عشق طفله

البارت(55) عشق_طفله الكاتب#احمد

#عشق_طفلة
بقلم #احمد
البارت_55
.
.
غضب: ما تصورت بعد تجربتي الفاشلة ممكن احب بنت ثانية جنت اعتبر النسوان شي مو مهم بالحياة بس من التقيت بليندا وبديت اتعود عليها تغيرت افكاري وحبيت طيبتها وبرائتها وحاليا احب كل تفصيل بيها ومستحيل احط عيني على بنت غيرها لان هي عندي تسوا كل البنات
.
.
وبتركيا ما فكرت ارفضلها طلب لان طلباتها اول شي تكون عادية مو مرفوضة ثاني شي اريد اسعدها گد ما اگدر
.
.
ليندا: گضينا احلى ايام حياتنا باسطنبول باليوم الرابع غضب بالصدفة لگى شركة سياحة تاخذ الناس وتفرفرهم باسطنبول على شكل گروبات وسجل بگروب عربي وبخامس يوم رحنا وياهم
.
.
اول يوم رحنا على حديقة محمد الفاتح ومعروفة بحديقة اوتاتبة جانت كلش  حلوة وجانو الشركة ياخذون الگروب للمكان ويخلونهم يوم كامل هناك والمغرب يرجعونهم والاكل بوقت الغدا يجيبون من المطاعم ويتوزع عالسياح الي بالگروب كلهم
.
.
اني تعودت لو اطلع مع غضب نجيب بطل ماي الا اخذ الكامرة وياي مثل الطفل الي ابوه مشتريلو لعبة ومجلب بيها اني هيج حتى غضب يضحك علي يگول ارحميها واني مگضيتها تصوير ومن اصور ما تكفيني صورة وحدة لا لازم ثنين ثلاثة علمود اذا طلعت وحدة مو حلوة احذفها وابقي الزينة
.
.
رجعنا من حديقة اوتاتبة المغرب جهزت عشى واني كلش فرحانة بعد العشى طلعنا تمشينا گدام البحر وبعدها اخذنا تكسي ورحنا على جسر البسفور نزلنا فوگ الجسر وصورنا ورجعنا عالشقة ونمنا
.
.
وثاني يوم رحنا مع الشركة على برج غالطة وثالث يوم على تل العرائس وبعدها ساحل اسكودار وجان قريب منو برج البنت رحنا مشي عليه وخامس يوم رحنا على حدائق فلوريا
.
.
وجان هذا اخر يوم بالجولة بس هال 5 ايام جانن يسون عندي عمر كامل لان فرحت هواي بيهن واكثر شي ريحني هناك ان غضب ما يمنعني من شي اذا ردت اروح لمكان او اصور او اگعد ابد ما يگول لا ومن گد الونسة تمنيت ابقى هناك
.
.
بس بديت اشتاق لمحمد ويوميا نخابرو بالليل هو وحسن نحجي وياهم فيديو وحسن يبقى يصنف على غضب لحد ما نشبع ضحك
.
.
بعد ما خلصت جولتنا ويا الشركة گمنا نتصل كل يوم على صديق محمد ونسألو عن اماكن حلوة وهو ينطينا الاسم ونروح لحالنا عليه
.
.
مرة من المرات رحنا لساحل البحر انطيت الكامرة لغضب ونزعت حذائي ورحت على طرف الماي ومن وصلت الموجة لرجلي اخذت ماي بايدي وزتيتو فوگ وبنفس اللحظة غضب صورني بدون ما انتبهلو
.
.
طلعت الصورة حلوة بشكل مو طبيعي الماي مثل المطر صاير واني اضحك وغمازتي اليمين مبينة بالصورة طلعت فدشي كلش حلو
.
.
بعدها فتحت اديني وصورني صورة ثانية وكل صورة اروح اركض عليه اشوفها وهو يضحك على حركاتي وجنت كل ما احجي ويا محمد ادزلو صورنا وهو يگول تيلفوني صار بس لليندا وصورها باليوم العاشر اتصلنا على حسن فيديو
.
.
