بريق الأمل & الدنيا حكاية

بريق الأمل 11

#بريق_الأمل
الحلقة 11

عندما نكون لا شي يرسل الله لنا نكون له كل شي
بدأت زينب حياة جديد مع خديجة مدايرتها زي اميمتها تساعد فيها وتعاون ويد بيد هي وياها وسعيدة هلبا زينب بحياتها الجديدة

اليوم عرس ليلى أعراسنا زمان نصهم في يوم عرسهن العروسة تلبس رداء الحرير وذهب لمالي ايديها ورقبتها والعريس يلبس زبون والشنة عالراس ويامحلى أيام زمان
بالنسبة لأعراسنا كانت سبع أيام وسبع ليالي ودقيق الشعير معوم وواتي والكسكسي يلتموا عليه الأحباب ويبرموه في الحوش ومايجي العرس إلا هو واتي ويديروا الجيران والأقارب يديروا الحلويات العرس من غريبة وكعك مالح وحلو ومقروض والدنيا حايصة بايصة
والأولاد برا يضموا ويبخوا عشان يرقد التراب عشان بينصبوا فيه الخيمة والجار فرحان قبل الدار والجيران الحومة ليجو من غير عزومة قبل العرس تلقاهم شهر معاهم يعاونوا ويضموا معاهم وليبوه يجيهم لعندهم يامحلاها أيام زمان أيام الود وأيام المحبة أيام التعاون وأيام لما تفرح الناس كلها تفرحلك توا الحاسد أكثر من فرحانلك

عند أهل العريس
مبروكة ترقص في الحلقة وفرحانة بوليدها والناس والجيران معاها ايد بايد في العرس سلم ناسك يابية من العوالة للسهرية
كان عرسهم حلو يوم الكسوة ويوم الحنة ويوم بيروحوا بالعروس وبعدها عندهم يوم الثالث ماعندهمش محضر وماتمشيش العروس لحوش أهلها بعد العام وهلبا عادات زمان نصهم سيبانهم شبه قعد العرس يوم والدنيا تفضى بعدها

عند أهل العروسة فاطمة تبيه عرس تقليدي ليبي على أصوله كل شي بالعادات زمان الحلوة

مافي حد براني عليهم لموجودين في الميتم ومعاهم خديجة وزينب
يوم الحنة دايرين بيها دويرة في دار ومقعمزينها يحنوا فيها ومعاهم زوز نساوين من أهل العريس زمان ضروري يحضروا ويغدوهم ... يانار الجريدة يادخاخينها ياوحشة لبنية على وخيينها يانار الجريدة يادخانها ياوحشة البنية على جيرانها وأغاني بو طويل ودربوكة والجاوي الفاسوخ الدنيا تعطرق والأجواء العرس الجميل
مش مدايرين كسوة لهو جابوه مع يوم الحنة لكان قبل يوم الكسوة

في اليوم لبعده كانوا نساوين لايدين عالعروس يضفرولها في شعرها زوز سوالف ولبسوها الردي ودهبها وقعمزها وقعدوا يغنوا عليها وفي يومتها العشاء على عرب العريس زي مايكون زمان ومشوا عالمغرب لأهل العريس بقشيشهم كله ومشت العروس عالجمل مزينينه بشكل حلو يطلق عليه اسم الكرمود أو الجحفة نسمعوا بأمهاتنا يقولوا يوم الجحفنة أو يوم الكرمود جاية من العروس لما بيزفوها عالجمل وعند دول ثانية يطل عليه الهودج أو تختروان منهم مصر وفلسطين
وليومنا هذا فيه مناطق في ليبيا قاعدة عندهم العادة هذي "-🐪عادات وتقاليد ليبية  لي قبيلة "المقارحه"   الباصور" الجمل لزفة العروس ونقلها إلى بيت #الزوج في مناطق الجنوب مازالت قبيلة المقارحه  تحتفظ بهذه العادات إلى يومنا هذا  "