عشق طفله

البارت(46)عشق_طفله الكاتب#احمد

#عشق_طفلة
بقلم #احمد
البارت_46
.
.
الحجية: راضية عنك وليدي راضية الله يهنيك ويسعدك وياها روح تجوزها وافرح بيها اني ماكدر اجي للخطبة بس راح اكون موجودة بعرسك
.
.
غضب: الله لا يحرمنا منج بستها من راسها وطلعت حسن اجى وياي وابوي وعائلة حسين بسيارتهم وانطلقنا لبيت اهل ليندا
.
.
ليندا: تونست مع البنات وما اريد النهار يخلص قبل المغرب راحن كلهن واجى محمد صعد يرتاح بغرفتو وانا نظفت البيت وسويت العشى نزل محمد كال ... راح يجي غضب اليوم علمود يحددون المهر والعرس
.
.
ليندا: تمام
محمد: شلون راح اصبر بدونج واني ما صدكت على الله لكيتج
ليندا: واني هم والله ضايجة عليك من هسا
محمد: يا بعد اخوج خلص من اليوم ورايح ما اريد اشوفج ضايجة وخشمي يشم الهوا
ليندا: الله يخليك الي يا سندي وكل اهلي
.
.
اجى حظني وباس راسي تعشينا وراها بشوية راح هو للمظيف واني جهزت نفسي ورجعت انتظرهم دقايق قليلة واندك الباب رحت فتحتو دخلن اية وامها وابتسام رحبت بيهن ودخلن داخل
.
.
قدمتلهن الضيافة وكعدن يحجن وياي اية وامها متحسنة معاملتهن وياي من يوم تراضينا اني واية وكلت ماطول تحسنن وياي خلي اني هم انسى الي صار وافتح صفحة جديدة واكسبهن الي
.
.
غضب: وصلنا عرفنا محمد بالمضيف وصلنا النسوان بالسيارات عند الباب وقفلناهن ورحنا للمضيف جانو هناك محمد وماجد وكم رجال من العشيرة رحبو بينا ترحيب كلش حلو كعدنا وتكهوينا وبدو يحجون محمد وابوي
.
.
الحجية: ابني احنا جايين وتعرف طلبنا والي راح ما نرجع نحجي بيه بس النا حق عليك وهو ان بنيتكم ترجع لزوجها عاروس مثل ما طلبت انت ومثل كل البنات
.
.
محمد: جيتكم على عيني وراسي وكل الهلا بيكم واني ما معارض على رجعتها وخصوصا بعد ما حجتلي عن تعامل ابو عذاب وياها واني شاكر وممنون هواي الو
غضب: ولو واجبي هذا
.
.
الحجي: العرس نريدو باسرع وقت وابتسام راح تكون ويا ليندا بتجهيزات العرس وبالنسبة للمهر انت فصل واحنا نلبس
محمد: جيتكم هاي كافية واكيد ليندا ما تتقدر بثمن سواء عندي ولا عندكم بس المهر هدية تكون للبنت مثل ما تعلمنا من ديننا فلهذا انتو الي تحطوه مقبول منكم
.
.
الحجي: غضب ابني شنو رايك
غضب: 10 حاضر و 10 غايب
محمد: واني موافق
.
.
غضب: باجر راح اجي علمود عقد المحكمة واذا تكون شاهد عالزواج يشرفني هذا الشي
محمد: الي الشرف واعتبرني شاهد عليه من هسا
.
.

ليندا: تونست بجيتهن واخذتهن فريتهن بالبيت وكل ما يشوفن شغلة يسمن بالله واني نفخت ريشاتي وكمت اتفيك وهن يضحكن  علي وكل شوية تكفخني اية على علباتي
.
.
بال 11 اجو محمد وغضب وحسن وحسين والحجي كعدو بالصالون واني اخذت اية ورحنا للمطبخ لان ما يصير تكون ويا محمد بنفس المكان
.
.
اية: ولج صخام صخمج وصخمني
ليندا: وجع شبيج
اية: لج هذا الصاك اخوج واني ماعرف
.
.