حسن: اوهووو ياخي ماعدكم شغل غيري شبيكم ما شايفين
ليندا: هاي شبيك فوگ ما نحجي وياك ونتطمن على اوضاعك
حسن: هاج حجية احجي وياها واني اعرفج تموتين على ليندا
ليندا: وينها
.
.
حسن: دا تقرا قران صارت ملاية بروسنا
لينذا: ههههههه محد يخلص من لسانك انت
غضب: يول خايس ايمتى تعقل
.
.
حسن: من تحترميني
غضب: لعد ايس
حسن: هو اي مأيس
.
.
ليندا: وين اية
حسن: بغرفتها
ليندا وديلها التيلفون
.
.
راح على غرفة اية گال اسمعي اسمعي دا تغني فتح الباب على كيفو جانت حاطة سماعات بأذنها ومشغلة ساجدة عبيد وتغني وياها وترگص وظهرها للباب
.
.
حسن فتح شوية من الباب وحط الكامرة عليها من شفناها اني وغضب حتى بطونا گامت توجعنا من الضحك غضب گام يگح اني ماسكة بطني واضحك على منظرها
.
.
اندارت وشافت حسن بوجها هي صيحة وهي فزة وهي هزيمة راحت ركض للفراش وغطت نفسها من الفشلة
.
.
حسن: اطلعي اطلعي ثنينهم شافوج
اية: لااااا حسن ليش هيج
حسن: اطلعي ولج للوش تريد تحجي وياج
ليندا: ولج اية لحگي شلون اكو فد شباب اتراك يخبلون
.
.
طلعت راسها وگالت .. صدك غضب جان متمدد وراي من جبت طاري الشباب الاتراك گام على حيلو اني اخذت التيلفون وطفرت وهو ركض وراي واية وحسن يضحكون علينا
.
.
غضب: تعاي ولج منو يخبلون
ليندا: الاتراك جنهم حلقوم العافية
غضب: لج تعاااااااي
ليندا: والله ولا اجي
.
.
وگفت عند الباب الخارجي گلتلو وربي اذا تقدمت اطلع من الشقة بملابس البيت .. واني ميتة ضحك
غضب: اطلعي وشوفي شيصير بيج
.
.
ليندا: تقدم علي فتحت الباب طلع مقفول انداريت وصار بوجهي مسك التيلفون من ايدي وقفلو
.
.
غضب: اي يابة الاتراك جنهم شنو ؟
ليندا: شنو يعني اترك
.
.
غضب: حطيت اديني يمينها ويسارها وحصرتها رغم الموقف جان شقى بس من سويت هيج احسها ضاعت دنگت عليها واخذت بوسة الا اختنگت
.
.
ليندا: كافي غضب ما حجيت ويا اية
غضب: ضحكت على موقفها .. هاج اتصلي
ليندا: اخذت التيلفون ورجعت اتصلت على حسن
.
.
حسن: ها يابة فوز لو خسارة
ليندا: افه عليك اني اخسر
اية: عمي اكو شغلة على حلگك
.
.
ليندا: اخذ مراية شاف وجهو طلع حمرة مني صايرة عليه
غضب: غضب الله على هالمكياج
حسن: افه عليك غضب اتركك 10 ايام تروح تحط حمرة
.
.
اية: هههههه وربي الا يذبحك لو عندو
حسن: انجبي خليني اخذ راحتي
غضب: لك زمال مو راح ارجع
.
.
حسن: تدري بجيتني على وضعك ليندا عود احسبي حسابو مرة ثانية بالمكياج
ليندا: هههههههههه وربي الا تجلطو
حسن: لا هو يعرفني كلش زين
.
.
غضب: اگلك امك رحتولها
حسن: يا ام
غضب: احجي عدل ولك
.
.
حسن: اعذرني عمي بس اني ماعندي ام
اية: الام الي تقتل شخص وتريد تعيش اولادها بالحرام هاي مو ام
غضب: هي مشكلتها وياي انتو شدخلكم بيناتنا
.
.
حسن: عمي قسم بالله اذا گلتلي روحلها مرة ثانية ما احجي وياك بحياتي كلها
غضب: وانتي اية
.
.
