طغيان رجل&انتقام امرأة🥰

شوق الاحبة

💄شـــــــــــــوق الأحــــــــبّــــة💄
       الفصل الثالت : صـفـحـة جـديـدة < 25>
《°♡ مـا الحــب إلا للــحـبـيـب الأول ♡°》
الجزء340
سيناريو و كتابة : #SELMA_SABRI

نسرين ساكتة و ضاربة الطم من ديما عائلة زوج خالتها ما عندهاش معاهم علاش على والو مسألة ما دخلينش لها للخاطر وسلام ...
جالسة فداك الصالون بإبتسامة صفراء كدير الواجب فوق الخاطر تضحك مع لي ضحك معاها و تجاوب لي هدر ، على غفلة قفزت من قرصة جاتها فالساق كانت طامو قرصتها مخرجة عيونها فيها ...

طامو : ويلي غداايدي هافقااايصي نوضي لولادك كيبكيييو اش سايرة ديري عد قمووونتي !!

  الكل عارف مرضها مسكينة كتكون ساهية و ناسية لي داير بها تا كتقفز و يجيها حدث قديم مزاحم ذاكرتها ، ضحكو يطلفو الجو نطقت مرات رشيد سيدة خمسينية ” حنان “ لابسة جلابة اخر موديل فالخياطة التقليدية و فولار على راسها من ملامح وجهها تلمح السم كيتقطر  منها ...

حنان : ( ضحكت فوجه نسرين مستهزئة ) ويل الشيطان الحاجة طامو اشمن ولاد الله يهديك مساااكن باقين على مولانا بلا وليدات ، ياك أبنتي ما كاين والو لاحظت غلاضيتي على فاش شفتك العيد اللي فات ...

     أسية حقدت على الوضع غمزت خدوج تهدر و تصرف قبل فوات الاوان ...

خدوج : ( سبقت نسرين فالنطق ) باقي مجاب الله أختي حنان ...

حنان : ( ميقت ) واه تعطلو انا عيلات ولادي ضربو العام الأول ولدو عمرو علينا الدار تبارك الله ، أاء أ بنتي منك ولا منو المشكل مناش هاد تعطال واه ثلات سنين دزواج و ما كاين والو ...

نطقت بزربة زوجة مسعود غيثة تابعة حنان فالهدرة نسات راسها ...

غيثة : كانت حملت بعد زواج طاح لها بنادم مسكينة ربي يعوضها ...

حنان : أااه قول هداك اوا تشوف مناش المشكل ، عرفتو كانت صاحبتي وقع لها كما وقع لنسرين حملات فأول زواج و طاح لها من بعد 5 سنين كتسنى تولد مسكينة و والو ما جابش الله ، اوا راجلها طلقها و تزوج و ولد مع المرا الجديدة ، ( نظرت لنسرين ) شوف ابنتي قلبي على راسك و لقاي الحل واه الرجال ما فيهم تيقة ، يا خسارة  صاحبتي كان راجلها كيموووت على تراب رجليها غي فوت معاها 5 سنين زواج بلا وليدات طلقها و الله ما عقل عليها ...

      هدرتهم قصحتها لدااااخل بقات فيها نعت باش نعتوها ” المسكينة “ ما ردااتش على راسها داك اللقب اللي كيحمل في طياتو الشفقة أولا و استهزاء تانيا ، دموع تغرغرو في عيونها قلبها وسط صدرها كيضرب في 90 ، أما يدها كمشت بيها على طرف من عبايتها تا بانو عروقها خضرين ...

    قفزوووو كاملين على حس صوت خشن حرش في نبرته فيه الكثيييير من الغضب كاثمو بزز على وجه أ عمامو ...