#الدنيا_حكاية
الحلقة 15
لو تمكنت من رؤية قلوب البشر لرأيت في كل قلب " قصة وجع " فلنرحم بعضنا بعضاً لعل الله يرحمنا
في اليوم التالي
لطيفة مقعمزة في الدار تطبق في دبش ماهر وهو مقعمز بجنبها ... ماهر ماتنسانيش ديما تعال زورني
ماهر تو نقوللهم يجيبوني
لطيفة تو بيقعد عندك أم اسمها هاجر وأب اسمه محمد زي اسم بوك بالزبط
ماهر ابتسم حقا قصدك نفس اسم بوي
لطيفة ايه فلهذا نبيك تناديه بوي واعتبره بوك بالزبط سكرت السريتة
قمر ماهر نبي نعطيك القلم خليه يقعد ذكرى عندك
ماهر شكرا قمر
لطيفة ابتسمت على براءتهم كيف يودعوا بعض
رن الجرس وناضت لطيفة فتحت الباب كانوا كانوا أهل ماهر جايين لياخدوه
هاجر بسعادة كيف حالك أستاذة لطيفة
لطيفة تمام الحمدلله تفضلوا مابين ماناديت على ماهر
هاجر نستنوه حتى هنا عادي
لطيفة على راحتكم وخشت ومشت لدار ماهر ... ماهر هيا أمك وأبوك جو تعالى معاي
ماهر بزعل حاضر ومشي
ولطيفة خدت شنطته وطلعت ومشت باتجاه الباب وحطتلهم شنطته ... مانبيش نوصي عليه
هاجر ماتوصيش على حريص لطيفة
لطيفة نزلت لمستوى ماهر وحضناته ماهر حبيبي دير بالك على حالك واهتم بنفسك ونوصيك تهتم بأهلك تمام
ماهر هز براسه تمام
لطيفة مع السلامة
ماهر دارلها بيده 👋
ركبوا السيارة ومعاهم ماهر وانطلقوا لحوشهم
مراد خالتي لطيفة وأنا أمتى بيصر عندي أهل
لطيفة ابتسمتله عن قريب ان شاء الله أنت بس أصبر
مراد خالتي أنتي ليش هنا وين أهلك حتى أنتي
لطيفة تنهدت بألم وبسؤاله فتح جروح الماضي لتحاول تنساها مع مرور الزمن ... أنا يتيمة زيي زيك وأنا بعد سنين استلمت إدارة الميتم بعد وفاة المديرة
مراد يعني أهلك توفوا زي أهلي
لطيفة للأسف حتى أهلي توفوا زيهم
مراد حضنها لا تخافي ياخالتي أنا حنقعد معاك ونحميك من الأشرار ونكون زي السوبر مان
لطيفة ضحكت من وسط دموعها على لطافة مراد ان شاء الله ياوليدي ان شاء الله وربي يبعد علينا الأشرار
مراد أنا اليوم عندي واجب هلبا هلبا نبي نكتب وتكتبي معاي
لطيفة ابتسم حاضر من عيوني امشي جيب كراساتك وتعال للمكتب
مراد تمام ومشي يجري جاب شنطته وجي وطلع كراساته وقعمز جنبها وفتحهم وبدت هي وياه
قمر خشت عليهم أنا بنزعل هلبا
لطيفة انتبهت ليها ... ليش
قمر لأنه بعد ماهر بتهتمي بمراد أكثر مني 🥺
لطيفة ناضت وجابتها بجنبهم شن هالكلام ياقمر أنا عندي كلكم زي بعض ومراد طلب مني نساعده في الواجب وأنا ساعدته زي مانساعد أي حد
قمر شن لمراد بغل كانت غايرة منه
لطيفة قمر عيب مراد قري متأخر مفروض كلنا نكونوا معاه ونساعدوه مش ننغروا منه صح
قمر طلعت حامقة
وغيرة صغار من بعض ديما تصير حتى بين الإخوة مش يابالك في ميتم زي هذا
مراد خالتي شن بتساعديني
لطيفة شافتله ماعرفتش تمشي ترضي قمر أو تساعد مراد فلهذا اختارت مراد لأنه قمر غالطة هلبا وشي هذا لازم من حل لو مشتلها كانت زادت ... هيا جاية يامراد هيا اكتب وأنا ننتبهلك لو كتبت غلط
مراد يكتب وهو سعيد وانه فضلت لطيفة تقعد معاه وفاتت قمر المغرورة
لطيفة شبحتله على جنب وابتسمت تدكرت زمان هي وليلى أول أيامها وكيف تعودوا على بعض... مراد
مراد همممممم
لطيفة شن رايك تجي ساعدني وندير كيك
مراد بحماس هييييييي
لطيفة ابتسمت كمل واجبك قبل تمام شوي وجاية ومشت لقمر القتها زعلانة قمورة حبيبتي
قمر مابتش ترد عليها
لطيفة خلاص تو نمشي نطلب من مراد يساعدني وأنتي اقعدي
قمر ناضت لا بندير معاك
لطيفة ابتسمت الحقيني للمطبخ
أنت تقرأ
بريق الأمل & الدنيا حكاية
Mystère / Thrillerرواية ليبية من مجموعة قصص الأيتام الفقد والفقر والنجاح والاستقرار والصعود نحو الأعلى لعدة شخصيات معانا مش شخصية وحدة