اية: والله يا عمي اني رايي من راي حسن اني اگول الله يسامحها بس مستحيل اروحلها اذا نسامحها هم ترجع تسويلها مصيبة ثانية لهذا خليها هيج
.
.
غضب: لعد براحتكم
ليندا: حسن ايمتى تتزوج ذيج الوحدة
حسن: عن قريب إن شاء الله
.
.
غضب: انتي هم تعرفيها
ليندا: افه عليك اذا اني ما اعرفها لعد منو يعرفها
غضب: ولك نعال اني من تصوبت ما حجيتلي وهاي حجيتلها كلشي
.
.
حسن: لا والله يا غضوبي زوجتك هي لحالها عرفت
غضب: نعلة على يومك
ليندا: حسن عود تعالو هنا وربي المكان عبارة عن جنة شگد مو حلو
.
.
حسن: إن شاء الله المهم بيه حلوات
ليندا: علمود تنشنق اذا باوعت يمين لو يسار
حسن: ههههههه لا يابة لعد بطلت اروح للسودان شهر عسل
.
.
ليندا: ههههههه خوش اختيار
حسن: يلا يابة تصبحون على خير غضب راح ينام
ليندا: وانت بالف خير
.
.
سكرت منو رحت بحضن غضب لحيتو مو محلقها من العرس وطالعة بس قصيرة كلش مشيت اصبعي على وهو صافن بعيوني
.
.
غضب: شلون راح اصبر بدونج من ارجع للدوام
ليندا: اتركو خلص ماكو داعي تكمل
غضب: ما اريد اتركو واگعد بالبيت مثل النسوان
.
.
ليندا: مو الا تگعد بالبيت بس المهم ان ايمتى ما تريد تروح وايمتى ما تريد ترجع ما تتقيد بالدوام
غضب: الله كريم بس اكو كم شغلة ببالي اكملهن ويجوز بعدها اترك
.
.
ليندا: شنو هن
غضب: بعدين تعرفين وهسا خلي نتكاثر
ليندا: ههههههه ما تبطل سوالفك
.
.
گعدنا ثاني يوم ورا الريوگ جنا نريد نطلع واجى اتصال على غضب اسمعو يگول .. اي فرصة واجتنا دير بالك تفوتها .. خلص اتصالو واجى
.
.
ليندا: اكو شي
غضب: لا حبيبي بس اكو محلات عند المول اصحابهن يريدون يبيعوهن وگايلين اذا تريدونهن تفيدكم مساحتهن للمول
ليندا: ايوا وانت راح تاخذهن
غضب: شي اكيد يلا خلي نطلع
.
.
ليندا: طلعنا ورحنا للسوگ اسمو گراند بازار (البازار الكبير) جان فعليا عبارة عن سوق ضخم بكل معنى الكلمة شگد ما تمشي ما تخلص صاير افرع وبكل فرع محلات يمين ويسار
.
.
ما جنا مقررين نشتري شي مجرد نستكشف واتفقنا قبل ما نرجع نشتري شكو شي ببالنا اخذت صور لغضب بالسوگ وهو صورني
.
.
والناس عندهم هالشي طبيعي يعني لو تگضيها تصوير من الصبح لليل محد ينتبهلك گضينا يومنا بالسوق وغضب يمكن كسر الرقم القياسي لاكثر رجل يبقى بالسوگ مع زوجتو هههههههه
.
.
من الصبح لقبل الاذان بشوية طلعنا منو ورجعنا عالشقة وجبنا عشى ويانا لان ماگدر اسوي من التعب من وصلنا تعشينا ونمنا ثاني يوم اخذنا استراحة وبقينا بالشقة
.
.
گضيناها سوالف وضحك وما تخلى من خباثات غضب طبعا واليوم البعدو رحنا على سوق شارع بغداد الاسيوية عبارة عن سوق للالبسة والاحذية ومستحظرات التجميل ومعروف باسطنبول وما گدرت اقاوم المنظر وما اشتري
.
.
اخذت فساتين بالوان مختلفة بس كلهن مستورات وحسبت حساب اية وياي واخذت لابتسام وللحجية واشتريت مكياج من كل الانواع ما خليت شي ما اخذتو
.
.
