بريق الأمل & الدنيا حكاية

بريق الأمل 10

#بريق_الأمل
الحلقة 10

تأتينا لحظات نشعر بها كأننا ملكنا العالم من كثرة سعادة ولحظات من كثر ماهي حزينة وتعيسة كأننا خسرنا آخر أمل في الحياة
لكن رغم آلامنا هناك شعاع من الشمس يدخل لغرفتنا من وسط الظلام ليحل فجر الأمل نابع بالحياة

جت زينب: وهي مستغربة من مناداتهم ليها نعم تفضلي
خديجة: قعمزي يابنتي
زينب: تفضلي
خديجة: أنا جاية نبيك تعيشي معاي ونتبناك
زينب: أظن أنا وصلت لعمر مانتبناش فيه
خديجة: هو صح بس أنا وحيدة ونبي بنية تعيش معاي وديرني أمها ونديرها بنتي
زينب: تفاجأت بالكلام لتقول فيه المرأة وشافت لفاطمة
فاطمة: أنا مالياش سلطة عليك تبي موافقة امشي ماتبيش اقعدي زي قبل زي تالي
زينب: ابتسمت بصراحة ياخالتي قرار صعب نتخده في لحظة
خديجة: والله كان عندي وليد ووليدي قاعد معاي ماضال واخدتهلك لكن الله غالب وقعدت تبكي على حال ولدها لمشي ماعاد شافاته
ليلى: وجعها حالها برغم أنها مش فاهمة شي غير إنه عنده ولد ومفقود ربي يرجعهلك بالسلامة خالتي
خديجة: مسحت دموعها سامحوني بس على مر هالسنين قاعدة ماتوعدتش على فراقه قاعد فراقة سامطني في قلبي كأنه أمس بس امشي من بحداي
(ياما فيه من أمهات يبكوا ومحروقات على أولادهن لخداته منهن الموت عشان حرب او اغتيال أو خطف ربي يعين كل أم نزلت دمعة عشان ضناها وربي يصبرك )
زينب: تدكرت أمها وشافت الفرق بينها وبين المرأة أمها سيبتها لكن لقدامها قاعدة تبكي لأنه فارقها تبكي عليه ليها سنين كأنه أمس لكن أمها حدفتها في الميتم ومكملة حياتها وتجي ترضي ضميرها في العيد أنا موافقة نمشي معاك

*طريقي طويلة لكنني سأصل إلى ماأريد هذي ثقتي بالله كبيرة

خديجة: بفرحة من وسط دموعها ربي يبارك وان شاء الله ماتندمي والله نحطك وسط عويناتي
زينب: لكن نمشي معاك غدوا وأنا نخدم في مشغل للخياطة ونقرا في قرآن مانبيش نسيب شي منهم
خديجة: وليش نحرمك منهم نمشيلهم أنا وياك يابنتي
زينب: معناها غدوا نمشي معاك للحوش اليوم بنلم حاجاتي ونودع صديقاتي
خديجة: بفرحة ان شاء الله ان شاء الله هيا توا مع السلامة
بعد طلعت خديجة
فاطمة: متأكدة من لدرتيه
زينب: أكيد متأكدة مرأة جتني طلبتني وتبيني زي بنتها وأنا وين نلقى شي زي هذا
فاطمة: عرفتها متأثرة بموضوع أمها ... الأمهات مش زي بعضهن زي المرأة هذي لقدامك فقدت ولدها في الحرب من 7 سنين
(حروب زمان صارت من ضمنها حرب تشاد وأيام الحصار في قضية لكربي مش عارفة حرب أو لا لكن قضايا قديمة من ضمن الحروب حرب تشاد فيه هلبا ناس مشوا ولمات مات ولرجع بعد سنين لأهله وربي يفك أسر كل أسير ويرجع كل مفقود لأهله )
زينب: ربي يلطف بحالها ويرجعلها ولدها
فاطمة: هي قالت الناس قالولها مات لكن قالت أنا مش مصدقة حاسة إنها عايش
زينب: ربي يصبرها عليه
فاطمة: ان شاء الله والله بنستاحشك حتى أنتي بنفقد زوز في مرة وحدة
زينب: مشتلها حضنتها مش حنسيبوك بالنسبة لينا الميتم قعد حوش الهل وأنتي أمنا
فاطمة: ابتسمت ربي يحفظكن ليا
زينب: آمين خليني نمشي نخبر البنات طلعت ركبت لغرفتهن القتهن كل وحدة لاهية باللي الدير فيه
أول من تكلمت قدر: شن صار يازينب خيرها فاطمة
زينب: جت قعمزت بحداهن لأنه جاية وحدة بتتبناني
قدر: شبحتلها بفضول تبصري من هي
زينب: وحدة اسمها خديجة قاعدة بروحها في الحوش
لطيفة: ماعندهاش حد
زينب: قالت عندها ولد وقالولها مات في الحرب وهي لتوا اليوم تبكي عليه تقول مات أمس
ليلى: يالطيف ربي يصبرها على فراقه
زينب: آمين
قدر: ههههههه خلاص هذي اعتبرت روحها من العيلة وآمين ولقطات