عشق طفله

البارت(53)عشق_طفله الكاتب#احمد

لايك خفيف لطيف يشجعني اكمل
#عشق_طفلة
بقلم #احمد
البارت_53
.
.
غضب: حسن عبالو الشغلة بالتهور بس هذا الغلط ممكن يكون سبب بموتو لهذا ما خليتو يتهور وهسا لازم يكون الوضع هادئ حاولت افكر بالموضوع واوصل لنتيجة واضحة وماگدرت ماكو اي دليل ضد اي واحد من الي توقعتهم بس كلشي راح ينكشف مع الوقت وساعتها بس الله يعلم شراح اسوي بيه
.
.
الا اخلي كل دمعة نزلت من عيون ليندا تحرگو حرگ وتخليه يتمنى الموت وماطول محمد وياي فاكيد راح اوگعو بسهولة وبدون ما يتأذة احد من الي احبهم
.
.
ليندا: تمشي الايام وغضب لا اتصال ولا جية وگطعت نفسي بعد تركني وحقق طلب امو بس معقولة يا غضب هنت عليك لهاي الدرجة لعد وين حبك واهتمامك وين الي كل ما احجي وياه يگول ميت شوق عليج وين الي يگول ما اعوفج لو اموت شو عفتني قبل ما افرح بيك
.
.
كلامي صار كلش قليل ارد على گد السؤال وبس .. اجن البنات عندي وحاولن يغيرن من نفسيتي وماكو فايدة اكلي قليل محمد يحاول يواسيني ويفهمني انو سوا هيج لصالحي بس شنو يقنع گلبي بس صابرة لان مالي غير الصبر
.
.
غضب: من راح محمد حسن گلي اهلي جايين بالطريق ومن وصلو امي جانت وياهم وما قبلت اشوفها ابد صحيح تصرفي ممكن يكون غلط بحقها بس لازم تعرف غلطها اذا اسامحها ما تخليني ارتاح
.
.
بقو شوية عندي وراحو ودائما يتصلون ويتطمنون علي واجو اكثر من مرة وبكل مرة يجون ما استقبل امي ورا شهر صرت كلش زين واگدر امشي واروح وارجع وصار الوقت علمود ننهي الموضوع اني ومحمد گلت لحسن يتجهز واتصلت على محمد
.
.
محمد: هلا ابو عذاب
غضب: راح اجيك وننهي الموضوع
محمد: شوف راح انطيك عنوان تروح عليه ومن توصل تنطي سيارتك لعمي خليل وتاخذ سيارتو وبعدها انتظر مني اتصال
.
.
غضب: وليش نتبادل السيارات
محمد: سوي مثل ما گلتلك
غضب: تمام
محمد: من توصل خابرني
غضب: تمام
.
.
سكرت منو ودزلي العنوان باطراف العمارة رحت عليه جان خان مال غنم دخلت عليه وسكرو الباب
.
.
خليل: حياكم الله
غضب: والگايل
خليل: اني راح اخذ سيارتكم وانتو اخذو هاي السيارة واتصلو على محمد قبل ماتطلعون
غضب: تمام
.
.
راح خليل واخذ السيارة بس اني مو مفتهم شي رحنا اني وحسن ركبنا بسيارتو واتصلت بمحمد

.
.
محمد: وين صرت
غضب: هسااني بالخان بسيارة عمك
محمد: انتظر فد خمس دقايق واطلع
.
.
غضب: وين اطلع
محمد: هسا يوصلك العنوان برسالة
غضب: تمام
.
.
شوية ووصلني العنوان بس هالمرة خارج العمارة بمسافة انطلقت عليه من وصلت جان اكو بستان جبير وبالنص بيت ضخم وبيه شباب مسلحين ومحمد واگف ينتظرنا
.
.
فتحولنا الباب ودخلنا اني وحسن وسكرو الباب ونزلنا سلمنا على محمد وگال الحگوني رحنا وياه نزلنا بسرداب شفنا شباب ثنين بيه گاعدين يسولفون من شافونا سكتو وگامو
.
.
محمد: ها إن شاء الله عاجبكم الوضع
الشاب: انت وعدتنا
محمد: واني عندي كلمتي
غضب: شنو الموضوع فهمني
.
