بريق الأمل & الدنيا حكاية

الدنيا حكاية 18

#الدنيا_حكاية
الحلقة 18

-من كمية النعم لنحن فيها قد ننسى نحن من وبالأخص من الناس لخشوا عالغنى جديد يمحوا كل شي من ماضيهم الفقير ويستحقروا أي فقير بيواجهوه في حياتهم ولكن من يعرف مرات هو غناه مايدوم عنده فترة معينة بيسرح ويمرح وبيطغى فيها وبعدها يرجع لأسفل السافلين

-ممكن توثق بالفقير ونبله ولا بالغني وجشعه والفقراء أنواع وحتى الأغنياء أنواع:
الفقراء فيه منهم فقير بس بيحب لقمة الحلال والعرق الجبين وفيه منهم السراقين والمحتالين وغيرهم ، والأغنياء كذلك فيه منهم ملك كل شي بالاحتيال وتجارة الممنوعات وهذا أخطر حد وفيه من غناه ربي برزق الحلال عن طريق شغل دماغه فيما يفيده وبس

-هالدنيا مش ديما واقفة بصفنا مرات تكون بصف عدونا في بعض الأحيان هكي هي ديما ضالمة وغدارة ومابينوثق فيها اليوم عايشين براحة وغدوا بقلق اليوم عايشين ونتنفس غدوا ميتين وتحت التراب
(كل هالكلام حيكون ليه معنى في أحداث الأيام الجاية)

رحمة قمر
قمر لالا أنا ماكسرته
قمر مسحت على شعرها نوضي قمر حبيبتي أنتي ماكسرتي شي
قمر فتحت عيونها على وجه بشوش يشبه بشاشة الخالة لطيفة بس كل ماتذكرها كل مايزيدها حقد وكره اتجاه لطيفة... صباح الخير خالتي رحمة
رحمة صباح النور هيا تعالي يابنتي افطري لأنه من بكري المدام خديجة قالتلي إنك اليوم بتمسحي وتلمعي
قمر بتفكير تمام أنا جاية ناضت للحمام وغيرت حوايجها ومشت للمطبخ ... خالتي
قمر تلفتت بابتسامة قمر تعالي حبيبتي هذا فطورك افطري ويلا بسرعة للتنظيف
قمر بزعل باهي فطرت وناضت
رحمة هذا الملمع امسحي التحف لفي الطابق الفوقي
قمر باهي واخدتهم وركبت فوق كان مكان واسع وفيه كنبات ويفتحوا فيه غرف

رحمة شبحت للدروج ياريت القيت من يساعدني زي قمر ماكانش هذا حالي
خديجة خيره شن فيه حالك قولي قاعدة تاكلي وتشربي ومافيك شي
رحمة مافيا شي وكملت غسل الماعين
-في أوقات نتلاقوا مع أشخاص على قد ماكرهناهم حبيناهم كرهم اتجاهنا واتجاهم قعد شي طبيعي أي كلمة منها كانها مسحة عالضهر وبس
خديجة شبحتلها على جنب وطلعت ركبت فوق تشوف في قمر مقعمزة تحت ومجمعة التحف قدامها وتمسح فيهم هذا كله لأنه خايفة تكسرهم ... أنتي يابنت ليش حاطتهم كلهم تحت
قمر خايفة يتكسروا حطيتهم تحت عشان مايطيحوش مني
خديجة ايه باهي ولما تكملي امشي لرحمة شوفي شن مازال بالديري
قمر باهي
خديجة خشت لدارها لأنه كان وقت استجمامها وقهوتها وتلفزيونها
رحمة راكبة مسرعة بقهوة خديجة لما شافت قمر مقعمزة وتنشف ابتسمتلها ودقت الباب وخشت ... تفضلي القهوة مدام
خديجة شكرا انتبهي لهالبنت أنا ماعنديش ثقة في هالأيتام لأنهم خنابين وأشبح شنو
رحمة لو شاكة أنها تخنب ليش تبنيتيها رديها للميتم بهنا قصد رحمة تفك قمر من هالمكان لمعتر
خديجة ابتسمت على جنب بشر ... أنا مش حنسيبها ليش جبتها إذا بنردها تقعد تخدم تحتي طول عمرها وبعدين لما تجي هذيكا لاسمها لطيفة أو مش عارفة مني مانبيش أي خطأ مفهوم البنت بتقعد ساكتة وتحطيها في دارها لهنايا ودبشها لشريته قاعد في الدولاب صح
رحمة ايه قاعد
خديجة رشفت من الفنجان ايه كويس
رحمة تبي شي ثاني
خديجة لا
رحمة على راحتك وطلعت
وكملت خديجة استمتاعها
قمر كملت التنشيف وناضت ترد كل وحدة لمكانها وكان قاعدات اثنين انست وين كانوا فكرت وفكرت ردتهم كيف مافي دماغها ونزلت
قمر خالتي
رحمة شافتلها قمر تعالي ليش واقفة عالباب
قمر ليش المرأة هذي تكرهني هي ماتحبنيش زي أم مراد وماهر صح
رحمة تنهدت لأنه هي مش عارفة شن تجاوبها لأنه حالتها مش أحسن من حال قمر حتى هي انجبرت تخدم عند هالمرأة غصب عنها أمها كانت تخدم عندها وهي بنت وحيدة وبوها محبوس وبعد ماتوفت أمها كانت صغيرة من عمر قمر تقريبا اضطرت تخدم عندها بدون ولا قرش أحمر حتى يكون ليها مكان يتقيها مكان يحميها أحسن ماتتشرد في الشوارع ... كله يهون يابنتي كله يهون يهون وتنهدت زي مايقولوا لما تشوفي هم غيرك يهون همك
قمر شن قصدك بالكلام
رحمة يعني حتى أنا ح
خدمت زيك في الحوش هذا وتقريبا من نفس عمرك وشوفيني توا عايشة الحمدلله بس ماعليك إلا الصبر
قمر يعني ندير كل شي تطلبه مني
رحمة بالزبط زي ماتقولك وانتي كوني ليها كيف ماتبي
قمر بس أنا نبي نقرا مانبيش نسيب مدرستي أنا نحبها هلبا وانا عادي نظف كل شي المهم نبي نقرا وتدكر في كلام لطيفة لما تنصحهم عالقراية ولما شافتها متخرجة كان هذا أكبر حلم لقمر توصل لليوم هذا على رغم صغر سنها ... وقعدت تبكي
رحمة أنا نحاول نتكلم معاها أنتي بس ماتعارضيهاش على شي قالتلك ديريه
قمر باهي

