بريق الأمل & الدنيا حكاية

الدنيا حكاية الجزء الثاني من بريق الأمل 13

#الدنيا_حكاية
الحلقة3 الجزء الثاني من بريق الأمل :

تمر أيامنا بسرعة ونسعد بها أن يومنا قد أكتمل وجاء يوم ميلادنا ونسعد به ولكن لاندري انه تنقضي من عمرنا يوم يمشي ينقص من عمرنا ونقترب لنهاية طريقنا
بعد عشر سنوات من عامنا ذاك
دار الأيتام مأوى أخير وعائلة جديدة ومسكن يتقيك ومكان يحميك

اليوم ترفع جنازة خالتي فاطمة صاحبة الميتم صاحب مايقارب ألف طفل صاحبة الأمل لكل طفل صاحبة الوجه الجدي والحنون في وقت ثاني وزي مايقولوا تضربك وتضرب عنك اليوم غابت عن الحياة غابت البسمة وغابت الجدية وغاب الحن معاها بكي عليها الجار قبل الدار الصغير قبل الكبير ومانقول إلا إنا لله وإن إليه راجعون ربي يرحمها ويغفرلها حتى وجعتني وبكيت عليها وجعتني هلبا كانت ونعم المربي

رفع نعشها الطاهر لدار الحق والصغار وراها يبكوا وهي مشت وآخر أمل بالحياة مات
مفيدة بدموع وراها والبنات يبكوا وبالأخص ليلى: بكت عليها لعند خلاص مقعمزها بجنبها مبروكة عزوزتها وشادة ولد ليلى وتهدي فيها
مبروكة: خلاص يابنتي قطعتي روحك بالبكي
ليلى: بصوت باكي هذي اميمتي لماتت كيف ماتبينيش مانبكيش 😭
لطيفة: مش وقت دموعها تجري عالناس لجاية بعد سمعت كلهم جو يعزوا على هالإنسانة أفنت عمرها عشان تربي أطفال الأيتام لقت قبول في الناس فشن بتكون مرتبتها عن الله وشوفوا مرتبة كافل اليتيم مش يابال أيتام وموفرتلهم المسكن والمأكل والمشرب ربي يقبله عن أكبر أجر ... تشوف هذا يبي مية هذا يبي فراش وهذا مش عارفة شني هذي تسالي هذي مش عارفة شن تبي

زينب: لطيفة
لطيفة: وعيونها دموع نعم زينب
زينب: تعالي وخيتي ارتاحي
لطيفة: قعمزت وهالناس من بيهم وأنا عارفة انه مافيش حد لاهي بيهم
زينب: مشت الغالية عدت كانت لأخر لحظة وتقول أنا ماجبتش صغار بس ربي بعتلي نربي صغار أيتام ومعتبريني أمهم كلهم
لطيفة: تبكي معاها ماحسيتش بالفقد ماحسيتش بأهلي عايشين وأنا في الميتم
زينب: والله لو أمي ماتت مش حنبكي ولا توجعني زي أمي فاطمة 😭
لطيفة: الله غالب
مفيدة: جتهم قعمزت بجنبهم أنا صاحبتي ماتت ماتت والله الميتم ماينخشله بعدها من بيشد هالمكان بعدها 😭
زينب: المكان موحشم المبنى بروحه يبكي عليها
مفيدة: قعدت تبكي أنا اليوم بنمشي نرجع لحوشي خلاص
زينب: خالتي وين بتمشي عندك حوش أنتي
مفيدة: ايه عندي غير كنت مسيباته مأجراته
لطيفة: من بيهم الصغار ياخالتي بتشديه بعدها
مفيدة: لالا خلاص فاطمة ماتت خلاص

جي الليل والناس روحوا كل واحد لحوشه
مفيدة: شافت صغار واطمنت عليهم
لطيفة: خلاص ياخالتي بتروحي 🥺
مفيدة: خلاص أنا صح فتحت هالميتم مع فاطمة بس هي تعرف كيف الديره وأنا من بعدها ماعاد عندي شي ليه
لطيفة: الصغار من بيهم ياخالتي الميتم من بيه
مفيدة: ضحكت رغم ألمها بيه أنتي أنا عارفة شن ممكن الديري فيه ومستقبل هالصغار كله بيدك وأنا حاطاته في ايديك وأنا مطمنة
لطيفة: بس هذي مسؤولية صعب عليه
مفيدة: وقعت عن الأرواق التنازل متاع الإدارة ليك نبيك تكملي لبديناه
لطيفة: بشرط ياخالتي تقعدي معاي زي قبل مانقدرش بروحي مسؤولية هذي
مفيدة: موافقة المهم مانكونش في مكان فاطمة
لطيفة: مايجي في مكانها حد ولا يجي في طيبة قلبها حد هي بدت واحني بعدها نكملوا
مفيدة: هذي بنتي وهكي نبيك مايهزك شي
لطيفة: كل الضربات لتلقيتهن من هالحياة زادت قوتني والشخص لمار باللي مارين بيه احني وقاعد ماطاحش وماستسلمش عمره مايطيح في المستقبل لأننا تحملنا شي واحني صغيرين وقاعدين نقاوموا ومع ربي خير ان شاء الله