.
محمد: اگعدو علمود نحجي
غضب: وهاي گعدنا
محمد: تفضل احجي للصوبتو كلشي تعرفو
.
.
الشاب: اني الي صوبتك بس اني سويت هيج علمود فلوس مو اكثر
غضب: فلوس ؟
.
.
الشاب: اي فلوس اجاني طلب عالفيس من شخص ما ذكر اسمو وگالي اكو شخص انطاني اسمك وگالي تكدر تفيدني بوضوع ومن سألتو گال اريدك تقتل شخص وانطيك شگد ما تريد وجان هالشخص انت اكيد
.
.
وگاللنا .. هددوه بالشغل بالبداية وهو اكيد ماراح يتركو ومن تقتلوه عبالهم احد من السجنهم او عذبهم ومحد يعرف شي وانت تاخذ الفلوس وينسد الموضوع
.
.
غضب: كمل
الشاب: اخذت معلوماتك بس من عرفت شغلك وشفتك عرفت ماراح اگدر اسوي هالشي لحالي لهذا استعانيت بهذا الشخص وويانا بعد ثنين وجنا ناطرين منك غلطة علمود نقتلك
.
.
بس وجودك بالمقر زاد الصعوبة علينا لهذا قررنا ننتظر ومن طلعت خارج العمارة جانو جماعتي وراك وانت مو منتبه ومن وگفت انطوني عنوانك وطلعو بوجهم علمود ما تحس بيهم
.
.
ومن اجيتك ضربتك طلقة مسدس وجان بيه كاتم لهذا ما سمعت صوت الطلقة بس الي تعجبت منو انت ولا تأثرت ركبت سيارتك ومشيت حتى هذا صاحبي گال ما صبتو
.
.
واحنا دا نحجي حاوطنا محمد والشباب الوياه واخذونا وجابنا هنا ووعدنا اذا حجينالك القصة ما يأذينا لا احنا ولا اصدقائنا الي ويانا
.
.
غضب: والي حجى وياك بالفيس منو
الشاب: ماعرف بس الي اعرفو يريدك تموت
غضب: شلون ما تعرفو ووثقت بكلامو
.
.
الشاب: لان الفلوس موجودات بمكتب وباسمي بس گايل لصاحب المكتب ما ينطي الفلوس اذا ما يخابرو
غضب: اصدقائك وين
.
.
الشاب: اصدقائي دا يدورون احد يخطفوه علمود يكون رهينة ويبدلوه بينا
غضب: وصاحب الحساب
الشاب: دا احجي وياه طبيعي علمود ما يعرف احنا محبوسين هنا
.
.
غضب: اخذت معلومات اصدقائهم وعنوان المكتب وطلعت حسن اجى وياي رحت للمكتب وجان ماكو احد بس صاحب المكتب
.
.
غضب: السلام عليكم
صاحب المكتب: عليكم السلام تفضل
غضب: يزيد فضلك اريد اسأل عن فلوس باسم (……) موجودات عندك
.
.
ص•المكتب: اي موجودات
غضب: شگد ومنو وصلهن الك
ص•المكتب: اعذرني ماگدر انطيك معلومة
غضب: طلعتلو هويتي العسكرية
.
.
ص•المكتب: واذا يعني هذا ما ينطيك حق تسأل هيج اسألة
غضب: شوف اني تصوبت قبل شهر وذني الفلوس جانن مقابل قتلي فيا اما تحجي يا اما تعتبر شريك بالجريمة
.
.
ص•المكتب: وجهو اصفر .. لا احجي قبل شهر وشوية اجت مرة مبوشة انطتني ذني الفلوس وگالت ذني امانة عندك بس لا تنطيهن اذا ما اتصل عليك واگلك
غضب: انطيني رقمها
.
.
ص•المكتب: ما اخذتو والله هي اخذت رقمي وراحت واني لو اعرف مقابل قتل شخص مستحيل استقبلهن
غضب: تمام بس اذا عرفت ان حجيك مو صحيح او الك يد بالموضوع ترا ما ارحمك
.
.
