بريق الأمل & الدنيا حكاية

بريق الأمل 1

#بريق_الأمل
الحلقة 1 :

خرجت من هذه الدنيا وحيدة فقدت حنان الأم والأب فمن الذي يرعاني، أبي أنا اليوم أصبحت يتيمة أحاول أن أخفي شدة حزني في قلبي المكسور الذي يحن إلى لمسة يد تمسح دموعه ، قلبي الذي يحن إلى قسوة الأب وعطفه عليه فأنا يتيمة لست سوى ذليلة خسرت طفولتها باحثة عن قوت عيشها عن طفلة ظلمتها الأيام عن طفلة لاتعرف عن الدنيا شي كانت تبصر بعين أمها واليوم فقدت بصيرتها وهاهي تحاول تبصر من تلقاء نفسها

نزلت لطيفة: والكل في طابور واحد مصطفين ياخدوا في الغداء ولهذا يمشي يقعمز عالطاولات المخصصة كانت لطيفة تشوف بعيون لتتعلم حتى هي شن الدير نظام جديد ومكان جديد عليها لحتى تعيش لازم تتعلم كيف يعيشوا
قدر: هيا لطيفة
لطيفة: شافت لوين مشوا لحقتهم وقعمزت بجنبهم وتشوف في الصغار لمقعمزين بجنبها وحواليها منظر يقطع القلب من يرمي نعمة من ربي ومايسألش عليها
قدر: لطيفة لطيفة خيرك
لطيفة: لما جيت نحساب أنا بس لجيت للملجأ
زينب: عندك حق  ممكن تستغربي لأني كنت زيك حتى أنا
لطيفة: حتى أنت جيتي كبيرة هنا
زينب: ايه للأسف ممكن تشوفي الأطفال هذي انهم جو لهنا صغار ومايعرفوش أرحم منا
لطيفة: صدقتي قديش هي صعبة أنتي شن قصتك
زينب: أنا جيت هنا من خمس سنين بنت وحيدة لأمي بوي متوفي تزوجت من راجل ثاني في الأول قبل نعيش معاه وبعدها صارت مشاكل هي وياه وهربت قديش من مرة من الحوش كان يضرب فيا بشكل مش طبيعي وتوصلوا لحل إني يحطوني في الملجأ كل عيد تجي أمي للملجأ ترضي في ضميرها تجيبلي لبس وألعاب عشان نسكت
لطيفة: لا حول ولا قوة إلا بالله

عند سماع مصائب غيرك تهون عليك مصيبتك وتقول الحمدلله
لطيفة: عالأقل هي لطلبت هالشي مافيش حد حدفها من تلقاء نفسه حتى لو هما رضخوا لطلبها بدون منازع وماعارضوش عليها هذا أهون من أمك ترميك عشان هي بتتزوج وتعيش حياتها وأنتي عرقلة قدامها
لطيفة: وأنتي ياقدر
قدر: الحاجة الوحيدة قالولي أهلك ماتوا في حادث سير وسألوا مافيش حد عرف من أهلي وكان عمري ثلاث سنين
ولطيفة: تشوف لليلى ساكتة طول الوقت إلا من بعض الكلمات... وليلى
زينب: ماتسأليها شي لأنه مافي يعرف إلا المديرة ومفيدة
لطيفة: يعني هي غامضة
قدر: بالزبط
ليلى: تمرر في نظرها عليهم ولا كأنه الكلام عليها أو يعنيلها بتاتاً كملت اكلها وناضت ورجعت لدارهم خدت كورات الصوف والسنارة وبدت تخدم عليهم
بعد ماكملوا البنات رجعوا لدارهم
لطيفة: لفت انتباها لتخدم فيها ليلى جت قعمزت بحداها وتشوف فيها بخط وابره تصنع قفطان أو شي منه ... ممكن تعلميني كيف نخدمهم
ليلى: بدون ماتشوفلها صعب عليك يبي تعليم وأنا مش في مزاج
قدر: تعالي لطيفة أنا نعلمك
لطيفة: تلفتتلها تعرفي حتى أنتي
قدر :قولي الكل يعرف هنا
لطيفة: ابتسمت ومشت قعمزت بحداها
قدر: خدت الكروشيه أو اللانا أو كرة الصوف والسنارة شن تبي نديرلك
لطيفة: طاقية
قدر: أسهل حاجة الطاقية ديري عقدة لفيها الخيط على صوابعك التلاتة وحواليها اخدمي عليها بالطريقة هذي وبعدها الخيط الطويلة اجبديه عشان تختفي الدائرة من فوق زي السحر وبعدها كل ماتقدمي كل ماتكبري وتزيدي العدد في خدمتك
ومرت ربع ساعة وحصلت لطيفة على قبعة جميلة
قدر: شن تبي نزينهلك
لطيفة: شن هي الزينة عندكم
قدر: نديروا في أزرار أو وردة بالصوف أو نخلوها سادة
لطيفة: بعمرنا هذا خليها سادة أحسن
قدر: مدتلها الخيط توا نبيك الديري قدامي
لطيفة: كيف من أول مرة
قدر ديري وأنا معاك نقولك كيف الديري
لطيفة: إذا كان هكي تمام 
قعدت لطيفة تخدم على هذيكا الطاقية طول اليوم يدها ماخدتش عالخدمة واصوابعها طابن من كثر ماشدت في السنارة
في الليل
لطيفة: درتها درتها ياقدر
قدر: شبحتلها كيف رايحة منظرها لا يوحي بأنها طاقية أبدا بل شخشير لرجل كبيرة 😂 هههههههههه هذي طاقية يالطيفة ربي يسامحك وخلاص
ليلى: شافتهم وشافت لدارتها لطيفة ومشت قعمزت معاهم مش هكي يالطيفة
لطيفة: هذا لعلمتهلي قدر قالتلي بعدها هكي كملي كيف ماعلمتك
ليلى: تعالي معاي قدر ماتعرفش تعلم
لطيفة: باهي
ليلى: اول شي قضي لدرتيها وعاودي اخدميها
لطيفة: باهي قضتها من أول وجديد ورجعتها خيط
ليلى: توا قوليلي الخطأ وين
لطيفة: درتها صغيرة ومادخلش راس عيل
ليلى: توا الغرزة ديريها غرزتين لعند تحسيها مناسبة كحجم وشكل وقفي وكملي بغرزة وحدة تمام
لطيفة: تمام