بريق الأمل & الدنيا حكاية

الدنيا حكاية 12

#الدنيا_حكاية
الحلقة 12

ماأجمل أن يعوضك الله بعائلة جديدة تعني لك الأب والأم عوضاً عن العائلة التي فقدتها اللهم عوضاً وسكينة وراحة

تلك هي الأحاسيس الجميلة التي نشعر بها كل من هم حولنا يهتمون بنا ويعتنون وكأننا أصبحنا جزءً من روتينهم اليومي وأصبحنا قطعة من القلب

روحت لطيفة وهي مطمنة على آية شافت في عيونها العائلة وشافت العائلة الحب والاهتمام الواضح عالبنت عاكس على وجهة، كانت حياة ماهر لعاشها خلى لطيفة ومفيدة مايخطوش أي خطوة لمايحسبولها ألف حساب هذي أمانة في رقبتهم لازم يسلموها للشخص الصح والعيلة الصح لأنه حياتهم مش لعبة بين ايديهم القصة ومافيها هذي حياة انسان حياة واحد فيه روح حياة واحد عنده إحساس يشعر ويتألم ويتأذى زينا زيه لازم نفكر في كل شي لقدام هذا مستقبلهم لما ندير فعل أي شي نفكر شن يصير شن مايصيرش من ممكن يتأذى من وراها من ممكن يكون ضحية لغلطتنا لتقصيرنا في جانب من هالجوانب لفي خدمتنا أو في حياتنا، نحن كلنا مسؤول سوى في الحوش مسؤولين عن عيلة في المستشفى مسؤول عن حياة ناس سوى في المدرسة مسؤولين عن مستقبل العالم كله لأنه بنطلع منها جيل سوي أو غير سوي نحن مسؤولين وكل مسؤول مسؤولٍ عن رعيته

روحت لطيفة ومفيدة للميتم مفيدة مشت للمشغل ولطيفة عندها خدمة غيرها خشت لمكتبها تشوف في الأوراق وملفات
خش ماهر خالتي لطيفة
لطيفة شافتله ماهر كيف حالك اليوم
ماهر قرب منها وين مشيتي
لطيفة مشيت مشوار وجيت أنت شن كنت الدير
ماهر كنت نلعب مع مراد
لطيفة باهي كويس خدت الملفات أنا عندي مشوار قريب ونجيك تمام
ماهر هز براسه ومشي يكمل لعبه

لطيفة كان مشوار للمدرسة بتسجل ماهر وعلي ومراد حتى يقرو ويتعلموا سادهم ماضاع من عمرهم
خشت للمدرسة وسجلتهم عندهم
المدير كما دكر انه اسمه علي المدير الذي كل مايشوفها يتلخبط ومعجب بيها وعيونه يقعدوا قلوب .... اااااا استاذة لطيفة مرحبتين بيك تفضلي تفضلي قعمزي
لطيفة شكرا ليك أستاذ أنا جاية بنسجل ثلاث طلاب
المدير باهي الحمدلله المدرسة كيف بادية اعطيني الملفات مدتهله وخداهم قعد يشوف فيهم بس هذوما أعمارهم كبار مفروض يكونوا خامس ورابع وثاني
لطيفة للاسف العائلة لكانوا عندهم كانوا حارمينهم من الدراسة وأنا نبيهم يقروا ومايخلوش العمر لضاع منهم مايأثرش عليهم
المدير كلام جميل جميل جدا خليهم غدوا يبدوا في الدوام ووقع عالأوراق
لطيفة ناضت تمام شكرا أستاذ وجت بتطلع
علي عفوا يأستاذة لطيفة
تلفتتله لطيفة تفضل أستاذ علي
علي وهو متوتر ويطربق في صوابعه أنا أنا نبي اااأنا وغمض عيونه نبي نخطبك
لطيفة بس لعارفاته أنك متزوج يأستاذ
علي مافيهاش باس لو خديت الثانية
لطيفة بس أنا عندي فيها باس مانخربش حوش غيري وشكرا وطلعت

بعد ماطلعت لطيفة علي نقهر هو متمني يتزوجها بس عنده هالمرأة هالعرقلة لقدامه بعد انتهى الدوام روح وفش غله في مرته وضربها طريحة وطلقها مرة وحدة

