Surgeon (Completed)(Unicode + Zawgyi)

Episode - 6(Unicode)

     အပြင်ကပြန်လာသည့်နုထက်အိမ်ရောက်ရောက်ချင်း အခန်းထဲသို့တန်း၀င်သွားကာ အ၀တ်မလဲဘာမလဲနှင့်လှဲအိပ်နေတော့သည်။မိမိ၏တားမြစ်နေသည့်စကားများကို ပေါ့ပေါ့တန်တန်နားထောင်ပြီး ဂရုမစိုက်သည့်ဆာဂျင်ကိုစိတ်ဆိုးဒေါသထွက်သည်။မိမိကျမှဇာတ်နာနေသည့်ကံကြမ္မာ၏ဇာတ်ညွှန်းကိုလည်း ထပ်ခါတလဲလဲအပြစ်တင်ကာ ဘေးတစ်စောင်းအိပ်နေရင်း ကြမ်းပြင်ကိုလက်သီးဖြင့်တဒုန်းဒုန်းထုနေသည်။

     နှစ်ယောက်တစ်ဘ၀သာယာလှပနေသည့်အခိုက်အတန့်သည် သက်ဆိုးမရှည်ချင်၍ ဆာဂျင်က မုန်တိုင်းတစ်ခုသဖွယ်ရုတ်ချည်းတရကြမ်း၀င်ရောက်လာခဲ့၏။မိဘချင်းသဘောတူကြည်ဖြူနေသည့်ဤလက်ထပ်ပွဲကိုနုထက်ဖျက်ရန်အတော်ခက်နေပေပြီ။မိခင်၏သဘောဆန္ဒကိုမလိုက်နာပြန်လျှင် သားမိခန်းဖြတ်ခံရတော့မည်။ချစ်သူဒေါ်ဆုမြတ်မေကိုစွန့်လွှတ်ပစ်ရန်မှာလည်းမဖြစ်နိုင်။

       မကျေနပ်ချက်များကိုလက်သီးဆီသို့ပို့လွှတ်ကာအားနှင့်ကြမ်းပြင်ကိုထုနေခဲ့သည်။အခန်းတွင်းမှထိုအသံက ထရံခြားထားကာ ထရံကိုမှီထိုင်နေသောအပြင်ဘက်က ဒေါ်နှင်းနှင်းစိန်နားထဲ၌အတိုင်းသားကြားနေရသည်။မိမိစိတ်တိုင်းကျမဖြစ်လေသည့်သမီးအပေါ်ထွက်နေသည့်ဒေါသကိုထိန်းနေသည့်ကြားမှ အဆုံးတွင် -

"နုထက်ကုဋေ ညည်းဘာမကျေနပ်တာလဲ"

"ငါ့ကိုလာပြောစမ်း အထဲကနေနားမညီးနဲ့"

"အပြင်ထွက်ခဲ့စမ်း"

      မိခင်၏ခေါ်သံကြောင့်နုထက်နွမ်းလျနေဟန်ဖြင့် အခန်းပြင်ထွက်လာခဲ့သည်။TV ရှေ့တွင်သားမိချင်းဆွေးနွေးစကားပြောရန် ထုံးစံအတိုင်းခပ်ရို့ရို့လေးထိုင်ကာ ခေါင်းကိုငုံ့ထားရင်း စကားစလိုက်သည်။

"အမေ ဆာဂျင်ကိုမယူလို့မရဘူးလား"

"သမီးချစ်တာ ‌ဒေါ်ဆုမြတ်မေ"

"သမီးမချစ်တဲ့လူကို ဇနီးအဖြစ်သမီးဘယ်လိုစိတ်နဲ့လက်ခံရမလဲ"

"သူ့ဘက်ကဘာမှပြောစရာမရှိဘူးဆိုဦးတော့ သမီးလက်မထပ်နိုင်ဘူးအမေ"

"ညည်းသိပ်ယူကြုံးမရဖြစ်နေလားနုထက်ကုဋေ"

"ညည်းဟာမကိုသိပ်ချစ်တယ်ပေါ့"