ليندا: بابتسامة كبرياء ... اي هذا الصاك اخو هاي الصاكة
اية: دولي هو انتي منيلج الجمال بس شوفي السكر الخارج
ليندا: هههههههه ولج اثكلي خرررب
اية: بربج اخطبيني الو
.
.
ليندا: اخذتها وكعدنا بصفحة خارج المطبخ ونسمع لحجيهم واية تخبلت كل شوية وتكول اخوج حلو واخوج رزن وكلامو شكد حلو ما بقى شي بيه ما وصفتو واني مكضيتها ضحك على خبالها
.
.
بس صدك بعد ما تعرفت عليها عرفت ان كلبها ابيض وبريئة بس الله يسامح فرح وامها هن مخرباتها امها جانت معلمتها عالكسل وفرح سوت خطة وياها حتى ابليس ما يسويها وهي ونرجس من ذيج المرة ما شفتهن اخر مرة اجن جنا ببغداد وماكدرنا نشوفهن
.
.
كاعدين وجانو يحجون اهل غضب ومحمد
محمد: بما انو هسا تصافت الكلوب اسمحولي بدقيقة وارجعلكم
الكل: اخذ راحتك
.
.
طلع محمد واني مستغربة وين رايح اخذلو تقريبا 5 دقايق ورجع ووياه عمي خليل بس يالله من شفتو اقسم بالله شكد جنت فرحانة كلبي انعصر عليه
.
.
وين خليل ذاك الاعرفو ووين هذا الي لحيتو بيضة هو مو جبير هواي بالعمر بس بسبب الهم منتهي نهي من اجيت ذيج المرة لان جنت مستعجلة ما ركزت عليه بس هاي المرة لا
.
.
جنت واكفة وهو من دخل عالبيت ما شافني بقيت واكفة ومركزة عليه بكل خطوة يمشيها رغم على حيلو بس احس عليه جبل من الهموم كوة يمشي بسببو
.
.
دخل عالصالة ورحبو بيه غضب واهلو اندار علمود يكعد  واجت عينو بعيني وصفن بوجهي هم حسو عليه وانتبهو اني واكفة اباوع عليه ودموعي مثل النهر عليه
.
.
تقدم خطوة وحدة علي ورحت ركض عليه مهما صار بيناتنا هذا عمي هذا اخو عماد وهذا ابو فهد هذا الي احتواني اني وعيلتي ببيتو هذا الي بقى ايام ينتظرني اصحى ببغداد كل هاي الافكار اجت ببالي واني اركض عليه
.
.
دفنت نفسي بحظنو وكل الافكر بيه هذا ابد مو خليل هذا عماد هذا سندي واماني هذا الي يخاف علي من الهوا هو الرجال الجبير نزلت دموعو علي واني اريد اسكت ماكدر
.
.
افكر بيه شلون جان وشلون صار حسيت واحد سحبني رفعت راسي وعيوني كلهن دموع جان محمد واكف سحبني على حظنو وسكتني
.
.
غضب لمحتو معصب مادري لان حظنت عمي لو لان دا ابجي بس ما جنت بحالة او موقف يسمحلي اسألو من هديت رجعت على اية شوية ودخلت عمتي هناء سلمت عليها وكوة مسكت نفسي ما ابجي لان ادري بيها هي كلبها خلصان من البجي ومبين عليها هالشي دخلت سلمت عليهم وكعدت ويا ابتسام وام اية
.
.
الحجي: مو انت نفسك خليل الي نعرفو شكد متغير يا خوية
خليل: بحسرة ... شلون تكون حالة الي فقد وحيدو وابوه وامو وعيلة اخوه وفوكها لعب براسو الشيطان ودمر بنت اخوه
.
.
الحجي: هاي ما مرجية منك يعني ليندا تدمرت عندنا
خليل: مو هذا المقصود يشهد الله على كلامي
الحجي: لعد شنو قصدك يا خوية
.
.
خليل: هسا العمارة كلها تعرف ان بنت الشيخ عماد راحت فصلية بسببي
الحجي: حجي الناس ما يخلص واحنا لو نريد نمشي ورا حجيهم جان ما كعدنا وياك لان بعد كم يوم يكولون نسو دم ابنهم
.