ص•المكتب: الله وكيلك ما جذبت بحرف
غضب: شگد جان المبلغ
ص•المكتب: 10 ملايين
.
.
غضب: طلعت منو رجعت لمحمد گلتلو الي وصلت الفلوس للمكتب مرة مبوشة وماكو اي دليل عليها حتى رقمها مو ماخذو صاحب المكتب
.
.
محمد: والحل
غضب: اني اشوف نمسك اصدقائهم بالبداية
محمد: تمام ايمتى نمسكهم
غضب: ماعرف .. دگ تيلفون محمد
.
.
محمد: هلا عمي
خليل: شصار وياكم
محمد: بعد ليش اكو شي
.
.
خليل: ترا اكو سيارة جانت تلحگني ومن وصلت المضيف رجعت
محمد: تمام عمي
غضب: شكو
.
.
محمد: حجيهم صحيح اصدقائهم جانو يراقبون عمي ومن شافوه بسيارتك عرفو انها خطة وان احنا نعرف بوجودهم لهذا راح يتركون المراقبة ولازم نوگعهم واحد واحد
.
.
غضب: وايمتى نمسكهم
محمد: لازم اليوم
حسن: شلون
محمد: راح نراقب بيوتهم ونمسكهم
.
.
حسن: بس لا تنسى انهم يعرفونا وبيها خطر واحتمال وياهم اسلحة
محمد: حاسب حسابي
.
.
حسن: شلون
محمد: راح يجي ماجد هسا هو بالطريق وهو يتكفل بهاي الشغلة
.
.
غضب: اجى ماجد واتفقنا ورحنا اني وحسن ومحمد وماجد رحنا راقبنا بيت واحد منهم المغرب شفناهم اجو بالسيارة نزل واحد منهم والثاني راح بالسيارة
.
.
راح ماجد يمشي طبيعي على اساس مجرد شخص يمشي بالشارع والولد منطي ظهرو للشارع ودا يفتح الباب وركض عليه ماجد وحط السلاح براسو وسحبو واخذناه ووديناه عند اصدقائو
.
.
رجعنا عالثاني جان وقت صلاة العشاء سألنا عن بيت معروف بالمنطقة وانطونا اسم واحد وراح ماجد دك الباب على بيت الولد من طلع سألو عن بيت ابو فلان وكالو .. بلكي تجي وياي تدليني واكون ممنونك
.
.
طلع يمشي ويا ماجد بس يتلفت احنا صايرين براس الفرع وخاتلين من وصلو لراس الفرع هجمنا عليه كلنا ومسكناه واخذناه على اصدقائو
.
.
محمد: وهسا بقى صاحب الحساب
غضب: افه عليك هذا اسهل واحد
محمد: شلون
غضب: ناظم صديقي يشتغل بالبرمجة ويگدر يطلعلي الموقع
محمد: حلو لعد انطيه الحساب
.
.
غضب: اتصلت على ناظم وگلتلو اكو شخص اريدك تطلعلي موقعو لان اتفق ويا ناس وحاول يقتلني بس ربك ستر وبس تصاوبت
.
.
ناظم: كل عقلك ايمتى تصاوبت
غضب: قبل شهر والله بس بسبب الوضع الي اني بيه ما خبرت احد
ناظم: افه عليك يصير بيك كل هالشي واني ماعرف
.
.
غضب: حقك يخوي بس الله وكيلك ما انطيت خبر بس لاصدقائي الي بالشغل
ناظم: وين انت هسا قريب علي
غضب: ليش
.
.
ناظم: گلت تاخذني للمحل لان كل الحاسبات هناك
غضب: لعد اجلها لباجر الصبح
ناظم: اذا مستعجل عادي اروحلو حتى لو مشي
.
.
غضب: لا يخوي لباجر الله كريم
ناظم: تمام باجر الصبح تعال وجيب الحساب وياك وتدلل
غضب: تمام تصبح على خير يخوي
ناظم: وانت بخير
.
.
محمد: لباجر مو
غضب: اي واني وحسن لازم نروح زوجتي لحالها بالبيت
محمد: توكل يخوي
.
.
غضب: تجي ويانا نوصلك بطريقنا
محمد: لا حبيبي ابقى هنا اني بيت كامل ومابيه نقص
غضب: يلا لعد تصبح على خير
محمد: وانت بالف خير
.
