#بريق_الأمل
الحلقة 8
حلوة لما تقولي شي بمسخرة واللا مبالاة والطرف الثاني ياخد الموضوع على محمل الجد
مرات باقي أيام الأسبوع بترقب ويستنوا في يوم شن داسلهم من مفاجآت
لطيفة: ليلى غدوا شن بتلبسي
ليلى: مفاجأة
لطيفة: اها وأنا قديش ليا يوم نشوف فيك تخيطي في حاجة بالسر كل مانشوفك الدسيها
ليلى: مادخلكش
لطيفة: هذا غير ماتبيشي امالا كان تبيه ويحبك شن درتي طيرتينا حتى التطيير
ليلى: هههههههه بصراحة الولد عاجبني لكن من الأول نبيه يحط النقاط عالحروف مانقعدش نخش في شي وأنا مش عارفة شن نهايته ونكون مع في علاقة وهو يطلع يضحك عليه شن ينفعني بعدها شي هو يمشي ياخد وحدة تختارهله أمه وأنا نتلقى الحسرة وكسرة الخاطر
لطيفة: كلامك مزبوط والله صح مية في المية ياريت كل البنات تفكر زيك لأنه مش أي حد تحطي فيه الثقة وهلبا أولاد يضحكوا عالبنات وخلاص وهما لاهم متاعين زواج ولا خطبة
ليلى: فيه هلبا قصص نسمع بيهم وبالأخص زي حالتنا نحن مهمشين والبنات بصفة عامة حتى هما في الأخير يقولوا العيبة من البنت والراجل مايعيبه شي
لطيفة: تخلف وقسما بالله هذا لمخليهم يتمادوا كان هالكلمة العوجة
ليلى: ايه صح لكن والله فيه حتى من بنات ماهوش هوينات تلقيهم احرف من المفرخ تحب في عشرة في مرة وحدة
لطيفة: ههههههه أمتى تلحق هذي
ليلى: كل واحد ليه وقت التلفون الأرضي موجود وخوتها لما يطلعوا ويسهروا وهما ياخدوا راحتهم
لطيفة: ياعليك حالة هذي ثقة اهلها هكي الدير فيها
حضر يوم الجمعة بقوة
من الصبح ليلى دارت لشعرها دوامة استشوار زمان 😂 وبعدها مشت تجهز شن بتحط لعمتكم مبروكة شن هو زمان حاجات يحطوا فيهم باسطي عادي من الحوش كعك إذا موجود والحاجات الزمنية ولقبل مايخش علينا الشي الجديد
الساعة 4 العصر ليلى طلعت قفطانها ولبساته وجتها قدر فقكتلها شعرها وسرحتهلها ودرتلها ظفيرة على جنب
زينب: راجي ديري طشة كحل وروج
لطيفة: لالا خلوها تمشي هكي وهي حلوة من عند غادي والقفطان واخد من حتة ثانية خالص
ليلى: تسلمي لطوف عقبالكن يابنات
وصلت عمتكم مبروكة ودقت الباب حاملة ومحملة بالحاجات باعتهم عمكم صالح لليلى
فتحتلها فاطمة تأهل وتسهل بيها كانوا منظمين دار لضيوف فيها صالونات وطاولة باش من هنا وماشي يستقبلوا فيها ضيوفهم
دخلوها للدار وقعمزت بجنبها بعد مرحبتين والأهلين والسهلين
جت خالتكم مفيدة حتى هي سلمت ووسلموا البنات لطيفة: وزينب وقدر
ومشت قدر الدير في قهوة مش تجي ليلى ترفعها
ليلى: شن قدر واتية
قدر: ايه
ليلى: وين لطيفة
قدر: خيره احني مش عاجبينك
ليلى: خزي عليك نسأل بس وبنكمل سؤال وبنقول وين زينب وانتي اهو خليقتك قدامي
قدر: باهي باهي غير اليوم نخلوا وجهك باهي قدام المرأة كمهدا وريتك وأيامك سود
داخل عندهم يهدرزوا شوي وخشت عليهم ضيفتلهم ليلى القهوة
مبروكة: ماشاء الله على كنينتي
ليلى: تسلمي وحطت السفرة وقعمزت بجنب فاطمة
فاطمة: همزت ليلى تنوض
مبروكة: ايه وانتم عارفين اليوم عليش جاية نبي نطلب ليلى لولدي على سنة الله ورسوله
أنت تقرأ
بريق الأمل & الدنيا حكاية
Misterio / Suspensoرواية ليبية من مجموعة قصص الأيتام الفقد والفقر والنجاح والاستقرار والصعود نحو الأعلى لعدة شخصيات معانا مش شخصية وحدة