.
خليل: اذا تريدون تسوون كعدة ثانية اني جاهز حتى لو تكتلوني بدالو
الحجي: لا يا خوية ابني الله يرحمو خلص عمرو وراح لدار حقو واني اصلا متندم لان اخذت ليندا فصلية لهذا من اجى حسن كال غضب يريد يجي يخطبها من جديد ويسويلها عرس اجيت فورا وياهم
.
.
خليل: بارك الله بيك ... والف مبروك ابني غضب
غضب: الله يبارك بيك ابو فهد
الحجي: احنا هسا نسترخص هم الحجية باقية لحالها بالبيت وإن شاء الله نلتقي غير مرة
.
.
محمد: ليش ما جبتوها وياكم حجي
الحجي: استحى يكول مو راضية كال ... مريضة وتتعب اذا تجي فخليناها ترتاح بالبيت
.
.
ليندا: ترخصو ومشو غضب طلع من يمي وغمزلي ابتسمت على حركتو وراحو وانا رحت يم عمي وعمتي هناء اجى محمد بعد ما مشو وعمي خليل ترخص
.
.
محمد: عمي احسب حسابك من باجر تشيل شكو غرض ببيتك وتجيبو هنا ما اتركك تعيش هناك
خليل: بس ابني
.
.
محمد: عمي مستحيل اترككم انت وعمتي لحالكم والذكريات الي بالبيت ذاك راح تاكلكم اكل فمن باجر شكو شي تحتاجوه جيبوه وتجون تلكون ليندا مجهزتلكم غرفة تاخذون راحتكم بيها
.
.
ليندا: بخباثة ... لا والله هذا من كال انت تنظفها ما دخلني
محمد: هسا خلي يروحون الا املص اذاناتج
ليندا: عمي وعمتي ضحكو على خبالي وراحو ينامون اني رحت عالمطبخ جان اكو ستكانات وكلاصات غسلتهن ورحت سبحت ونمت
.
.
غضب: جنا كاعدين بالمضيف ماجد استرخص وراح ومحمد كال للكهوجي ... توكل لبيتك
محمد: وهسا بما انو صرنا عائلة وحدة نكمل كعدتنا بالبيت
الحجي: لا احنا نتوكل
.
.
محمد: قسم بالله ما تروحون قبل ما استضيفكم ببيتي
الحجي: الله يرحم البطن الحملتك والوالد الرباك
محمد: ويرحم موتاك ... يلا تفضلو للبيت
.
.
غضب: كمنا وياه من وصلنا راحن اية وليندا عالمطبخ شوية وراح محمد جاب عمو خليل اني من شفت ابوي تصالح وياه صالحتو بس انتبهنا عليه صافن على جهة المطبخ
.
.
اندارينا وجانت ليندا واكفة ودموعها تجري ركضت عليه وحظنتو واني اشتعلت من جهة حاظنتو ومن جهة صوت بجيها مرمرني بعدها هداها محمد وراحت وكلام خليل ويا ابوي صدك عصر كلبي على وضعو اني فقدت اخوي انتهيت هو شلون متحمل ماعرف خلصنا تعليلة ورجعنا للبيت
.
.
ليندا: كعدت الصبح سويت ريوك واجى محمد كعد يحجي وياي
محمد: ترا اليوم نروح ويا غضب يعقد بالمحكمة واني راح اكون شاهد
.
.
ليندا: غير تكول من البارحة
محمد: نسيت والله ... ليش عندج شي
ليندا: لا بس جان جهزت نفسي من الصبح
محمد: من تخلصين ريوك تجهزي
ليندا: تمام
.
.
محمد: دخيل الله غضب وحسين وحسن شنو من تربية
ليندا: ليش
محمد: لج واحدهم طاك الشيب براسو ومن اجو لحد ما راحو الكلام كلو لابوهم ما واحد منهم حجى بحظورو
.
.
ليندا: اي كلش يحترموه بس بالبيت مو هيج
محمد: المهم خارج البيت محد يكدر يجيب طاريه بكلمة ذكرني بعماد الله يرحمو
ليندا: شنو هاي شو عماد فد مرة لعد مو ابوك
.