في العشية
لطيفة هيا خالتي مفيدة أنا طالعة بنمشي نشوف قمر
مفيدة ربي يعاونك وانتبهي كويس
لطيفة تمام هيا مع السلامة

طلعت لعند وصلت لحوش قمر دقت الباب قمر كانت بتفتح
رحمة لا قمر استني ارقي فوق وأنا نفتح
قمر باهي بس انا شن بندير فوق
رحمة قعمزي عالكرسي لعند نجيك تمام
قمر باهي وركبت
ورحمة مشت فتحت الباب ... تفضلي أختي من تبي
لطيفة ابتسمت أنا مديرة الميتم جاية زيارة لقمر
رحمة اها تفضلي رفعتها لمكان الضيافة ... الناديلك على المدام خديجة وقمر
لطيفة قعمزت تمام خودي راحتك

ركبت رحمة جري لخديجة ودقت الباب وهي داهشة ... مدام لطيفة جت مديرة الميتم وطالبة قمر
خديجة وقفت تمام وينها البنت
رحمة لما سمعت دق الباب طلبت منها تركب هنا
خديجة أحسن مادرتي وطلعت تعالي يابنت
قمر نزلت من الكرسي وجتها نعم
خديجة توا جت لطيفة ونسمع منك قايلتيلها كلمة وحدة أو أنك الديري أي شي نكسرلك ايديك فاهمة عليه
قمر من الخلعة غمضت عيونها باهي
خديجة شادتلها يدها بقوة وين ساكنة في الدار هذي وتأشر بصبعها على دار لسكنت فيها أول ماجت ... وكيف نعاملوا فيك كويس ونحبوك وطول اليوم تلعبي بالألعاب
قمر ماردتش عليها
خديجة فاهمة
قمر انخلعت ايه فهمت
خديجة شافت لرحمة لبسيها من لحوايج لفي الدولاب وسرحيلها شعرها المشفشف
رحمة حاضر

خديجة واست حوايجها ونزلت بكل ثقة وتكبر وين وصلت لوين ماقاعدة لطيفة تصنعت الابتسامة وخشت بتكبر اهلا بالأستاذة لطيفة
لطيفة ناضت وسلمت اهلين فيك مدام خديجة
خديجة قمورة حبيبتي تعالي سلمي
قمر خشت وهي تشوف للطيفة بكره وتصنعت الحب عشان رضا خديجة لأنه عندها هي السبب ... قدمت للطيفة وسلمت عليها بيد باردة
لطيفة حضنتها قمر حبيبتي كيف حالك استاحشتك هلبا
قمر سيبتها وقعمزت بجنب خديجة بدون ولا كلمة
لطيفة شافتلها تحسابه هذا كله عجبها المكان وماعاد تبيها وبس او معقولة نستها بالسرعة هذي من كثر مامعبيين عينها
-أصعب اللحظات تلك التي تعتزم على اتخاد قرار يؤلمك ولكنه صائب ...!

لطيفة قمر حبيبتي كيف حالك
خديجة تشوف لقمر وتأشر بعيونها على لطيفة قمر حبيبتي ردي على خالتك لطيفة عيب بنتي وشدت يدها مع قرصة
قمر ايييي
خديجة خيره شن فيك بنتي وتشوف فيها ودارت روحها خايفة عليها
قمر مافيا شي تمام الحمدلله
لطيفة مع استغراب بشن صاير بس حركات وخوف خديجة على قمر هذا لطمنها عليها كويس ان شاء الله ديما بخير أنا بعدت ماشفت قمر أنا بنستاذن
خديجة بتمشي من غير مانشربوا قهوة
لطيفة لا مرة ثانية اعدروني
خديجة على راحتك حبيبتي مع السلامة ناضت ودعتها هي وقمر عالباب وسكروا الباب وخديجة حولت القناع الحلو لكانت لابساته لقناع البشع امشي يافرخة غيري هلي لابساته واغسلي الماعين مع ىحمة بسرعة
قمر مشت تجري ببكاء وحولت حوايجها في دارها لتحت وعيونها دموعها وكل مايزيد كرهها للطيفة بالأخص اليوم زادت تأكدت من أنها ماعاد تهمها بشي خلاص باعتها

روحت لطيفة حزينة ومشت لدارها سكرت عليها الدار وقعدت تبكي على قد ماصار مافيش حد عاملها بالطريقة هذي من قبل ...
مفيدة دقت الباب لطيفة بنتي وين دواي
لطيفة شوية ونجيبهلك خالتي
مفيدة باهي أنا ماشية لداري
لطيفة خدت الدواء ومشت عطاته لمفيدة

- دائماً الشخص الذي يهتم بالجميع لايجد من يهتم به

.
.
.
يتبع ياترى شن بيصير في حياتهم انتظروني