.
ليندا: گعدت الصبح محمد ماكو سألت عمتي گالت عندهم فصل ويا عشيرة ويتأخرون انتظرت للظهر وماكو اتصلت عليه مغلق بدا الشك عندي
.
.
رجعت اتصلت اكثر من مرة واخيرا حصلتو رد علي بس مستعجل گال اني بفصل ومايصير احجي بس اخلص ارجع سكرت منو وحمدت الله انو بخير
.
.
حسيت نفسي جوعانة لان ما تغديت رحت حطيتلي اكل عمي رايح ويا محمد وعمتي بغرفتها تقرا قران بوقت فراغها اني من خلصت غدا دخلت لليوتيوب ما حسيت على نفسي الا الدنيا مغرب
.
.
اجى عمي بس محمد مو وياه سألتو گال صار عندو شغل ويتأخر رحت حطيت عشى ونزلت عمتي وتعشينا بدون محمد
.
.
حياتي احسها فارغة ما بيها اي شي حلو هو جان غضب مالي علي الدنيا كلها وهسا راح .. قبل النوم اتصلت على محمد گالي طالع هو وماجد وجماعتهم يتونسون قريب من الاهوار ويبات هناك وسكرت منو ونمت
.
.
غضب: گعدت ثاني يوم تريگت واريد اطلع ولزك حسن الا يجي وياي رحنا اخذنا ناظم من الببت للمحل تيلفون الولد الي يراسل بيه صاحب الحساب اخذتو وياي
.
.
فتحت الفيس طلع الحساب متصل انطيتو لناظم ومثل المرة الماضية شوية وطلعلي الموقع وكتبلي العنوان بورقة اخذتو شفتو احس عقلي طار
.
.
ناظم: شبيك ابو عذاب
غضب: اا .. انت .. متأكد .... لساني احسو گوة يتحرك
ناظم: اي بس گلي شبيك
حسن: شبيك عمي
.
.
غضب: تركتهم وطلعت خارج المحل احس اختنگت اريد نفس ماكو راسي يوجعني وجع مو طبيعي اجو يحجون وياي خشمي گام يصب دم مثل البوري بعدها فقدت الوعي
.
.
محمد: ها حسن وين صرتو
حسن: بالمستشفى
محمد: خير شصاير
حسن: عمي فقد الوعي
محمد: ليش
.
.
حسن: والله يخوي ماعرف شو من اخذ عنوان صاحب الفيس تخربطت اوضاعو وخشمو طگ دم واخذناه للمستشفى
.
.
محمد: العنوان لمنو
حسن: ماعرف والله يخوي انخبصت بيه وماعرف حتى ورقة العنوان وين صارت
محمد: تمام جايك
.
.
ليندا: گعدت ثاني يوم خابرت محمد گالي منا للظهر او العصر نرجع سكرت منو شفت اسم غضب وصار عندي شعور بالشوق واريد اسمع صوتو بس لان تخلى عني ما گدرت اتصل كبريائي ما سمحلي
.
.
لو مجرد زعل ممكن اكسر حاجز الزعل واتصل عليه حتى لو هو غلطان اتصل اعاتبو بس بهاي الحالة ماگدر بس صار شهر من تصوب ولحد الان ما طلگني تملكني الفضول رجعت اتصلت على محمد
.
.
محمد: ها للوش
ليندا: محمد شو صار شهر
محمد: على شنو يروحي
.
.
ليندا: غضب لحد الان ما طلگني وصار شهر
محمد: ها مستعجلة
ليندا: تعرف رايي بس ماطول هو تخلى عني ما ابقى انتظرو .
محمد: خلص اذا تأخرت اليوم بالرجعة اخليه باجر يطلگج
.
.
ليندا: رغم اني اتصلت بس احس كلام محمد خيب ضني سكرت منو وانفجرت بالبجي ليش الله مو قاسملي الفرحة ماعرف حتى من افرح فرحتي ما تكمل اجت عمتي هناء وشافتني ابجي
.
.