.
محمد: اعذرينا يابة هههههههه
ليندا: ماكو اعذريني الا اسويلك جرة اذن
محمد: ههههههههه وتكدرين تسوينها
ليندا: لا محتاجة عظامي هسا هههههه
.
.
محمد: يابعد اخوج انتي
ليندا: اعرف تفكيري غلط بس ماعتقد اكو مثل عماد
محمد: الله يرحمو المهم هسا يذكرونو بالخير ويدعولو بدل ما يدعون عليه
.
.
ليندا: صح ايمان حجتلي عن كرايبنا الي جبتهم هنا
محمد: اني جنت اعرف راح اهل المقتول يسوون هيج شي لهذا ردت منهم غلطة وهم انطونياها
.
.
ليندا: ما تنلام دلال من تكول انت داهية
محمد: هسا احجيلي ام غضب ليش ما اجت
ليندا: ماعرف
.
.
محمد: سالفة مريضة ما اقتنعت بيها
ليندا: بصراحة هي تكرهني
محمد: ليش
.
.
ليندا: من رحت لليوم ما حبتني بس غضب من شاف ما يفيد وياها اخذني وسكنا لحالنا وكال لحسن حتى لو تصالحو ما نرجع نسكن وياهم
محمد: تمام
.
.
ليندا: خلصنا ريوك وكمت غسلت المواعين واتصلت بغضب
غضب: جنت كاعد هستوني مخلص ريوك اتصلت ليندا
ليندا: الو
غضب: هلا يا بعد شيبي
.
.
ليندا: شلونك يالشايب هههههه
غضب: محترك عليج يولي
ليندا: ايمتى نروح عالمحكمة
غضب: ها ولج مستعجلة
.
.
ليندا: الواحد يتورط يسألك المهم راح اروح اجهز نفسي واذا اجيت قبل ما اكمل ما اروح وياك
غضب: حجي قوي يابة
ليندا: كلش يابة
.
.
غضب: دتعالي افتحي الباب وابن زلمة اليرجعني
ليندا: لااااااا غضب
غضب: هههههههه مو تهددين
ليندا: لا والله ما اعيدها بس خلي اجهز نفسي
.
.
غضب: هههههههه ديلا روحي جهزي نفسج منا لساعة اني يمكم
ليندا: اوف هبطتني يلا باي
غضب: بايات حبي
.
.
ليندا: رحت جهزت نفسي محمد بالمضيف خلصت وانتظرتهم شوية واجى غضب وحسن لان حسن شاهد على زواجنا هو ومحمد ركبنا اني وحسن من ورا ومحمد وغضب من كدام
.
.
اني صايرة ورا محمد غضب فر المراية علي ومن مشينا وهو يحجي ويا محمد ويأشر بعيونو حسن شافني ابتسم وحب يخبث ويا غضب صار بين الكراسي الكدام ويحجي ويا محمد
.
.
حسن: اكلك شيخ محمد
محمد: كول خوية
حسن: شنو رايك بالخباثة
محمد: حس اكو شي ... تخبل
.
.
حسن: هههههههه هاي الي ردت اسمعها
محمد: وهيج بعد احسن ... مد ايدو وفر المراية
غضب: يمعودين ترا زوجتي مو خاطفها هههههه
حسن: هذا الموجود غضب
.
.
غضب: درجع لمكانك لا اكسر ضلوعك ... وفر المراية مرة ثانية ... والي يمد ايدو عالمراية نتخارب
حسن: لا غضب مو مرجية منك تحجي هيج ويا الشيخ محمد
غضب: وكف السيارة ... تعال اليوم اشعل عشيرتك
.
.
ليندا: اريد امسك ضحكتي ماكدر غضب من سمعني اضحك ضحك هو هم ومشى بالسيارة ومحمد وحسن يضحكون على ضحكتنا محمد اندمج وياهم وصلنا نزلو بقينا اني وغضب سحبني من خشمي ويحجي بعصبية
.
.
