بريق الأمل & الدنيا حكاية

الدنيا حكاية 13

#الدنيا_حكاية
الحلقة 13

عندما أحزن أغني، فأكتشف أن صوتي أسوء من مشاكلي، فأبتسم >_<

كثيرا من الأشياء يسيء الظن بنا ونحن ليس لنا أي دخل بموضوعهم كما حدث مع لطيفة ربي يكون في عونها ماأصعب الأشياء أن يسوء الظن بك وأنت بريء منها

ندق الباب دخلت بنت صغيرة ذات السبعة أعوام ... خالتي لطيفة
لطيفة تلفتتلها ابتسمت قمر بنتي تعالي وفتحتلها ايديها وقمر ارتمت في حضنها
لطيفة شن أخبار المدرسة اليوم
قمر حلوة هلبا واليوم الأبلة قالتلي شاطرة وكل الفصل صفقلي
لطيفة ليش
قمر لأنه سمعت الحروف كلهم
لطيفة ابتسمت بنتي الشطورة وين ماهر ومراد وعلي
قمر تحت يكتبوا في الواجب الأبلة هلبا عطتهم لأنه متاخرين
لطيفة وشن رايك نمشوا نساعدوهم
قمر ناضت هيا نمشولهم لانه هلبا هلبا
لطيفة حاضر خدت قمر من يدها ونزلت وين ماكانوا ماهر ورفاقه وغيرهم من الصغار ليكتبوا مشت لطيفة ليهم شن ياشباب تبوا أي مساعدة
ماهر ابتسم
مراد بتذمر ورانا واجب هلبا الأبلة عطتنا حرفين نكتبوهم مالحقناش حتى نتعلموا كيف نكتبوهم
لطيفة حنعلمكم أنا وأنت ياماهر
ماهر مدلها الكراسة شافته كاتب كويس ممكن هو لأنه لما كان معانا تعلم حتى الكتابة هذا ليش هو عنده ساهل كويس
لطيفة كويس ماهر استمر وأنت ياعلي
علي كان متحشم هلبا من منظر كراسته
لطيفة علي كلنا نتعلموا حتى أنا على فكرة قريت وأنا كبيرة ومعاها كبيرة هلبا عمري في وقتها يمكن 19 سنة أنتم تتخيلوا معاي مفروض كنت في وقتها قريب نتخرج مش قاعدة نقرا لكن هذا نصيب عند ربي وفي وقتها بس شاء القدر أني نخش للمدرسة ونتعلم
* لن يفهمك إلا اثنان أحدهم من مرّ بحالتك، والآخر يحبك جداً

علي مدلها الكراسة
لطيفة ابتسمت على فكرة ياعلي خطك حلو في الحروف تبي تنظيم بس توا امسحلي الصفحة وبعدها النقطلك عشان تكتبهم تحت بعض تمام
علي فرح هلبا ... باهي وبدي يمسح
مراد وأنا
لطيفة وحتى أنت امسح الصفحة كلها عشان النقطلك حتى أنت وبعدها عندي حصة ليكم مش صح ياشباب كانت تخاطب كل من موجود في الدار... كلنا بنكونوا يد بيد عشان نساعد علي وماهر ومراد
أشياء بسيطة قادرة على أن تغير حياة البعض بنظر العالم وأشياء أخرى أبسط كجلوس مع الأطفال وتهتمي بطلباتهم البسيطة الغير مكلفة تخليك سعيدة جدا قادرة على أن تنسيك ماكنت فيه
كملت نهارها لطيفة مع الصغار وماحستش بالوقت ونست المراة ومايجيب منها لا كانت ولا حتكون شخص مهم حتى تاخد من وقتها وتفكيرها

بعد فترة كان يوم سبت جت عائلة تتبنى ودقت الباب واستقبلوهم
لطيفة تفضلوا معاي
المرأة اسمها هاجر يزيد فضلك والله جايين نبوا نتبنوا ولد من عندكم
لطيفة يشرفنا انه تتكفلوا بيتيم
هاجر شكرا
لطيفة تفضلوا معاي نوريكم الأولاد
راجلها اسمها محمد يزيد فضلك خش معاهم جت عينه على ماهر مشاله وسلم عليه نبي الولد هذا شن اسمه
لطيفة تشوف لماهر لأنه تجربته السابقة فاشلة تنهدت اسمه ماهر
هاجر ابتسمت اسمه حلو
لطيفة تتفضلوا معاي حتى تكملوا أوراق التبني
محمد حاضر
لطيفة أول شي وقبل كل شي نبي نحطكم في الصورة ونبي نعرف نيتكم شني
الزوز شافوا لبعض واستغربوا من سؤالها
لطيفة شن هي نيتكم من تبني هذا الولد
هاجر بصراحة نبوه لأنه ماعندناش أولاد
لطيفة معليشي على سؤالي بس ماهر هو بالذات مر بحالة صعبة جدا تبناته عائلة من قبلكم لمدة أربعة سنين ومع زوز أولاد ثانيين تعاملوا معاهم بأشد أنواع العقاب والقسوة وحرموهم أبسط شي في الحياة الأقل والشرب مانبيش نعيد الغلط مرتين وبالذات من نفس الشخص
محمد معاك حق يأختي وكلامك كله على راسنا من فوق حني ماعندناش نية غير نبوا ولد يكون يونسنا في هالدنيا وبس ونكفلوا يتيم
لطيفة قبل مانسلمه بنشوف الحوش والحالة وكل شي وهذا غير الزيارات كل فترة والثانية
هاجر واحني جاهزين
لطيفة تمام اعطوني العنوان لحتى نديرلكم زيارة قبل التبني
محمد ان شاء الله