هناء: خير للوش شبيج
ليندا: عمتي والله تعبت من الدنيا كل ما اگول راح ارتاح تجيني مشكلة وتطير الفرحة الي عندي شسويت بحياتي وهيج اتعاقب
.
.
هناء: توكلي بالله بنيتي كلشي الله قاسملو النا بيه خير اني من مات ابني اكيد حزنت بس جنت دائما اگول الحمدلله عالاقل راح شهيد وهسا هو إن شاء الله بالجنة شريد لابني اكثر من هالشي هذا
.
.
ليندا: بس عمتي انتي اكثر وحدة تعرف مصايبي وشصار وياي بحياتي
هناء: اعرف والله اعرف بس شنو بايدنا يا بنيتي غير نصبر ونحمد الله
.
.
اسمعي هالقصة هاي
ليندا: جانت حاطة راسي بحظنها وتحجي
.
.
هناء: الرسول ﷺ يگول من يموت الابن يقول الله للملائكة هل قطفتم ثمرة عبدي .. يعني العبد من يصير شاب يشتغل ويتعب علمود يتزوج وبعدها المرة تتعب بالحمل والولادة علمود يجي الولد او البنت وبعد هالتعب هذا والعناء يموت .. فمن يقول الله تعالى للملائكة هل قطفتم ثمرة عبدي يقولون الملائكة نعم يارب فيقول الله تعالى فماذا قال يقولون حمدك وصبر فيقول الله وعزتي وجلالي لاجبرنه جبر يتعجب منه اهل السماوات والارض
.
.
وانتي يا بنيتي شفتي من صبرتي على موت اهلج وفهد ومن رحتي فصلية رب العالمين عوضج بمحمد .. وغضب لا تصدگين يعوفج بس لان جان ضايج من امو ومن الي صار وياه لهذا گال راح اطلگها
.
.
بس من يجي وقت الطلاگ ويعرف انو راح يفارگج نهائيا مستحيل يوافق وانتي هم اعذريه يعني هو رجال طول بعرض ينضرب من امو وينهان اكيد ما يقبلها على نفسو وما جان بوضع يسمحلو يفكر بهيج امور لهذا اعذريه
.
.
واذا تمسك بيج ديري بالج ترفضينو ترا مستحيل ترتاحين بعدها
.
.
ليندا: إن شاء الله بس محمد گال راح يخليه يطلگني اليوم او باجر وتعرفين محمد ما يصعب عليه شي وراح يخلي غضب يطلگني اذا مو برضاتو غصب عنو
.
.
هناء: اذا غضب تمسك بيج وانتي هم ما رفضتيه وگلتي لمحمد تريديه راح ينجبر محمد يلغي هالقرار لان هو هم يريد يشوف اختو مرتاحة ويا الي يحبها وتحبو
.
.
ليتدا: الله يريح گلبج مثل ما ريحتي گلبي
هناء: شوفي صارت الساعة 10 وانتي لحد الان مو متريگة
ليندا: هسا اتريگ
.
.
نزلت وياها هي متريگة ويا عمي اني حطيتلي ريوگ واكلت بس هالمرة بسبب كلامها نفسيتي ارتاحت واكلت هواي لان جوعانة وكلت راح اسوي مثل ما هي گالت
.
.
خلصت ريوگ ودخلت دلال واجت تركض وحظنتني واني فرحت بجيتها
.
.
ليندا: جيتي وحدج
دلال: اي ليش ما اكفي
ليندا: لا والله للاسف ما تكفين
.
.
دلال: يا جلبة فوگ مو جاية ارزلج واخرب واهسج
ليندا: ههههههه لا لا بهاي تكفين وتوفين
دلال: هههههههه شلونج ولج حيوانة
.
.
ليندا: رفعت تك حاجب .. هسا انتي دا تطمنين علي لو ترزليني
دلال: لا ارزلج عندج اعتراض
ليندا: لا بس حبيت اتأكد
دلال: هههههههههههه
.
.
ليندا: وجع يالفضيحة شبيج صوتج وصل للمضيف
دلال: والله مشتاقة لسوالف يالحيوانة
ليندا: وانا اكثر والله وبالاخص بهالفترة نفسيتي زفت
دلال: ليش ولج
.
.