غضب: هسا اشلع خشمج
ليندا: اييي اني شعلية
غضب: راح امدد اخوج ترا
ليندا: هههههههه انزل عيب الناس
غضب: حظج حلو بس الزمج الا اطلع ضوجة اخوج بيج
.
.
ليندا: نزلنا وكضيتها ابتسامات على مواقفو رحنا وغضب لان ضابط وعندو معارفو كملها بسرعة رجعنا وحسن خلص الطريق تصنيف على غضب ومحمد صف وياه
.
.
حسن: شيخ محمد ترا اني بشاربك هذا غضيبان يهجم بيتي اليوم
محمد: افه يحاجيك واني موجود
غضب: عود يعني اخاف لو شسوي
محمد: ليندا
.
.
ليندا: هذا منو ما يخاف
غضب: انلاصت
حسن: ههههههههههه
محمد: اكلك غضب عندي الكم هدية انت وللوش
.
.
غضب: ما يحتاج تكلف نفسك وجودك ويانا كافي
محمد: تسلم حبيبي بس من زمان جنت مقرر اسوي هالهدية لليندا وزوجها
غضب: وشنو هي
.
.
محمد: بعد العرس تروحون لتركيا مدة شهر ومصاريف الرحلة من طلعتكم من بيتكم لدخلتكم للبيت علي واذا اسمع انكم ماخذين وياكم دينار واحد للوش تنسى عدها اخو وانت تنسى عندك نسيب
.
.
غضب: لا يخوي ما يحتاج تكلف نفسك بدال هالمصاريف نبقى شهر عسل ببيتنا ولحالنا
محمد: كلتلك من زمان مفكر بيها تريد تحرمني من هالشي من اجى وقتو
.
.
غضب: لا يخوي براحتك بس والله ما اريد اكلفك وياي
محمد: مثل ما ليندا اختي هسا انت مو نسيبي انت بمثابة احمد الله يرحمو
.
.
غضب: الله يرحمهم جميعا
محمد: ويرحم موتاك
.
.
ليندا: اعرف غضب ما رضى لان ما يحب ياخذ دينار واحد من احد بس كلام محمد قنعو رغم ان حجى وياه محمد بس من وافق مبين عليه مو حاب هالشي بس ماراد يكسر بخاطر محمد
.
.
وصلنا البيت نزلنا اني ومحمد رحت للبيت سمعت غضب صاح محمد ونزل يحجي وياه وبيدو علاكة سودة تركتهم ودخلت داخل
.
.
غضب: ما حبيت اخذ هدية محمد لان ما احب احد يصرف علي ومو اي مصرف مصرف شهر كامل ورحلة هواي اشياء يعني راح تكون تكلفتهن هواي بس من كال تحرمني من هالشي وافقت واجتني فكرة انو اردها الو من وصلنا نزلت ليندا وصحت محمد
.
.
غضب: اخوي هذا المهر وجبتو وياي لان ماراح اجي هالفترة عندي شغل وصارلي كم يوم ما داومت
محمد: تمام حبيبي
.
.
غضب: اني اترخص
محمد: اكعدو اشربو جاي كهوة
غضب: مو جايين نجربكم وتعرف اشغال واعمال ولازم نتوكل
محمد: لعد براحتك
.
.
غضب وحسن: في امان الله
محمد: في امان الله
.
.
ليندا: دخلت بدلت ملابس الطلعة ونزلت دخل محمد ووياه العلاكة
.
.
محمد: ما اجو عمي وعمتي
ليندا: لا بعد
محمد: اكلج عندنا غرفة بيها سرير نفرين ؟
ليندا: اي فوك وحدة بس لازم انظفها قبل ما يجيبون غراضهم وهسا وقت غدا
.
.
محمد: روحي نظفيها وهسا اوصي على غدا من المطعم ... مشتهية شي محدد
ليندا: لا اي شي تجيبو نعمة الله
محمد: تمام
.
.
ليندا: شنو هذا بايدك
محمد: هذا المهر
ليندا: رحت عليه ومديت ايدي
محمد: شرايدة
.
.
