بريق الأمل & الدنيا حكاية

الدنيا حكاية 9

#الدنيا_حكاية
الحلقة 9

كل شيء يحصل معنا في هذه الدنيا مقدر لنا أن نعيشه فهذا قضاء الله وقدره اللهم لا اعتراض

هناك عائلة جديدة كيف كانت مروحة من الخارج عشان العلاج على الصغار لكن ربي ماقدرلهمش إنه يحصلوا صغار الله غالب
ربي يرزق كل مشتاق بالذرية الصالحة
موجودين في الحوش لاستقبالهم
وكان موجودة وحدة من أقاربهم ياوخيتي قديش ليك تعايني ونفس الكلام مش كان تاخد عيل من الملجأ وتربيه وتكسبي فيه أجر وكل شي لحكمة
المراة اسمها عائشة تبكي والله درنا كل شي علينا لكن نصيب من عند ربي اللهم لا اعتراض
المرأة لكلمتها اسمها سميرة أنا نعرفها صاحبة الملجأ اشتغلت معاهم في المشغل عز ماتعرفي أنا عندي ولدين وغالبة فيهم مش هي وراها قريب مية
عائشة هذا شي ربي يحطه عند ناس معينة الصبر والمعرفة والحكمة وحسن التدبير
سميرة والله لكلامك صح واحني مفروض قبل مانفكروا نجيبوا الصغار نتعلموا كل شي كيف تربي وكيف تهتمي بيهم حتى يطلع جيل مهذب وكويس
وحدة ثانية ردت عليهم والله فيه أمهات نعرفهم مايعرفوا غير الضرب حاجة هو صح الخوف والضرب مرة مرة لكن قبل هذا انصحيه علميه هذا الشي غلط وريه شن الصح مش حتى يتعلم منه

وبالوقت هذا كانت لطيفة مروحة هي والصغار متاعين المدرسة للميتم
البنت اسمها ملاك خالتي لطيفة تعالي شوفي شن فيه
لطيفة كانت أخر وحدة تنول لحتى تتأكد انه الكل نزل لما سمعت صوت ملاك نزلت ومشتلها وتشوف كانت موجودة شنطة بيبي ... لا حول ولا قوة إلا بالله ومشت للشنطة القت فيها بنية صغيرة بعمر أيام وموجودة معاها ورقة مكتوب فيها ... آية قلبت الورقة بلكي تلقى شي تاني مكتوب ماكان شي غير اسمها آية تنهدت بألم كل مايجي عيل للميتم يوجعها حالهم هالصغار فيه حد يرمي نعمة من ربي بينما الناس تجري وتسافر وتتعالج عشان تحصلهم قدر الله ماشاء فعل

دخلتها معاها داخل واهتم بيها ولايدين بيها الصغار حواليها ويشوفوا في البنية
ملاك حلو البيبي صغيرون
لطيفة ابتسمت حتى أنتم وين صغيرين كنتوا هكي زيها
منار ضحكت ايديها صغيرونين
لطيفة تعالى يامحمد نعطيك حاجات تمشي تجيبهلي البنية تبي حليب وشمالات ودنيا
محمد حاضر ومشي جابهلها ودارتلها رضاعة ورقدت هذيكا البنت
لطيفة اسسسس هيا اطلعوا خلاص رقدت كل واحد يمشي يكتب واجباته ... بعد طلعتهم ومشت للمكتب متاعها وتكمل في أوراق تسجيل البنت
مفيدة خشت عليها لطيفة بنت شنو لقيتوها
لطيفة شافتلها لما روحنا القينا بنت قدام الباب
مفيدة قعمزت لا حول ولا قوة إلا بالله شن حاطين معاها البنية
لطيفة مافي شي كان انه اسمها آية
مفيدة يالطيف على هالناس لقلوبهم ميتة يرموا نعمة بين ايديها
لطيفة ربي يعلم بحالهم شني
مفيدة وينها البنية قديش عمرها
لطيفة صغيرة هلبا أيام اظني في الدار فوق حطيتها
مفيدة هزت براسها ومشت

عائشة بعد ماروحوا الناس لجايين على خاطر مرواحتهم من السفر خش راجلها القاها هايمة ومش معاه بكل
خالد شن في ياعائشة الصغار نصيب من ربي وربي لو كاتبلنا نجيبوا صغار حيرزقنا ربي
عائشة شن رايك ياخالد نمشوا ونتبنوا عيل من الميتم ونربوه لو ربي كتبلنا بعدين فيه الخير كمهذا نتبنوا عيل ونكسبوا فيه الأجر ويكون لينا لكبرتنا اهو أنا شن مازالي قريب نخش الأربعين ماعاد نطمع حتى في الصغار وقعدت تبكي
خالد مش عارف مش عارف زعما هذا الراي الصح
عائشة إذا مش موافق عالولد امشي تزوج أنا خلاص أمنت وسلمت لقدر ربي عييت من العلاج والدواء والايباري ماعاد عندي جهد ليهن
خالد زواج مش حنتزوج أنا عندي مرأة وحدة ومانبيش غيرها وحاضر وحنجيبوا واحد من الميتم
عائشة وغدوا
خالد ايه وغدوا المهم انتي سادك بكاء مانتحملش نشوفك هكي
عائشة حاضر