وغضب شغلتو يدفع حساب ويشيل الغراض ويگلي ..محمد راح يعلن افلاسو قبل ما نرجع رجعنا بالليل للشقة غضب منتهي من التعب لان گضاها بس يشيل بالغراض بالبداية ومن صارن هواي شلت اني هم وياه
.
.
صحيح جانت اللغة صعبة علينا بس بسبب كثرة العرب هناك هواي من اهل المحلات متعلمين عربي صحيح لهجتهم ضعيفة بس يمشون امورهم ويا المشتري
.
.
من رجعنا هم اتصلنا على حسن واية وسولفنا وياهم وبعدها على محمد واليوم الي بعدو غضب اخذني على سوق اسمو شارع فوزي باشا جان عبارة عن سوق للمحجبات
.
.
اخذت حجابات منو واكسسورات وجبب يعني كم شغلة عجبني اخذتهن وبالنسبة للاسواق او الاماكن السياحية ما جنا نعرفهن لا اني ولا غضب بس جنا اما نتصل على صديق محمد او نطلع عالفيس او اليوتيوب والمكان الي يعجبنا نروحلو
.
.
ومرات اذا ما حبينا نبتعد نطلع نتمشى قريب من الشقة وجنا نشوف هواي متزوجين جدد يجون بالمنطقة الي احنا بيها لان حلوة وتستاهل يقضون بيها شهر العسل
.
.
وبصراحة اني اعتبر روحتنا يوم عسل مو شهر لان بسرعة خلص لان گضيناها نستكشف الاماكن السياحية والاسواق فما نحس باليوم الا هو مخلص
.
.
وطبعا طلعتنا ما تخلى من نظرة لغضب واني اشتعل بالغيرة او نظرة الي وغضب يصير احمر من العصبية بس نحاول نمسك اعصابنا وما نخرب طلعتنا
.
.
بدا يزيد شوقنا ل اهلنا رغم عايشين بظروف ماكو انسان ما يحلم بيها بس هم تعتبر غربة واكيد الگلوب تحن لغواليها صارلنا 25 يوم ب اسطنبول
.
.
رحنا مرة ثانية لسوق گراند بازار اخذنا هدايا للكل ورجعنا للشقى الضهر تغدينا ورحنا لسوق شارع بغداد الاسيوية اخذنا ملابس لغضب وهدايا لعمتي هناء ووعمي ومحمد
.
.
بس اكيد محمد يختلف لان هو الي فكرلنا بالسفرة اخذتلو ساعة وقاط اسود مع قميص ابيض وعطورات 2 واخذتلو بنطلونات وقميصين واحد اسود وواحد رصاصي على لون البنطلونات
.
.
رغم هو صار اكثر لبسو دشاديش بس ما لگيت دشاديش وعجبني ذني الملابس واخذتهن وطبعا اكيد ما نسيت البنات كل وحدة اخذتلها شال وعلبة مكياج 
.
.
واشترينا جنطة للملابس الي ويانا وجنطة للملابس الي بالبيت صار وقت العشى واحنا بالسوك رحنا لمطعم تعشينا بيه ورجعنا للشقة باقيلنا 4 ايام ونرجع
.
.
وبصراحة لو على كيفي هال 4 ايام ما ابقى ولا ثانية بالشقة بس من التعب بالليل ما اكدر حتى امشي يا دوب اسبح واروح اتمدد بحضن غضب ونحجي مع حسن ومحمد شوية وننام
.
.
مشت ال 4 ايام بسرعة مثل القبلهن جانت طيارتنا يوم الجمعة هم الساعة 10 الصبح وصلنا بغداد بال 4:30 سيارة غضب جانت عند صديقو الي اجرلنا الشقة من جنت اروح للدكتورة النفسية
.
.
اتصل عليه غضب اول ما وصلنا وجابها حملنا الجنط ورحنا للفندق لان تعبانين وما بينا حيل نروح للعمارة وبالاخص غضب لان هو الي راح يسوق
.
.
قضينا ليلتنا بالفندق وثاني يوم من الصبح رحنا للعمارة جنا فرحانين لان راح نشوف اهلنا وزعلانين لان خلص شهر العسل بس غضب گالي راح نكررها من يصير بيدي مجال
.