لطيفة روحت للمشغل وحكت مع مفيدة وجهزولهم كل شي للمدرسة وكانت فرحتهم غير فرحة المدرسة كأي ولد أول يوم ليه للمدرسة بعد ماكان محروم منها
في اليوم لبعده سقدتهم للمدرسة وسكرت الباب ودق بعدها رجعت شافت من القتها مرأة توقعتها جاية بتتبنى أو أي شي تفضلي يأختي مشت هي وياها للمكتب وأشرتلها تقعمز ... تفضلي أختي
المرأة نبيك تبتعدي عن راجلي أنتم هذا حالكم لما تعنسوا تقعدوا تجروا وراء راجل متزوج أنتي سبب في خراب حوشي أنا الطلقت وصغاري بعيدين عليه شن تبي منا قوليلي شن تبيه حتى تبتعدي عن راجلي
لطيفة نصدمت من كمية هالكلمات الجارحة لعاشت طول عمرها سمعتها طيبة بين الناس وتنضرب بيها المثل اليوم تجي مرأة ماتخلي ماتسمعها ... أنا مافهمتش أما راجل وأما عانس يأبلة أنا ماجريت وراء حد لحتى تجي تحاسبيني وتهدديني لهنا وبس وصلت معاك الوقاحة عندك مشكلة مع راجلك حليها معاه مش تجي تفشي غلك في غيرك فيك تتفضلي من غير مطرود
المرأة وقفت بلكي تحسابيني صدقتك مش عارفة  من هو مدير المدرسة علي أو نسيتيه يأبلة وطلعت
لحقت وراها لطيفة للاسف يأبلة راجلك هو ليجري في جرتي امشي حاسبيه هو قبل ماتجي تحاسبيني لآخر مرة قلتله أنت انسان متزوج وأنا مانخربش في حوش غيري لو نبي راهو ماكانش هذا حالي انا في السنة هذي بس خطبوني ثلاثة عزابية لو نبي مش لازمني راجلك وخشت
والمرأة نصدمت وسكتت وطلعت روحت
هي فعلا جت للمكان الغلط وحاسبت الشخص الغلط هذا حالنا نحن البشر دائما نشوف الأشياء بحسب منظورنا نحن ونتهور ونقول في كلام قبل مانفهم حتى

لطيفة خشت وتتنفس بعصبية وغيظ من علي هو بسببه هي لليوم ماتلفتتش حتى ليه ولا دايرتله اعتبار بس اليوم بسببه جت مرته وأهانتها وماخلت كلمة وماقالتهلها وكلمة عانس هذي تكفي مشت ركبت تجري لدارها لبست وطلعت ومشت للمدرسة على رجليها من العصبية ماحست بشي لعند وصلت فيها دقت الباب واستأذن لها بالدخول وخشت وهي ماتشبح شي قدامها
علي شافها استاذة لطيفة ان شاء الله مافيش مشكلة
لطيفة نبي نسألك سؤال وجاوبني عليه أنا سمحتلك انه تتكلم عني للناس
علي حشاك ابداً
لطيفة نبي نفهم كيف مرتك اليوم تجي لعندي وتهددني وتسمعني كلام عمري وحياتي ماسمعته أنا لليوم محافظة على سمعتي مايجيش في يوم حضرتك تهدمهلي في لحظة يأستاذ أنت وزوجتك
علي بس أنا طلقتها عشانك
لطيفة هذا راس الخيط أنا مانبيكش يأستاذ وبطلاقك بيها زدت تأكد على كلامي لو سمحت ابتعد عني وعن الكلام عليه لأنه سمعتي تهمني لو فسدت سمعتي في العشرات من الأطفال سمعتهم الضيع من وراي فلهذا لو سمحت ابتعد عني وطلعت وهي واصلة حدها
وروحت وكان يومها مافيش خدمة روحت مفيدة بكري القت لطيفة مقعمزة وسارحة بروحها
مفيدة لطيفة بنتي خيرك شن صاير
لطيفة انتبهت ليها شافتلها وهي دمها محروق لو سمحتي خالتي نبي نقعد بروحي مانبيش نحكي شي لعند نحس روحي كويسة نجي نحكيلك
مفيدة على راحتك بنتي وطلعت وسكرت الباب وراها
دعوا للناس فُسحة في عُزلتهم، ما دُمتم تعلمون أن راحتهم بها؛ فلربما يبتعد المرء عن صُحبته، وهو في أشد الاحتياج ليبقى بمُفرده، ربما لم يعد يجد نفسه مُطمئنًا إلا بين حوائط غرفته، لا تسألوا عن أسباب عُزلته، لا تفسدوا الود بسوء الظن بينكم، لا تخمنوا أشياءَ لم يبُح بها مباشرة لكم، ولا تُلقوا بالًا لقيل وقال ما لم تسمعوا منه، فقط ادعوا له بالخير غيبًا، والتمسوا له العُذر دومًا، حتى وإن طال غيابه؛ أشعروه أنه لم يغب عنكم، هو اليوم في ضائقة، وأنتم بالغد القريب مكانه؛ تعددت أسباب العُزلة وليس الحُزن بواحدٍ.

.
.
.
يتبع الأحداث الجاية