في اليوم التالي
من الصبح عائشة ناضت ناشطة الضم ودنيا فرحانة بجية الوليد أو البنية لبيتبنوها نوضت راجلها فطراته وجهزت روحها وطلعوا متجهين للميتم
نزلت عائشة هي وخالد يمرروا في نظرهم على الميتم ومشوا دقوا الباب
فتحتلهم مفيدة شافتلهم تفضلوا
عائشة نبوا مديرة الميتم
مفيدة تفضلوا هيا داخل دخلتهم للمكتب ... شوية والناديلكم عليها
عائشة خودي راحتك

مشت مفيدة للطيفة كانت بجنب آية تهتم بيها ... لطيفة فيه عندنا ضيوف
لطيفة تمام تو ننزل
لفت البنت ونزلت البنت معاها ومشتلهم وخشت السلام عليكم
عائشة شافتلها باستغراب توقعت تكوني مراة كبيرة
لطيفة ابتسمت أنا مستلماته بعد خالتي فاطمة متوفية تفضلوا
عائشة ابتسمت أنا نبي نتبى عيل
لطيفة ابتسمت ربي يكتبلكم فيه الأجر
عائشة شافت للبنت بين ايدين لطيفة قربت منها بسم الله وماشاء الله
لطيفة اخدت قلبك البنية
عائشة هذي لنبي نتبناها البنية خشت قلبي
لطيفة أمس جابوها لينا
عائشة شافت لخالد نبي نتبناها البنية
خالد مادام تبيها حنتبنوها
لطيفة ابتسمت على لطافتهم وشكلهم والباين الحب والود والاحترام لبيناتهم أنتم ماعندكمش صغار
عائشة أنا أول أمس بس كيف روحت من برا نعالج ربي ماكتبليش نحصل صغار ونصحتني جارتي بأنه نتبنى عيل من الميتم ومن فرحتي جيت اليوم طول نحس فيها إشارة من ربي البنية جت قدامي طول
لطيفة ايه سبحان الله مدتلها البنت وناضت خدت الأوراق حتى يوقعوا على أوراق التبني
خالد حاضر خدي الورق يعبي فيهم ويوقع
لطيفة فيه إجراءات مازال نمشوا نشوفوا الحوش ونبي نشوف حالتكم المادية والمعنوية
عائشة الحمدلله ربي رازقنا ماعنده تفضلي بأي وقت
لطيفة ان شاء الله
عائشة نقدر ناخدها معاي البنت
لطيفة ابتسمت مادام وقعتوا عالأوراق عادي تاخدوها معاكم ومدتلهم ورقة تكتبولي العنوان
عائشة شافت للأوراق متاع التبني اسمها آية وفعلا هي آية وان شاء الله تكون خير علينا
لطيفة ربي يكتبلكم فيها الأجر ومشت ركبت خدت حاجات آية وعطتهلهم وعائشة خدت آية وروحت بسعادة

ماهر مقعمز يبكي
ليلى جت شافته يبكي خيرك شن فيه
ماهر يبكي وبس
ليلى حولاته القاته عاملها تحته شداته من ودنه وقرصاته هذا عملة الديرها
ماهر أنا مش بقصدي وقعد يبكي توا توا تنوض تغسلهم ونهارك أسود
ماهر مسيكين ناض ودوش وغير دبشه ومشت ليلى ولعتله الميه في بانيوا ... هيا حط حوايجك وفراشك وأغسلهم وشبحت لعلي ومراد لكانوا يشبحوا فيهم شفتوه أو لا ليدير هكي نديرله أحرف من هكي

ماهر مسيكين صب الصابون وبدي يكد في حوايجة ودموع في عيونه من العداب النفسي والجسدي تتخيلوا عيل صغير بعمر حساس يتعرض لكل شي شن موقعه ... بعد ماكملهم ساعده علي فيهم يعتبر الكبير فيهم وليعرف ونشروهم
وبعدها يلقى ليلى تستنى فيهم حبساته في الدار بعد حصل قديش ضربة عشان ماعاد يعاود عملته وخلاته هذاكا اليوم يرقد من غير فراش رقد عالبساط ومخدة وستر ربي للجو مش مسقع كمهذا هذاك الولد مشي فيها
.
.
.
يتبع