهم وعمرهم بدو الطلاب يعرفون عن نفسهم لحد ما اجى دوري وعرفت عن نفسي
.
.
الدكتور: لهجتج تختلف عن اهل بغداد انتي من بغداد
نرجس: لا من الموصل بس كملت دراسة هنا بعد احداث  2014 واحتمال ارجع بعد التحرير للموصل
.
.
الدكتور: يعني انتي واهلي حاليا ببغداد
نرجس: لا وحدي
الدكتور: وين اهلج لعد
.
.
نرجس: ابوي متوفي من جنت صغيرة وامي من نجحت من الخامس توفت بالسرطان وماعندي اخوان بس عايشة ويا ناس معارفنا هنا
.
.
الدكتور: الله يرحم والديج هذا حال الدنيا
نرجس: ويرحم موتاك
الدكتور: بس الي اعرفو هواي ناس بقو بالموصل ومثل حالتج ماعندج سبب يجبرج تجين لبغداد
.
.
نرجس: طلعنا من الموصل لان مسيح
الدكتور: تمام .. خوما ضجتي من اسألتي
نرجس: ابتسمت .. لا عادي
.
.
الدكتور: اهلا بيج بين اهلج وناسج واي شي تحتاجيه اعتبريني ابوج او اخوج الجبير
نرجس: شكرا
.
.
كملو تعريف عن نفسهم وعجبني كلام الدكتور مبين واعي ومثقف من خلصنا تعريف عن نفسنا استأذن هو وابتسمت لا ارادي وهو انتبهلي
.
.
الدكتور: اكو شي نرجس
نرجس: العفو بس اول مرة يستأذن الشخص الي يدرسنا اسفة اذا ازعجتك
.
.
الدكتور: اها مو مشكلة ما صار شي
نرجس: اعتذر على تصرفي
الدكتور: ماصار شي يلا مع السلامة طلاب
.
.
نرجس: غميت نفسي شبيج مثل المخبلة تتمضحكين طلعنا من القاعة تمشيت شوية ورجعت وراها اجى غير دكتور هم تعرف علينا وراح وكضينا اليوم تعارف وثاني يوم يبدا الدوام
.
.
من خلص دوامي سألت عن قاعة اسماء ورحت عليها لكيتها كدام القاعة هي وصديقاتها سلمت وسألتها ايمتى تخلص كالت منا لنص ساعة
.
.
رجعت بالساحة جانت اكو كراسي كعدت انتظرها وجانت قاعتها مقابيلي علمود لا اضيعها وعيوني يمين ويسار استكشف المكان الي اني بيه
.
.
اجت بنت عبالها ضايعة كلتلها انتظر اختي بالمرحلة الثانية عندها محاضرة وراحت بقيت انتظر اسماء لحد ما خلصت واجت ورجعنا سوا اني وياها للبيت
.
.
جنت ميتة شوق لعبدالهادي اول ما وصلت رحت عليه ركض من شافني كام يضحك اخذتو وشبعتو بوس رجعتو عالقنفة ورحت بدلت ملابسي ورجعتلو وراحت اسماء حطت الغدا
.
.
اخذتو والعب وياه واضحكو وهو طاير من الفرح ومبين مشتاقلي مثل ما اني اشتاقيتلو ثاني يوم بلش الدوام الفعلي جان مبين من بدايتو صعب
.
.
وشوية استصعبت اللغة الانكليزية وجانت دراستنا كلها انكليزي بس مع الوقت تعودت
.
.
عبدالهادي يبقى عند الحجية من نداوم لحد ما ارجع وجنا من نكعد اني واسماء نسوي الجاي ونتريك ونروح ومن نرجع تكعد الحجية بس تحميه الهم
.
.
والغدا عليها لان احنا نتأخر غسيل المواعين ما نخليها تغسلهن من نرجع وحدة تغسل والثانية تنظف البيت والعشى نتساعد بيه او مرات ابقى اني عند عبدالهادي واسماء تحطلنا العشى
.
