စိုင်းစွမ်းထက်ပိုင် အိပ်ယာပေါ်က ထ,လိုက်တော့ ကာရံညီညာက စိုင်းစွမ်းထက်ပိုင်၏ လက်ကောက်ဝတ်ကို ဆွဲထားသည်။ စိုင်းစွမ်းထက်ပိုင်က ထိုင်လျက်ဖြင့် နောက်လှည့်ကြည့်ကာ မေးလိုက်သည်။
" ဘာလို့လဲ။ "
ကာရံညီညာက ခေါင်းရမ်းပြပြန်သည်။ စိုင်းစွမ်းထက်ပိုင်က ဖုန်းမှ နာရီကို ကြည့်လိုက်ပြီး ခြောက်နာရီထိုးခါစမို့ စောသေးတာမို့ ကာရံညီညာဘေး ပြန်လှဲကာ စောင်ပုံထဲ ပြန်ဝင်လိုက်သည်။ ကာရံညီညာက စိုင်းစွမ်းထက်ပိုင် အနားချက််ချင်းပင် တိုးကပ်လာကာ စိုင်းစွမ်းထက်ပိုင်၏ ဗိုက်ပေါ်ခေါင်းအုံးလာသည်။
" လူအရမ်းကပ်နေပါ့လား။ "
" ငါတောင်းပန်ပါတယ် "
" ဟမ် ... "
ကာရံညီညာက ရုတ်တရက် တောင်းပန်လာတော့ စိုင်းစွမ်းထက်ပိုင် အံ့သြသွားသည်။ ကာရံညီညာက စိုင်းစွမ်းထက်ပိုင်ကို မော့ကြည့်ပြီး အကြည့်ချင်းဆုံမှ ပြောသည်။
" ပြီးခဲ့တဲ့ရက်တွေက ငါ့ဘာသာ စိတ်တွေရှုပ်နေပြီး မင်းအပေါ်ပဲ ပုံချမိလို့။ မင်းစိတ်မကောင်း ဖြစ်ရအောင်လည်း ပြောခဲ့မိတယ်။ နောက်ပြီး မရည်ရွယ်ပေမယ့် ကိုယ်ထိလက်ရောက်လည်း လုပ်မိသွားတယ်။ အဲ့ဒါထက်ဆိုးတာက မင်းအပြစ်ကိုသာ မြင်ခဲ့ပြီး ငါ့ကိုယ်ငါတော့ မှန်တယ်ထင်ခဲ့လို့။ မင်းနဲ့ မခေါ်မပြောဘဲနေတယ်။မင်းဘက်က အလိုက်တသိနဲ့ ငါစိတ်ချမ်းသာအောင် နေခွင့်ပေးထားတာကိုလည်း ငါ့ကိုပစ်ထားတယ်ဆိုပြီး မင်းကိုပဲ အပြစ်တင်မိတယ်။ငါကအကြီးဖြစ်နေပါလျက်နဲ့ ဖြစ်ပြီး သွားတဲ့ ပြသနာကို ဖြေရှင်းရမယ့်အစား မင်းကိုပဲ အပြစ်တင်နေခဲ့မိလို့ တောင်းပန်ပါတယ်။ "
စိုင်းစွမ်းထက်ပိုင်က ပြုံးလိုက်ပြီး ကာရံညီညာ၏ ဆံပင်လေးတွေကို ခပ်ဖွဖွလေး ပွတ်သပ်ပေးသည်။
" ကျွန်တော်က နားလည်ပါတယ်ဗျာ။ တောင်းပန်စရာမလိုပါဘူး။ ကျွန်တော်လည်း အလုံးစုံ အပြစ်ကင်းနေတာမှ မဟုတ်တာ။ "
" မင်းနဲ့မပြေလည်တဲ့ အချိန်မှာ ခွဲနေရတာ တကယ်ဆိုးတယ် သိလား။ ပြေလည်ခါစရောက်တော့လည်း ဝေးရပြန်တော့ ငါ , မင်းကို တအား လွမ်းနေတာ။ "
YOU ARE READING
First Love , Perfect Love (Completed)
RandomMyanmar×OC အချစ်ဦး၊အချစ်ဆုံး၊လက်တွဲဖော်ဟာ တစ်ထပ်တည်းကျသောအခါဝယ် 8.2.2023 ___ 8.4.2023
