#بريق_الأمل
الحلقة 6
علمتني الحياة ان اجعل قلبي مدينه
بيوتها المحبه وطرقها التسامح والعفو
وأن اعطي ولا انتظر الرد على العطاء
وان اصدق مع نفسي قبل ان اطلب
من احد ان يفهمني وعلمتني ان لا
أندم على شئ وأن أجعل ألامل
مصباحا يرافقني في كل مكان
أسعد الله أوقاتكم بالخير
في اليوم التالي::
تجهزن فاطمة وليلى للرجوع لأرض الوطن وكأنه تحررن من قيود الاستعباد وحصلن على الحرية اليوم
نزلن لتحت بيسلمن المفتاح
ليلى: تو كيف بنتكلموا معاه المشكلة حتى من السواق أجنبي
فاطمة: أمشي ربي يديرلنا طريق
ليلى: نمشي نشوفه مرات قاعد ماجاش نقعدوا غير نستنوا برا
فاطمة: باهي
طلعت ليلى ومالقت حد رجعت مشوا قعمزوا على كراسي الانتظار بجنب الاستعلامات
بجنبهم وحدة لابسة حجاب والواضح أنها عربية فاطمة شبحت لليلى تفكري في لنفكر فيه
ليلى: ايه ايه هيا نمشوا نكلموها
ناضوا الزوز ووقفوا عالعائلة
فاطمة: السلام عليكم صباح الخير
المرأة: شافتهم نساوين ناضت وسلمت عليهم تفضلوا قعمزوا
فاطمة: أنتي ليبية
المرأة: ايه ليبية حتى أنتي
فاطمة: باهي لطحت في بنت بلادي الحمدلله
المرأة: تفضلوا ناقصتكم حاجة أي خدمة
فاطمة: احني شوي طيارتنا وجينا مع عيلة ثانية بس هما طلعوا واحني نبوا نسلموا المفتاح ونلغوا الحجز هنا وماعرفناش كيف مانعرفوش انجليزي
الراجل: ناض مش مشكلة يأختي ارتاحي وهاتي المفتاح نكلمهم باسم من هو
فاطمة: باسم علياء ###
الراجل: تمام اعتبريهم تم
المرأة: تفضلوا قعمزوا
ليلى: لالا خلينا هكي مرتاحين
المرأة: على راحتكم
الراجل: جي تميتلكم أموركم والحساب مدفوع
فاطمة: باهي شكرا بارك الله فيك
الراجل: لو تجي لعندي بنت بلادي محتاجة خدمة مانخدمهاش كيف بنقابل اهلي بعدين
فاطمة: الحمدلله الحمدلله مازال فينا الخير
ليلى: هيا ياخالتي السيارة وصلت
فاطمة: هيا مع السلامة وشكرا ليكم مرة ثانية مش حننساهالكم وان شاء الله يجي يوم ونردهالكم وان شاء الله ربي مايخليكم في ضيقة زي ماحليتولي ضيقتي ويفتحها في وجهكم وين ماتمشوا
الراجل والمرأة: ابتسموا على لطافة فاطمة ودعواتها ان شاء الله يارب ان شاء الله
خدن شناطيهن وطلعن
وليلى كان واصلة لحد مناخيرها طايرتلها معقولة ماكلفتش روحها تجي تشوفنا شن لازمنا كيف كملنا أمورنا شن تبينا نطلعوا زي الهاربين
فاطمة: حطت يدها على كتف ليلى هدِّي روحك ياليلى واهو القينا من يساعدنا قلتلك ربي مايخلي حد وربي يديرلنا طريق اهو جاب هالناس قدامنا مش يخدمونا
ليلى: لكن هي مفروض جت مش هكي تحطنا في موقف
فاطمة: كلامك صح مية في المية مافيش خطا لكن الله غالب يابنتي ماعندنا مانديروا المهم اهو مروحين للميتم ونرجعوا لحياتنا براحة ودرة تصير حدرة هيا وأمريكا ومايجي منها
أنت تقرأ
بريق الأمل & الدنيا حكاية
Misteri / Thrillerرواية ليبية من مجموعة قصص الأيتام الفقد والفقر والنجاح والاستقرار والصعود نحو الأعلى لعدة شخصيات معانا مش شخصية وحدة
