بريق الأمل & الدنيا حكاية

الدنيا حكاية 10

#الدنيا_حكاية
الحلقة 10

ينتابني شعور دائماً أنني سأكون سعيداً في أي مكان آخر غير الذي أتواجد فيه
هكذا هو شعور ماهر ورفاقه كان عنده الحياة خارج المنزل حرية أفضل بمية مرة من لعايشينه بس وين بيمشوا مادام هما عارفين أنه هذا بوهم وهذي أمهم هو في حد يسيب أهله لا

مرت سنة وسنتان وثلاث فيهم ماهر مع هذه العائلة الكئيبة وزادته كآبة وكانت على غيرهم أيام حلوة وسعادة كالعائلة المتبنية آية بعد سنتين انزادت عليهم بنت سبحان الله وقدره وكأنه ربي يجازيهم على حسن عملهم وصبرهم وكفلهم لليتيم جازاهم بصغار يحملوا اسمهم ودمهم "ربي في الوجود مايخلي حد وقادر على كل شي "
ومعاملتهم مع آية ماتغيرتش بل زادت هذي هدية ربي بعتلهم وقعدت بنتهم وأحسن وكأنها جايبينها حتى هي
هذا القدر مكتوب لنا أن نعيشه وأمره محتوم ولا بد أن نمشي في هذا الطريق

في يوم من الأيام عند ماهر وعائلته كانوا لحوازة عندهم رافعينهم معاهم
ليلى حي نسينا الملح
جمعة ديري حتى من غير ملح
ليلى لا كيف بلا ملح علي امشي للحوش وجيبلنا ملح وتعال
كان الحوش مش بعيد عالحوازة يمشي على رجليه ويجي من سيارة
مشي علي للحوش وهو وصل للحوش وخدي الملح وقعد يفكر وقرر بينه وبين نفسه مافيش فرصة غير هاليوم يهرب فيها ويتريح من هالحوش وهالعيلة وهو مش مضطر يعيش معاهم لأنهم مش أهله مش مضطر يعيش في معناة وعيشة كلاب حشاكم وعيشة الشوارع قاعدة أحسن منها... مشي يجري للدار وخدي شنطة كتف كان جايبها معاه لما جي عاش معاهم حط سورية وسروال ومشي للمطبخ حط فردتين خبزة وجبنة لأي طارئ وطلع برا شاف يمين ويسار مالقي حد وطلق شبشبه زي مايقولوا ويبدا يجري ويجري من غير توقف

عند هالعيلة
جمعة الولد عطل وين مشي
ليلى امشي شوفه وين
جمعة باهي تو نمشيله غير هالشغلة لدرتيهلنا
ومشي جمعة للحوش دور عالولد مالقاه تقول انشقت الأرض وبلعاته ... دور وعاود يدور في الحوش وفي السور وطلع للشارع شاف يمين ويسار ومشي يجري للحوازة وهو داهش
ليلى لما شافاته لين رعشت ... جمعة شن فيه وين علي
جمعة هرب الولد هرب دورته ومالقيتاش
ليلى قعدت تندب دورت عليه زين بالك في الحمام
جمعة تي قريب قلعت الساس ودورته تحته مالقيتاش وقعد يصفق بايديه كأنه انشقت الأرض وبلعاته
ليلى التفتت لماهر ومراد بتفنيص أنتوا تعلموا بيه وين
ماهر وكان خايف يرعش ومراد مش أحسن منه لأنه عارفين هالتفنيص شن وراه
مراد لا مانعرفوش
ماهر هز براسه لا رجعتله حالته يتكلم بالاشارات ومايخالطش الناس 💔
ليلى بتهديد والله ثم والله لو نعلم بيكم تعرفوا وين مشي نهاراتكم سود على روسكم 
جمعة خلاص ياليلى هذي مش مشكلتنا توا الولد وين مشي يوصلوا فيه الشرطة والدنيا ويخبرهم شن نديرولهم نمشوا فيها
ليلى خافت من لمتوقع يصير لمت الدنيا لجايبتها وشحت ماهر ومراد من دبشهم ودخلتهم للسيارة وروحوا
جمعة بنمشي نقدم طلب ضياع عن الولد
كان المركز بجنبهم مشي على رجليه وخش داخل للنقيب ... السلام عليكم
النقيب وعليكم السلام أستاذ جمعة تفضل آنست
جمعة قدم وسلم عليه وقعمز يزيد فضلك جاي بنقدم عن ولدي ضايع
النقيب من أمتى اختفى
جمعة ليه هكي فوق من الساعتين بعتناه للحوش لما روحنا مالقيناشي
النقيب بلكي طالع يلعب مع الصغار أو ماشي لحد
جمعة لا أنا صغاري مايطلعوش من الحوش وماعندهم حد يمشوله
النقيب فيه عندك ليه صورة
جمعة لا لكن حوشنا قريب نمشي نجيب صورة ونجي