.
الجيش خلص من تحرير الموصل فرحناا كلنا بالخبر وتوقعنا يرجع معتز بس خاب املنا من تقدمو لمناطق بعاج والحدود وماكو اي خبر عن معتز بس الي مخليلنا امل انو متأكدين منو عايش بس شنو وضعو مانعرف
.
.
الايام تمشي يوم بعد يوم ومعتز ماكو عبدالهادي تعلم يكعد وبعدها يزحف على ايديه ورجليه اول ما بلش يزحف جان يزحف ليورا
.
.
اني اخليه كدامي واكولو تعال وهو يرجع ورا واني اشبع ضحك عليه بحيث تطلع دموعي من الضحك ومن يتعب لو يضوج ارجع اشيلو
.
.
بعدها تعلم يزحف كدام وجان متعلق بي بشكل مو طبيعي مرة شافني من رحت للدوام تخبل لهذا كمت اخليه عند الحجية واطلع بدون ما يشوفني وهو ينسى لحد ما ارجع من الدوام
.
.
جواد جان دائما من يكون موجود يمسك ايديه ويعلمو عالمشي اخير شي وصلنا خبر عن معتز انو ويا الجيش الي تقدمو عالحدود وهو وجماعتو كلهم بخير ومابيهم شي وهالخبر خلانا نطير من الفرح اخيرا عرفنا شي عنو وتطمنت كلوبنا عليه
.
.
جنت كلش مشتاقتلو واتمنى اشوفو شلونو بعد كل هالايام تغير لا بس ارجع افكر بردة فعلو من يعرف زينب توفت بالولادة انفهر عليه واكول الرب يصبرو على ما ابتلاه
.
.
صحيح الي افكر بيه ممكن يكون غلط بس معتز بسبب رفضو لزينب ممكن ما يتأثر هواي بوفاتها بس لو حابها ومتزوجها عن حب جان الله يعلم بحالتو من يسمع
.
.
ومرات افكر بعبدالهادي من يكبر ويعرف انو امو جانت تكرهني يا ترا راح يتقبل الموضوع ويبقى مثل ما هو لو راح يكرهني بس مستحيل ينكر تعبي واهتمامي بيه
.
.
خلصنا دوام وخلصت المرحلة الاولى بالجامعة ومعتز ماكو الجيش حررو الحدود والاراضي العراقية بالكامل وعرفنا انو راح يرجع معتز بس ايمتى بالضبط ماندري
.
.
بس ننتظر ثانية ثانية علمود يرجع ونشوفو بخير وسلامة بعد كل هالانتظار القاتل
.
.
الملحق الي عشنا بيه اني وامي انترك وما دخلتو من طلعت منو ماما اتذكرها دائما وملابسها موجودات عندي بس دائما اكول الرب عوضني بعبدالهادي عن امي
.
.
ووجودو بحياتي مخليلها نكهة خاصة ومخليني استغني عن الكل الناس من يكون هو موجود يمي
.
.
عبدالهادي صار عمرو سنة جنت اريد اسويلو عيد ميلاد بس الحجي كال حرام ولغيت الفكر ومن صار عمر سنة كام يمشي وخبلنا خبال من مكان لمكان
.
.
ومن ندورلو ونلكيه يضحك بوجيهنا يعني حتى لو معصبين عليه من يضحك ننسى عصبيتنا عليه مرة من المرات كاعدة بالصالة عالقنفة وعبدالهادي كدامي
.
.
ماسكة ايديه والعب وياه وهو يرفع راسو فوك من يضحك من كد ما فرحان واني متخبلة عليه سمعت صوت باب الصالة ورفعت راسي
.
.
......... يتبع
لايك وتعليق حلو مثلكم ❤️
حطولنا ارائكم وتعليقاتكم ❤️
https://www.facebook.com/الكاتب-احمد-106346968747988/