بريق الأمل & الدنيا حكاية

الدنيا حكاية 14

#الدنيا_حكاية
الحلقة 14

لماذا لا تتركنا هذه الدنيا أن نحظى بيوم كامل ونحن سعداء ماذا فعلنا لها هذه الحياة حتى تكرهنا هكذا ... فقد شبهت الحياة كراكب قارب في وسط عاصفة البحر وتضارب الأمواج وأنت من بين تلك الأمواج تقاوم في ذلك قارب من أجل النجاة وتحطم الخشب وأصبحت تتخبط في المياة وتبحث عن النجاة وتجد قطعة خشب تحتمي بها من ذلك الطوفان المميت ومن بين هذه العواصف وهوج البحر تسطع الشمس ويهدئ البحر
هكذا هي حياتنا نهاية كل عاصفة سطوح شمس الأمل وهدوء العاصفة واستواء البحر كاستواء مشاكلنا في هذه الحياة

قد وصلت لطيفة للمستشفى لاقتها ليلى ... باهي لجيتي لطيفة
لطيفة قلبها قريب مات من اللقطة لجت فيها ليلى ... خيره شن فيه
ليلى ضحكت هههههههه مافيه شي خالتي مفيدة ناضت وتسأل عليك
لطيفة طيحتيلي قلبي وحطت يدها على قلبها قريب متت نحساب صارت حاجة لخالتي مفيدة
ليلى توا ماليهاش هلبا كيف ناضت نبيك تقعدي معاها بنمشي لحوشي عارفة صغاري مسيبتهم من أمس
لطيفة امشي عندك الإذن
ليلى ابتسمت هيا مع السلامة
لطيفة بعد ماودعت ليلى خشت لخالتها مفيدة كانت محولينها في غرفة عادية ومعاها نساوين السلام عليكم صباح الخير واتجهت لمفيدة بابتسامة خالتي
مفيدة ضحكت بنتي
لطيفة سلمت عليها هكي ياخالتي تخوفينا عليك والله كنت نحساب أني خسرتك
مفيدة مانحسابش روحي غالية للدرجة هذي كمهذا ديما نمرض مش تحبوني
لطيفة بعيد الشر عنك احني نحبوك ياخالتي أنتي أمي الثالثة
مفيدة ربي يحفظك يابنيتي وربي يبعتلك لفيه النصيب
لطيفة ابتسمت على دعوة مفيدة ان شاء الله
مفيدة وين خليتي الأولاد
لطيفة لمشي المدرسة واللي مازال قاعد خليتهم يلعبوا ... وبعدها ضحكت تو أنتي ياخالتي حتى في عز مرضك تفكري في الصغار
مفيدة كيف مايقولوا خلاص يمشي في الدم حتى لما أمس مرضت لآخر لحظة نفكر فيك وفيهم خفت نموت بدون مانشوفكم لآخر مرة
لطيفة بعيد الشر عنك تو تنوضي وتكوني صحيحة زي قبل وأحسن
مفيدة ان شاء الله أنا توا مابيني شي روحي للصغار
لطيفة بس ياخالتي كيف بنسيبك
مفيدة قلت روحي أنا كبيرة مش زيهم صغار مايعرفوش وأنا شن فيا اهو في المستشفى نقول اآ بس يجوني يجروا
لطيفة باستسلام حاضر ياخالتي ان شاء الله ألف لاباس عليك وسلمت عليها وطلعت روحت للميتم والقت قمر وماهر يتعاركوا ... خير شن فيه
ماهر خالتي كلميها
قمر خالتي كلميه
ومشت قعمزت بيناتهم شن فيه 
ماهر خدت مني قلمي
لطيفة شافت لقمر
قمر بس هو قلمي
لطيفة شافت لماهر
ماهر باحراج عجبني ونبيع
لطيفة عيب ياماهر خاطرك فيك عجبك تعال أطلبه منها قول لو سمحتي ياقمر ممكن تعطيني القلم لأنه عجبني
ماهر لو سمحتي قمر ممكن تعطيني القلم
قمر مدتهله هاك خوده ماعاد نبيه
لطيفة ليش لعياطات امالا
قمر لأنه ماخداش أذني على انه بياخده
لطيفة توا خالتكم لطيفة كانت في المستشفى وراسها يوجع فيها شن المطلوب منكم
قمر هدوء
لطيفة ابتسمت صح وشافت لماهر
وماهر ناض مشي وبعد شوي جي جابلها بنادول وطاسة اميه
لطيفة ابتسمت وليدي وبنيتي ليعرفوا شن نبي وحضنتهم
قمر انا نحبك
لطيفة وأنا نحبكم كلكم وتوا هيا كلكم امشوا جهزوا روحكم وقت عالمدرسة صح
ماهر صح
مراد أنا ماكتبتش الواجب
لطيفة شنو 😳
مراد قعد يبكي ماعرفتش نكتبه الحرف 🥺
لطيفة خبطت على راسها أمس فعلا مالهتش بيهم حتى لما روحت بالها مشغول على خالتها مفيدة ونست كل مهامها صارتلها حالة سنفرة... كلكم تمشوا تلبسوا وأنت مراد تعال معاي بسرعة أكتبه قبل الوقت مشت هي ومراد لمكتبها وقعمزاته وبدت تكتب وتعلم فيه وهي يكتب لعند كمل والباص برا
ماهر جايهم وجايب معاهم لبس مراد وشنطة
لبستله لطيفة ماهر كلمه قوله يستناكم شوية مابين طلع مراد ... كملتله لبس وسرحتله شعره ولبستله شنطة وكندرته وطلعاته وبعد مامشي تنهدت براحة الميتم فضي وبعد شوي يولي يتعبى فيهم منهم في الثانوية وفيه منهم في الإعدادية