طلعوا روحوا وطلعت بعدها لطيفة الدور على مفيدة اليوم ماشفتهاش إلا مرتين مشتلها لدار القتها راقدة ... خالتي مفيدة خالتي مفيدة
مافيش رد
لطيفة شافت النبض فيه لكن ضعيف انجلط ... لالا ياخالتي مش حتسيبيني حتى أنتي لا ماعنديش حد غيرك ماعاد قعدلي حد مشت تجري للتلفون الأرضي اتصلت بليلى ... ليلى تعالي لحقيني مع صالح بسرعة خالتي مفيدة بتمشي فيها
جو يجروا ومشوا سعفوا مفيدة في أقرب مستشفى وخدوها منهم الإسعاف
لطيفة يارب لطفك يارب صبرك يارب لاتختبرني في خالتي مفيدة ربي يشفيها ويعافيها
ليلى لطيفة خالتي مفيدة حتكون بخير
لطيفة تنهدت لو صارلها شي أنا حنضيع مش مهونة عليه إلا هي الميتم بيضيع أنا ناخد في قوتي منها
ليلى أنتي قوية بنفسك يالطيفة أنتي لخلتيه وصل للمستوى هذا
لطيفة أنا توا مانبي شي غير تكون صحيحة وتنوض بخير

بعد ساعة كانت مفيدة في غرفة العناية وعليها الأجهزة وجيتها نوبة سكر والعمر حتى هو ليه دور مسكينة ولطيفة واقفة عالمرش تشوف فيها وتبكي

*أربعون ألف سنة من لغة الإنسان، ولا يمكنك أن تجد حرفاً واحداً يصف الشعور الذي بداخلك تماماً !...

ليلى لطيفة أنتي لازم تروحي
لطيفة لا مش حنروح نبي نقعد مع خالتي مفيدة
ليلى الميتم بروحه الصغار بروحهم وأنا هنا حنكون معاها أنتي فيه من بحاجتك لازم تروحيلهم
لطيفة بس لو يصير شي وأنا نكون مش هنا
ليلى حتكون عادراتك لأنه عندك شي ثاني والواجب ينادي هيا امشي هيا نوصلوك أنا وصالح ونرجعوا للمستشفى
لطيفة تنهدت حاضر وروحت معاهم وقضت باقي يومها مع الصغار لعند رقدوا ومشت لدار تفكر في كل شي صار في حياتها لعند اليوم كيف جت كيف عاشت هنا كيف ماتت فاطمة كيف بعدها عاشت مع خالتها مفيدة كأنها أم بالنسبة ليها فالناس عندهم أم واحد والأكثر حظاً من يملك ثلاثة أحضرتهم لهم الأيام...وصلت بتفكيرها لليلة أمس( كانوا جالسين في نفس المكان لتعودن يحكن فيه همومهن برا تحت ضوء القمر
مفيدة بنتي شن الديري هنا في هالليل
لطيفة شافتها وابتسمت شي بس نحب نقعمز هنا
مفيدة ابتسمت وحتى أنا تعودت عليه من وراك ديما قعدت نقعمز هنا
لطيفة ابتسمت وشافت فوق للقمر والنجوم سبحان ربي مَن خلق هذا الكون
مفيدة تشوف معاها لطيفة
لطيفة شافتلها بقلق نعم خالتي مفيدة
مفيدة الواحد مايعلمش عالدنيا اليوم احني فيها وغدوا أشبح من سابق
لطيفة بعيد الشر عنك خالتي ربي يطول في عمرك والله الميتم من بعدك ماينخشله نموت بعدك
مفيدة وين بتموتي من بيهتم بي هالصغار أنا وصيتي عليهم مانبيكش تسيبيهم بعدي نبيك تهتمي بيهم زي قبل وأحسن والموت هذي كلنا ماشيين لهالطريق سوى اليوم أو غدوا هذا أمر لابد يصير منه مافيش حد يغير هالقدر غير ربي سبحانه )
نزلت دمعة من عينها ومسحتها وكان النوم مجافيها ومش راضي يجيها كانت كل ماتحاول تغمض عيونها مايصيرش وتجي بين عيونها ليلة أمس وآخر كلمات من مفيدة خداها النوم بعد وقت ناضت الصبح الثاني سقدت الصغار للمدرسة ومشت للمستشفى
وصلت لاقتها لليلى ... باهي لجيتي لطيفة
لطيفة قلبها قريب مات من اللقطة لجت فيها ليلى ... خيره شن فيه
.
.
.
يتبع الأحداث الجاية