.
وصلنا بيتنا لگينا الكل منتظرنا اهل غضب واهلي سلمنا عليهم واحد واحد
.
.
غضب: حسن نزل الجنط الي بالسيارة
حسن: اي مو حسن يشتغل عند الوالد
محمد: حسن نزل الجنط الي بالسيارة
حسن: تدلل شيخ محمد من عيوني
.
.
غضب: لا يا ساقط يا خايس
حسن: ليش انت منو يمشي بكلامك
غضب: ليندا تمشي بكلامي
.
.
ليندا: احم
غضب: اقصد تمشي برجلينها
حسن: ههههههههه لج عاشت ليندا القوية
.
.
ليندا: لعد شعبالك يابة غير اخت محمد
حسن: دروحي انتي ومحمد ثنينكم ما تهزون شعرة من راسي
محمد: افه هاي علي حسن
.
.
حسن: اي يابة عليك ما تهز شعرة من راسي تهزني كلي
غضب: ههههههههه حيل بيك
.
.
ليندا: بقو عندنا شوية وراحو علمود يتركونا نرتاح اني دخلت للحمام اسبح وغضب راح سكر الباب وراهم من خلصت جففت شعري ورجعت تمددت بحضن غضب
.
.
سحب شعري من ورا كتفي ورجع مثل قبل غطاني بيه وصاير طويل وبالعرس قصيتو لنهاية ظهري گالي مرة ثانية خلي حد شعرج لركبج اقل ممنوع
.
.
ليندا: يتعبني وراسي يصير ثگيل بسببو
غضب: بس اني احبو واريدو دائما طويل
ليندا: امممممم افكر بالموضوع
.
.
غضب: لا تگولين اممم وتحرگين اعصابي
ليندا: اممممم…… قاطعني ببوسة ووووووو
.
.
غضب: گضينا احلى ايام عمرنا باسطنبول بصراحة جانت تجربة من العمر وهناك ما خليت ليندا تتقيد بالعبأة او الجبة مجرد ان يكون لبسها مستور ومو حصر كافي
.
.
وهي تعرف هالشي فما تجادل او تعاند من نريد نطلع تكون ملابسها عريضة لدرجة انو حلوة عليها بس مو مبينة تفاصيل جسمها وهذا الي اريدو اني
.
.
خليتها تزور الاماكن السياحية والاسواق ويوم عن يوم تزيد فرحتها وكل ما نروح لمكان ما تطلع منو باقل من 100 صورة بحيث تيلفونها صار مجرد اللبوم للصور واني ما اعارضها
.
.
خليتها توثق الشهر كلو بالصور والشي الحلو بيها جانت ما تعارض من ناحية حقوقي حتى لو تكون تعبانة وبنفس الوقت تبقى خجولة كل ما اگول راح تتعود ويروح منها الخجل اشوف الخجل يزيد عندها وهذا الشي يخليني ما اصبر عنها وفوگها اني محروم صار سنين يعني غرگان ولگالو نفس
.
.
من رجعنا گلتلها .. راح نكررها بس ايمتى ماعرف لان لازم ابقى بدون دوام اكثر من شهر وهم صعبة وبنفس الوقت يجوز اغير رايي ونروح لغير مكان بس لوقتها الله كريم
.
.
من رجعنا فرحنا باهلنا وهم فرحو بينا دوامي جنت ماخذ شهر اجازة وبعد الشهر متفق مع اصدقائي يغطون عني الا اذا صار امر ضروري او طلبو مني احقق مع شخص بهاي الحالة لازم اروح
.
.
اصدقائي الضباط جبتلهم كل واحد ساعة وعطر وگلت من اروحلهم او يجوني انطيهم اول يوم راحو اهلي واهل ليندا بسرعة لان تعبانين وخلونا نرتاح بالليل تعشينا وخلصنا عشى واخذنا هدايا اهلي ورحنا الهم
.
.
ليندا: رحنا على اهل غضب ويانا الهدايا الي جبناهن من تركيا ومتحمسة اشوف ردة فعل اية عالفستان الي جبتو الها لان جان كلش حلو ونازك ابيض ومطرز بذهبي
.
