⚜️ الــــــجـــان ⚜️
سكينة سليماني
البارت 19:
شافت فيه بانكسار و نطقات كتمثل القوة
تاجة: و علاش انسمح ليك ؟ ...العبد لي كيقلل لحيا على سيدو خصو يتنفا و لا يتمحى ليه لاثر
عبد الله : انا عبد الله و عبدك بين يديك نحط راسي و نسلم امري لمولاتي
تاجة: كلامك زاج كيجرح بلا مايقصد ...و انا قلبي حجر مكيسامحش
عبد الله : انا نبقا عمري كاملو كنتسنا سماحتك حتى يلين قلبك و بيه نتونس اتاج راسي
تاجة: نتا معايا و لا معاه ؟؟
عبد الله : انا مع الحق و الشرع ..
تاجة : نفس الحق و الشرع لي كيقول ما نتا ليا ما انا ليك ...
عبد الله :(ضغط على قبضة يدو ) عارف ايزوجوك و من هاد لقصر ايخرجوك عروس...داك نهار لي ايخرج صندوقي معاك ...(شدها من يدها ) الموت و لا فراقك اتاجة
تاجة:(بلعات ريقها كتشوف ف عينيه الحزن) خصنا الحل و لا عمرنا نكونو بجوج
عبد الله : اندير اي حاجا باش نكون معاك و حداك من غير نبعد على طريق الحق ...خلينا هانيين
تاجة: (ضماتو ليها كتبكي) بغيت نبقا معاك
عبد الله :(كسرح ليها شعرها بيدو و كيستنشق ريحتها) انبقاو..
...قصة حبهم صعيبة فيها لخطية و التضحية...ماعارفين مايديرو مافكروش قبل مايتبعو قلبهم...صدق لي قال هوى القلب صعيب كيخليك تبغي غير لي ماشي ليك و كيعذبك بيه ... تعاشات لعشية و طاح الظلام و هي ف الحمام كيغسلوها و كيحاولو مايقيسوش ليها ظهرها لي طبايع صمطة لاسقة فيهم ...خرجوها من تماك و نشفوها و لبسوها و هي مامتيقاش بلي ادخل عند السلطان و خايفة...ماباغاش و مرعوبة بغات غير تهرب و ضربها بسلتة...وقفات عليها سعيدة كضحك و تمازح معاها
سعيدة: شكون بحالك صباح جيتي و ليلة ادخلي عروسة لسلطان
ختام: مابغيتش اجي نتي بلاصتي بصحتك و راحتك
رقوش: واش نتي مكتعيااايش و مكتهديش ؟؟ غير قوليلي علاش زهر كيجي حتى لبين يديك و كتجري عليه
سعيدة: راها غير مدهوشة ماتديش عليها
رقوش: شهماااتني...جيتي غير صباح و نوضتي لبلبالة كون زدتي شوية كون طيحتي القصر فوق راسنا
ختام: اوا عاونوني نهرب و تهناو مني ...انا ماباغاش نكون هنا ماشي بلاصتي...انا نهنيكم مني
رقوش: جلسي و سدي دلقوشك و لا نعيط ل دادا غنيمة تحطك ف المطمورة و تشحطك
ختام: لا لا الا المطمورة مابقيتش نعاود
رقوش : سكتييينا
...ماعاوداتش الهضرة و هوما كيبخروها ب الند الهندي...و كيعطروها ب المسك ف ذاتها كاملها و كيدهنو ليها لعسل...لبسو ليها قفطان بيض من لحرير و مطلوق من لتحت و يديه طوال و عنقو معري كيبين عنقها لبيض ...جمعوه ليها بالمضمة و لمشامر و حطو ليها سنسلة ثقيلة فعنقها و حلقات كبار ..شدو يديها و عمروها ب الخواتم و طلقو ليها شعرها على طولتو مسرح...كحلو لعينين و حمرو شفايف و رجعوها شهوة منها لي شافها يتشهاها...حطو ليها ملحف خفيف على راسها و هبطوها و الجاريات كيشوفوها و يحسدوها...غاديين بيها و هي حداهم كتسمع وصايتهم ليها ...كدخلها من وذن و تخرجها من وذن ... حجي و رقوش ضايرين كيسمعوها لي ينفعها و غنيمة غير كدعي ليلة دوز بيخير و تفرح ام السلطان بالصبوحي... وصلات حدا الجناح و قبل مايتفتح الباب نطقات
ختام: مابقيتش بغيت عفاكم غير عفيوني و ديو سعيدة بلاصتي
رقوش:(دفعاتها) سيري الله يرد بيك (سدات الباب بعد ما دخلاتها)
أنت تقرأ
⚜️ الـــجٰـــــان ⚜️كاملة
Fantasyبقلم : ✨ سكينة سليماني ✨ قالو ناس زمان الى المحبة دخلات للقلب و تربعات عمرها تزول واخا يتدخلو سلاطين الجان و قالو الى شفتي جوج توالمو و على الدوام تعاشرو عرف بلي الدرك على واحد و بلي حبيبو معذبو و مشربو علقم يامو...نصليو على خير الناس و ا...
