#الدنيا_حكاية
الحلقة 2
لكل شخص حكاية تروى لأجيال المستقبل عن رواية
في نهاية الدوام
مفيدة: تشوف في البنات لكملت شغلها تستلمه منها عشان غدوا يسلموهن لعند وصلت في صبرية ... ماشاء الله على ايدياتك ربي يبارك
صبرية: وقت تعوزي الديري أي شي ومعاها تتقنيه
مفيدة: مزبوط كلامك ان شاء الله استلمي من لطيفة
صبرية: ان شاء الله بارك الله فيكم لو فيها كيف عادي نجيب ولدي معاي هو مايعيطش وصغير
مفيدة: جيبيه عادي مافيش مشكلة المهم تكملي شغلك في وقته ومايضيعش الوقت
صبرية: لا ابدا
صبرية: مشت للطيفة خدت منها يوميتها وروحت وهي فرحانة خدت حاجات لولدها وروحتله بيهم وكان أول إنجاز داراته في حياتها
روحت لطيفة ومعاها صغار الميتم
مفيدة: والله حال المرأة يسخف هلبا
لطيفة: ربي يكون في عونها شن بيكون حال ولدها ياناري مسيكين والله بكري تحكيلي وتبكي معاها سخفتني
مفيدة: ربي يكون في عونها
لطيفة: الحاجة هذي من أهم الحاجات لتخلي الام تحط ولدها في ميتم ماعندهاش القدرة تربيه أو توكله
مفيدة: وشن يضمنلها إنه لفي الميتم بيكونوا كويسين معاه
لطيفة: في الأخير مش حيجوعوه ومش حيخلوه بلا دبش ممكن يكون حاله عندهم أكثر من عندها
مفيدة: صح كلامك وفيه حتى لتروح لحوش أهلها يقولوا مادخلناش فيه وفيه لتتزوج ويقول راجلها مادخليش بيه شن بالدير في الحالة هذي
لطيفة: وفيه لزي حالتي خوتها يتعازموا عليها ومافي حد يبيها اختارت الطريق لتريحها وتريحهم
مفيدة: خوتك قلوبهم ميتة ليك فوق من 15 سنة لا واحد قال وين أختي ولا شن صار فيها ميتة عايشة عار عالتريس عار لا حول ولاقوة إلا الله
لطيفة: ابتسمت رغم الألم خالتي تأخر الوقت امشي ارقدي تعبتي اليوم
مفيدة: باهي تصبحي على خير
لطيفة: وانتي بخير
لطيفة: قعدت بروحها ومع حال السكون وعتمة الليل تنفتح الجروح ... ناموا فإن الليل رغم سكونه وطنُ الجراحِ ومسكنُ الآلامِ... نزلت من عيونها دموع الرحمة لطفاً بحالها تذكر فيهم زمان وين هي صغيرة ومعاهم ومعاها أمها وبقت على الدكريات أملٌ في اللقاء
كم مرة تجمنا الذكريات تحوم حولنا نتمنى تعود يوماً لنعاد اللقاء
ظهر الصبح بإشراقته الجميلة وأشعتها المشرقة
ناضت لطيفة بالسيف لأنه طول الليل مارقدتش وتوا وضعها مش زي زمان توا هي المسؤولة عالميتم وعالأطفال في رقبتها
نزلت صبحت عالكل ومشت لمكتبها خدت الملفات لكانت موتيتهم
مفيدة: خشت عليها وين ماشية
لطيفة: بنمشي للمدرسة الملفات وتيتهم بنرفعهم خلى يلحقوا باش يقروا مع الطلبة
مفيدة: ابتسمت ربي يوفقك يابنتي والله كأني قاعدة مع فاطمة خديتي منها كل شي كيف الديري الميتم عالساكت لعند تكملي كل شي
لطيفة: ضحكت خالتي راك تنسي طلعتنا بعد مانروح بنخيولهم قرمبيولات للبنات وقمصان للأولاد
مفيدة: حاضر من عيوني
لطيفة: تسلملي عيونك هيا مع السلامة
مفيدة: ربي يوفقك يابنتي ويعطيك ماتتمني زي ماتجري عشان هالصغويرة باش يقرو ويتعلموا
أنت تقرأ
بريق الأمل & الدنيا حكاية
Mystère / Thrillerرواية ليبية من مجموعة قصص الأيتام الفقد والفقر والنجاح والاستقرار والصعود نحو الأعلى لعدة شخصيات معانا مش شخصية وحدة