ليندا: انطيني هاي امور متزوجين انت بعدك صغير
محمد: هههههههه انتي شعندج لازكة بهاي السالفة
ليندا: ما اتركها لحد ما ازوجك
.
.
محمد: لعد يابة وعد من هالشارب من ترجعين من تركيا اجي لبيتج اسلم عليج واخليج تخطبيلي تريدين بعد شي
ليندا: ياااااي راح ازوج الشيخ بنفسي
.
.
تركتو وصعدت اركض وهو يضحك على خبالي رحت لبست ملابس شغل واستلمت الغرفة جلف وتنظيف هي بيها غرفة نوم كاملة ومحد مستعملها بقيت انظف بيها للظهر طلعتها تحفة ما خليت بيها ذرة تراب
.
.
طلعت منها ورحت للحمام غسلت وطلعت لكيت محمد جايب غدا من المطعم وعمي وعمتي كاعدين وياه والي عرفتو ان عمتي تريد تصعد تساعدني ومحمد مو مخليها وهمزين مسوي هيج ولهذا رايحة حاطة الاكل بمواعين بدال السفري كعدت وياهم تغدينا وخلصنا
.
.
محمد: عمي شنو تريدون تجيبون من بيتكم
خليل: ما نريد شي ابوك الله يرحمو مو مخلي نقص بالبيت بس نجيب ملابسنا
.
.
محمد: ليندا تعاي جيبي وياج جنطة وتعالي انتي وعمتي جمعن الملابس علمود اجيبهن وانت عمي تريد تبقى تريد تروح للمضيف براحتك
.
.
خليل: اروح للمضيف اكضي وقت احسن
محمد: براحتك عمي
.
.
ليندا: رحت جبت جنطتين احتياط ورحنا اني وعمتي ومحمد من وصلن انطيتو الجنط وكلتلو اريد اخذلي فرة اخير بهذا البيت
.
.
رغم اعرف الذكريات راح تأذيني بس ما صبرت رحت للمطبخ هنا طبخت نور هنا تعاركت ويا دلال هنا حجيت ويا شودييه
.
.
رحت للصالة هنا حجينا هنا كعدت جدتي وهنا كعد جدي هنا تعارك عماد ويا فهد من كال انهي عليها اوووووف يا فهد ماعرف شلون كدرت احب غيرك بس جنت بحاجة لسند وغضب الوحيد الي كدر ينقذني من الواقع الوحشي الي عشتو
.
.
صعدت فوك دخلت لغرفة نور وهديل رجعتلي ذكرياتي وياهن من نحجي ونتعارك من كعدتني عمتي بفاتحة فهد وجيت نمت عند نور سكرت الباب واحس كلبي خلصان بس بعد يا كلبي لسه باقي الجزء الاصعب
.
.
دخلت لغرفة فهد شفت صورتو معلكة عالحايط بيها الخط الاسود عالزاوية وكفت كدامها ولزمتني الشهكة مو كادرة اسيطر اني صرت مرة متزوجة عيب وحرام علي اسوي هيج شي بس مو بايدي اني هم بشر وعندي مشاعري ومو كادرة اسيطر على نفسي
.
.
كلتلو ... انت رحت وبقت بعدك الذكريات صرت لغيرك صح بس ماراح انسى انو جنت جزء كبير من حياتي واكثر شي مريحني انك شهيد وهاي تسوا الدنيا والي بيها
.
.
هاي اخر مرة اشوف بيها صورتك واخر مرة احجي وياك لان اريد اودعك وما اريد اكسب ذنب واعرف بيك انت ما تقبل اكسب ذنب حتى لو علمودك الله يرحمك ويجعلك من اهل الجنة
.
.
انتبهت لنفسي دموعي تجري مثل نهر انداريت لكيت محمد واكف بالباب ولاول مرة اشوف دموعو عرفت انو متأثر بالكلام الي كلتو وفوكها صورة ابن عمو وصديقو كدامو وهو ماكو فتحلي حظنو رحت حظنتو
.
.
..........يتبع
حطولنا ارائكم عنها وتوقعاتكم لان احب اقرا تعليقاتكم وتحليلكم للقصة