ليندا: ما تعرفين انتي زوجي تصوب وانفصلت عنو
دلال: شنووووو وليش اني ماعرف
ليندا: ما حجيت لاحد حتى البنات اجن صدفة وعرفن
.
.
دلال: وربي انتي حيوانة كل هالشي صاير وياج واني ماعرف
ليندا: والله ما جان الي واهس حتى للحجي
دلال: وشلون تخلى عنج بهالسهولة
ليندا: ماعرف
.
.
حجينا وتونست بجيتها وساعدتني بالغداء نزلت عمتي الظهر سلمت على دلال وگعدت ويانا بالمطبخ الظهر اجى عمي حطينالو غداء بالصالون واحنا تغدينا بالمطبخ
.
.
اول ما خلصنا غدا سمعنا صوت عمي دا يحجي بالتيلفون وانخبص طلعت عمتي سألتو گال واحد من اصدقائو مريض وراح يشوفو
.
.
غضب: گعدت الظهر محمد وحسن وناظم يمي تحمدولي بالسلامة وسألوني وما جاوبت شلون اجاوب واني الي شفت العنوان بنفسي مو مصدگ
.
.طلعت من المستشفى گلت لحسن ياخذني للبيت لان تعبان ونفسيتي ما تسمح محمد وناظم راحو وگلتلهم اني احلها باجر
.
.
اخذني حسن للبيت ابتسام من شافتني انخبصت اخذوني هي وحسن للغرفة تمددت وراسي يوجعني اخذت علاج مهدئ ونمت
.
.
ليندا: بقت دلال عندي قبل المغرب اجى زوجها اخذها محمد رجع بس مبين عليه ضايج ومهموم سألتو گال عندي شوية مشاكل وتعبان منهن وراح لغرفتو شوية ونزل تعشى ورجع صعد لغرفتو ونام
.
.
ورا ساعة اجى ماجد سأل عنو گلنالو .. تعبان ونايم .. وراح بس احس تعب محمد مو طبيعي وخايفة يكون صاير وياه شي وما يحجي واني من شفتو تعبان حتى ما سألتو عن غضب واني خلصت شغلي بالبيت ورحت نمت
.
.
غضب: گعدت بالليل حسن وابتسام بالمطبخ اخذت السويج وطلعت حسن راد يجي وياي وتركتو ومشيت اتصل علي گلتلو .. ماراح اسوي شي بس ضايج واريد ارتاح لا تتصل مرة ثانية
.
.
رحت للعنوان الي انطانياه ناظم وگفت عند البيت محتار اروحلهم لو لا وناظم من رجع للمحل الحاسبة طافية والجهاز وياي مال الولد لهذا ما گدر يرجع يطلع الموقع
.
.
تحركت بسيارتي وطلعت خارج العمارة المكان الوحيد الي من اضوج احس يمتص الضوجة كلها نزلت الجامات وبقيت گاعد بالسيارة يمكن ساعة
.
.
اشتاقيت ل ليندا اتصلت عليها وما ردت انتبهت الساعة 11:30 اكيد نايمة هسا رجعت للبيت واني الف فكرة براسي بس گلت باجر يصير خير
.
.رجعت للبيت تلگوني حسن وابتسام .. وحسن لان يشوف وضعي ما يساعد ما يتشاقة وياي مثل عادتو
.
.
ابتسام: احطلك عشى ابو عذاب
غضب: لا بسومة ما اشتهي بس اريد اروح لغرفتي
حسن: بلى حطيلو مريض وعندك علاج اترك هاي السوالف
غضب: حسن ترا ماالي واهس لسوالفك هاي
.
.
حسن: احنا هم مو متعشين واذا ما تتعشى يحرم علي الاكل طول عمري وخليني اموت جوع بسببك
غضب:  حسن كافي
.
.
حسن: اني حرمتو فاذا تريدني ابقى عايش اگعد تعشى يلا بسومة حطيلنا العشى
غضب: گعدت وياهم اكلت شي قليل بس لان حرم الاكل هذا الخبل بعدها رحت لغرفتي
.
.
……… يتبع
حطولنا توقعاتكم منو يكون المخطط لهاي الشغلة وليش غضب هيج صارت حالتو من عرفو