.
من وصلنا خليت هدايا اية بالسيارة وردت اسوي بيها مقلب بعد السلام بدا غضب يوزع الهدايا عليهم من خلص اية بقت صافنة
.
.
غضب: ليندا وين هدية اية
ليندا: يوووو نسيت اشتريلها على اساس من نروح للسوگ مرة ثانية والتهينا بملابسك انت والشباب ونسيتها
.
.
اية: بزعل .. عادي عمي مو مشكلة
غضب: بربج ليندا هاي سالفة يعني حتى صديقاتج اخذتيلهن واية ناسيتها
ليندا: شمعرفني يا غضب غير نسيت ترا اني هم انسانة مو حاسبة وما انسى
.
.
شفت اية زعلت وگامت صعدت فوگ ضحكت على ردة فعلها ورحنا اني وحسن خليتو يدخلي الهدايا واخذتهن ورحت عليها فتحت الباب لگيتها گاعدة عالسرير وتبجي من كل عقلها وحاطة راسها بين رجلينها فتحت الفستان وگلتلها
.
.
ليندا: يا بوية شگد حلو هذا الفستان
رفعت راسها هي ضحكة وهي بجية واجت تركض وحضنتني وتخبلت عليه طلعتلها اكسسوارات وياه وعطر وشال وجبة وعلبة مكياج وكل ما تشوف وحدة تضحك واني اضحك لفرحتها بيهن
.
.
اية: يا خبيثة وتكولين ما جبتلها
ليندا: جا شجاني تخبلت وانساج
اية: لج وربي يخبل الفستان ذوقج رهيب
.
.
ليندا: لعد شوفينياه راحت لبستو بغرفة غضب القديمة واجت طلع عليها يخبل وهي مشاء الله مو قاصرة بالجمال جانت مخربتها اخلاقها قبل ونفسيتها وكسلها
.
.
بس بالفترة الاخيرة تغيرت تغير جذري عرفت شنو الصح وشنو الغلط لهذا تحسنت اخلاقها وتعاملها مع الحواليها ومن احد يصخرها تتصخر مو مثل قبل رجعت بدلت ملابسها وشالت كلشي ونزلنا تحت نكمل السهرة وياهم
.
.
غضب: ها ولج ام دميعة اكيد جنتي تبجين
اية: والله مرتك يرادلها كتلة
غضب: افه هاي جابتلج هدايا وهيج
.
.
ليندا: شفت غضب انوب ما اجيبلها
غضب: تدرين اول وحدة اخذتلها هدية هو انتي
.
.
ليندا: جانت گاعدة على يساري من كال هيج غضب حضنتني وگالت..  ياعمرييييييي ضحكنا كلنا على موقفها وتشكرونا كلهم على الهدايا ابتسام استقرت ببيت اهل غضب واني وغضب استقرينا ببيتنا
.
.
غضب: حسن شرايك تجي تسكن عندي وهم تبقى عند ليندا بدوامي
حسن: والله يا عمي اني اگول لو تبقون لحالكم احسن هم تاخذون راحتكم
.
.
ليندا: لا حسن تعال لان من يداوم غضب اني اتورط لحالي ومو حلوة كل يوم ابات بمكان واتبهدل وحتى من تتزوج تبقى ويانا
الحجي: اي حسن حجيهم صح وليندا مثل اية واني وحسين هنا
.
.
حسن: لعد مثل ما تريدون
غضب: لعد من باجر تنقل غراضك وتاخذ غرفة ابتسام واذا مو عاجبتك غرفة النوم غيرها على راحتك
.
.
حسن: راح اجيبها هنا بغرفتي واخذ غرفتي هناك لان لونها بناتي
غضب: على راحتك يلا احنا نسترخص ونجيكم إن شاء الله بغير يوم تصبحون على خير
الكل: وانتو بالف خير وهلا بيكم دائما
.
.
……… يتبع
غضب يگول خلو تعليقاتكم ولايكاتكم تتكاثر 😹😹😹
حطولنا ارائكم وتعليقاتكم عالقصة وتوقعولنا شراح يصير بالبارت الجاي