" أوعى يكون اللي في بالي"قال إسلام بابتسامة عريضة و هو يومئ" هو اللي في بالك"
أمسك طارق الهاتف و فتح أحد مواقع التواصل الإجتماعي «فيسبوك » فوجد منشورًا قام إسلام بتحميله على صفحته الشخصية و قام بالاشارة إليه فيه
« أهلي و أصحابي و كل الناس الحلوة ، الدكتور طارق يعني علاج الغضاريف يعني وداعًا لوجع الضهر يعني بالصلاة على النبي ضهرنا اتحمى بجد ، يعني الخشونة لو شافت دكتورنا تستخبى ، شاركونا فرحتنا كمان يومين في العيادة بتاعته» ثم أتبع تلك الكلمات بالعنوان الخاص بالمركز الطبي
و أنهى خطابه ذاك قائلًا « ألف مبروك يا طروق و عقبال دعوة الفرح قريب إن شاء الله »
تنهد طارق قبل أن يستشيط غضبًا و يهتف قائلًا " إيه الفرح الشعبي اللي إنتَ عامله ده يا غالي ، لا و كله كوم و عقبال دعوة الفرح دي كوم تاني و حاططلي جنبها وش بيغمز ما تعمل لنور منشن هي كمان "
" دورت على الأكونت بتاعها مش لاقيه"
اتسعت عينا طارق و قال " تصدق و تؤمن بإيه"
" لا إله إلا الله" رد عليه الآخر بتلقائية فتابع طارق قائلًا "أنا لولا الكرسي المهبب ده كان زماني راميك من البلكونة"
_________________________________
اتجه رحيم إلى ذلك الرجل فقالت شيماء بابتسامة
"صبري أخويا "اتسعت مقلتا رحيم و هو يطالع صبري في دهشة فحمحم صبري و قال " أهلًا يا ابني "
" أهلًا بيك يا لوا.... يا عمو "
جلس و هو يتوعد لزينة بداخله حيث لم تخبره أن اللواء صبري يكون خالها ، ولجت زينة إلى موضع جلوسهم مرتدية فستان أسود يصل إلى أسفل ركبتيها بقليل ذو أكمام شفافة بعض الشيء ، كانت تحمل أكواب القهوة ؛ لتقدمها إليهم ، فوجدت رحيم يرمقها بغيظ مضيقًا عينيه ، قال منير " طيب نسيبهم مع بعض شوية "
أومأ صبري و أردف مؤازرًا لرأي منير " أيوة ، احنا في الأوضة اللي جنبكم و الباب هيبقى مفتوح "
خرج الجميع فحمحمت هي دون أن تتكلم ، نظر إليها و قال " هو اللواء صبري يبقى خالو ؟ "
" ما أنا بعتلك إمبارح عشان أقولك بس إنتَ افتكرتني عايزة أطفشك "
تنهد و أمعن النظر بها ثم قال " أول مرة أشوفك بفستان "
ابتسمت بخفوت ابتسامة حاولت ألا تظهرها فحمحمت ثم أردفت " إيه الجديد في القضية ؟! "
" قضية إيه ...أمي و أمك هيجيبوا المأذون كمان شوية "
صمت هنيهة يراقب ضحكتها ثم تابع قائلًا " تعالي نتعرف من أول و جديد "أومأت له و قالت " ابدأ إنتَ "
" أنا يا ستي رحيم منير القاضي ، دكتور أمراض نفسية و عصبية و في نفس الوقت عضو في المخابرات ، هتسأليني ازاي طبعًا ..."
أنت تقرأ
ماريونت
Mystery / Thrillerمرحبًا بك في مسرح الحياة الغير عادلة حيث يتم التلاعب بك كما لو كنت إحدى دمى الماريونت ...