سنابل طافيه

part 32

رواية " سنابل طافية "
البـارت الثـاني والثـلاثـون

بـ قلم غفران آل حنيحن

🚫 لا تنسون التصويت ع البارت التعليق
بين الفقرات
ـ

ـــــــــــــــــــــــــــــــــــــــــــــــــــــــــ

‏"إنني عالق بين محاولة أن أعيش حياتي،
و بين محاولة الهروب منها"

ريمـاس :- الطريق جان طويل اختصرته بالنوم قبل لا نوصل يلا گعدت ملل بملل دانيال خال راسة بـ حضني ويلعب بتليفونه إسلام يسوق انوب سيارته تعبانة تشلع الگلب وبشار مسلمها بس نسمع صوت شخيرة اباوع على الشوارع من الجام وصافنه فزيت فزة من إسلام شغل اغنية اجنبية بكل علوها حتى الولد فزو لزمت گلبي ناقنصي هبطات اليوم هسة هذا شتحجي ويا اني ناقصة عمر جلطتي على ايد إسلام لا محال يمه گلبي يرگع رگع وهو ولا هامه شار الحلگ عين گدامة وعين يباوع بوجوهنه ولابس النضارات فوگ شعره ويغني ونص كلماته غلط بس التلحين صحيح ومسوي نفسة اجنبي ويطگ بعلجة ..

نصة الصوت بشار وهو يحجي بصوت ناعس :- شبيك رحمة ليعقوب وطليانه گطعت الخلفة ..

::- بس لا تمطگ عاد شلون خلفة كل البركة بيها مدام امهم ام الزون ..

جان مصعد رجلية على الكشن ومرجع جسمة على الكرسي وراسة راچي على الجام من انذكر اسم ام الزون طفر عدل گعدته وبقة يحمحم ..

وصلنا باوعت شفته نفس البيت الجابوني اله اول مرة رغم تعبان بس حيل احبة هواي ذكريات بي الي من طلعت منه جنت كارهته وفكرت خلصت منه هسة ترحمت عليه يمكن البيت الوحيد الي ارتاحيت بي حتى اكثر من راحتي ببيت عمو حارث رغم جانوا ممقصرين وياي بس احس مثقله عليهم حتى ببيتي ما ارتاحيت لان خلصتها رعب برعب اما هنا لا جنت مجبورة مو من كيفي وغصب عنهم يتحملوني يعني ماخذة راحتي مدري شلون جاي ارهمه وما اعرف شلون اوصللكم الفكرة ..

دخلنا ومثل اول مرة اجيت بيها هم خالية لا ملابس ولا اي شيء وياي الفرق هالمرة اجيت بكامل وعيي وداني وياي التفتلي اسلام كاتم ضحكته ..

::- على گولتج الخرابة هاي وراج وراج ماتفتكين منها ..

:- زين اذا بس على الخرابة صاحبها شلون ..

::- لا هنا تعذرينا صمغ اميرة ..

:- بعد ما ارجع لبيت عمو حارث خليني حافضة كرامتي الا اذا انتوا هم درتولي ضهركم عادي اخذ اخوية ونمشي ماكو مشكلة ..

بشار :- منو يديرلج ضهرة؟ وسفة عليج بعد اخيج لاتعيدينها حتلو اني تخليت عنج ولو على نحر رگبتي ماسويها بس هم ذولاك الناس مايسونها وياج وياج شتردين تحسبينه حسبينه اخوتج خواتج عمي حتلو جهالج راضين گولة ابو السلايش صمغ اميرة بكل وكت تحتاجينه وقبل لا تفكين حلگج تلگينه بضهرج نخليج بعيونه وتاج على راسنه ما عاش الي يعوفج وحيدج  ..