بريق الأمل & الدنيا حكاية

بريق الأمل 4

#بريق_الأمل
الحلقة 4

عندما تفقد الرغبة في عتاب من تحب فأعلم أنك شيعت حبه إلى مثواه الأخير
يأتي علينا زمان تكون قلوبنا أبرد من الثلج لايهم من هو أمامنا وكم تمنينا أن نلتقيه بالأحضان ولكنا مشاعرنا بردت كبرود الطبق وهو ينتظر من يأكل مابداخله

علياء: الدير في الإجراء نقل ملكية ووزوجها من أمريكا عاطيها جميع الصلاحيات المهم ترجع بعلاج بنته لقلبه مفطور عليها وكتيب عائلة لليلى وأمور الفيزا وامور السفر

بعد ماكملت مهامها ومازال يوم عالسفر مشت للميتم عشان تشوفهم قاعدين على عهدهن أو رخو بيها
نزلت من السيارة وفتحلها السائق الباب وحولت نظارتها وخشت دقت الباب
فتحتلها مفيدة تفضلي
خشت القتهم مدايرين حفلة لليلى دعم ليها وحتى لو صار وماعاد رجعت تقعد ذكرى حلوة ليها لكن وين بتمشي قاعدة هما متأملين بعد تمشي وقلب أمها يحن وتقعد معاها وتعيش حياتها أحلى عيشها خلى نشوفوا شن يستنى فيها

خشت عليهم علياء وين مامدايرين الاحتفال والدنيا سكتت بغرابة ومن يتسأل من هذي ومن لمبهور لبلسة وأناقتها كانت وين شن جابها بجنبهم ونصهم متوقعينها وحدة جاية تقدم في تبرعات أو بتتبنى واحد منهم
علياء: أستاذة فاطمة ممكن شوية
فاطمة: كملوا وجايتكم تعالي ليلى

وصلوا للمكتب:
قعمزت علياء: أنا كملت الأوراق واعتراف بليلى ونقل الملكية وبطاقات السفر وجواز السفر حتى هو كملوهم بسرعة لأنه حالة طارئة ان شاء الله قاعدين على اتفاقنا
فاطمة: مش احني لنرخوا يأستادة علياء
علياء: مدتلهم ورق المصنع لبيفتحوه أنا مش عارفة شن لبتحطوا فيه خليناه فاضي نسلملكم فلوس لو بتخدموا بيهم وهكي نكون كفيت ووفيت
ليلى: ضحكت على قد ماديري مش حتوفيني حقي هذا كله رزق ويوم تسألي عن أولادك شن بتقوليلهم عطيتهم فلوس ومال
علياء: شبحتلها وشبحت لفاطمة شن أنتم تنازلتوا
ليلى: لا ماتنازلناش هذا حقي وبناخده وحنمشي معاك بس لأني إنسان وفيا ضمير صاحي ويبي يخدم إنسان ضعيف
علياء: تمام تبوا تمشي تشوفوا الهنقر
فاطمة: ياريت
علياء: الباص مدفوع التكاليف عام كامل وبعدين منكم وهو واقف برا وأنا وفيت بوعدي كامل
طلعوا وراها ومجموعة من البنات في الميتم الكبار وركبوا الباص
ووصلوا لمكان المطلوب كان متبهدل شوي ويبي صيانة وخدمة فيه ليه سنين مسكر
علياء: يبي تنظيف وشوية تصليحات يكون كامل
فاطمة: تمشي وتتفرج كويس كويس تلفتت لعلياء أمتى السفر
علياء: غدوا ان شاء الله
فاطمة: قديش الفترة لممكن نقعدوا فيها غادي
علياء: من شهر شهرين
فاطمة: هزت براسها فترة طويلة لوحدة وراها خدمة لكن معليشي كله يهون لليلى
علياء: غدوا الساعة عشرة الصبح يجيكم السواق مش يوصلكم للمطار وأنا نكون مستنيتكم في المطار
فاطمة: تمام ان شاء الله خير
علياء: ان شاء الله مع السلامة وطلعت روحت وهما كملوا تفريجهم ومخططاتهم شن بيديروا والتركينة هذي بيديروا بيها وغيره من الحاجات طلعوا كان السواق متاع الباص يستنى فيهم وروحوا للميتم وكلهم حلم وكلهم تفاؤل وكلهم أمل الأمل كان موجود في عيون وعنده أمل في نهاية هالطريق فيه بريق أمل موجود لكن دبة دبة لعند يوصلوا لنهايته مايبي غير الصبر