ماريونت

١٠ - موخيتو بمقهى مانِّي

كان ماني يقف أمام إسلام واضعًا ورقة الحساب أمامه بينما إسلام كان متجهم الوجه يطالع الأرقام بحسرة فتمتم قائلًا " ٦٠٠ جنيه ، ما أنا برضو مكنش ينفع أقول الحساب عليا "

نظر إلى الورقة يقرأ محتوياتها بصوت عالٍ " خمسة سحلب...لعم محمد ، ليه دا يوم حنة ابنه عطاني أنا و رحيم طبق كريمة واحد نخمس فيه ، تلاتة موخيتو للحاج جمال.. الله يرحم ...أنا شايف كل واحد طالب بالأربعة و الخمسة سحلب و موخيتو و كركديه ..عالم جعانة منقييت الحاجات الغالية "

رفع إسلام عينيه عن الورقة و سأل ماني " هو انتم نزلتوا الموخيتو القهوة هنا امتى ، أنا كنت سايبكم من يومين شاي و قهوة و سحلب و عصير لمون جبتوا الموخيتو منين"

تنهد و أخرج الأموال و أعطاها إلى ماني و هو يتمتم " حار و نار "

كان كل من رحيم و طارق يحاولان ألا يضحكا لكنهما لم يقدرا فتذمر إسلام ثم تنهد و قال " الحمدلله على الفقر و الجدعنة "

ضحك طارق فعقب إسلام قائلًا " ارتحت ياخويا ، قول بقى هتخطب مين و امتى ؟! "

ابتسم طارق و قال " أنا نويت أخطب نور ، عارف إن مشوفتهاش غير حوالي تلت مرات و ده ميكفيش عشان أحدد أنا حبيتها و لا لا بس أنا منجذب ليها و حابب إننا نتعرف على بعض في إطار رسمي ، فاهمين "

أومأ له كلاهما و على وجههما ابتسامة مشجعة له فبادلهما الابتسامة و تنهد براحة ، قاطع لحظة صفوه تلك صوت إسلام و هو ينادي ماني حتى أتاه ، فقال " تلاتة موخيتو هنا يا حبيب أخوك "

________________________________

دلف رحيم إلى منزله فوجد والدته تجلس بابتسامة على وجهها بينما ضيق هو عينيه بشك و قال " قعدتك دي يا لبنى مش مريحاني "

ابتسمت و أشارت إلى المقعد بجانبها ثم قالت" تعالي بس يا حبيبي اقعد جنبي هنا "

ذهب إليها بتوجس فقالت " اقعد يا رحيم "

جلس كما قالت فاضافت و هي تضمه إليها " حبيب أمه هيتجوز ..أنا الفرحة مش سيعاني "

عقد حاجبيه و أردف " مين حبيب أمه اللي هيتجوز ده "

" إنت يا رحيم ، و بعدها بكام شهر تجيب عيال صغيرين كدة يقولولي يا تيتا "

" هجيبهم منين ؟ ، هو أنا هتكاثر ذاتيًا ؟! "

" لا ما أنا خلاص كلمت شيماء و حددت معاها معاد و هنروحوا نخطبوا زينة ، يلا تصبح على خير " أنهت لبنى كلماتها تلك و ركضت تتوجه إلى غرفتها ، فهتف رحيم قائلًا " ماشي يا لبنى ، بتاخديني في دوكة "

تمتم في قرارة نفسه " ليه مفكرين إني معجب بيها ...أنا فعلا معجب بيها بس ليه الشك "

___________________________________

" يعني ايه يا ماما ؟! "

" يعني اتفقت أنا و لبنى و هم هييجوا يطلبوكِ "