⚜️ الــــــجـــان ⚜️
سكينة سليماني
البارت 40:
...لا من مجيب و ماليها اثر حداه ...عيا مايعيط و يدوي و لكن لا من مجيب...بقا كيتمشى و فكرة تديه و فكرة تجيبو...حتى كتبان ليه مرا كتحرك ف رملة و بقا كينادي ليها ...
حيدر: سمحيلي اشريفة نسولك...
...غادية و مكتصنطش ليه ... و بقا كيعيط ليها
حيدر: سمعيني ...
...اختفات من حداه كأنها مكانتش...حس براسو غير كيتوهم و جلس ف الارض ...نهارو داز غير بحال هاكا ...تعاشات لعشية و طاح ظلام و عيا و تهد ...توضأ بالرملة و ناض يصلي ...
حيدر: الله اكبر الله اكبر اشهد ان لا اله الا الله و اشهد ان محمدا رسول الله حي على الصلاة حي على الفلاح قد قامت الصلاة الله اكبر ...
بدا يقرا الفاتحة و ماتيسر من القرآن ...و هبط للركوع و ناض و نطق
حيدر: سمع الله لمن حمده...
تسمعات من موراه صوت مجهد لبزاف د ناس ...: ربنا و لك الحمد
...تجمد بلاصتو و تعوذ من الله و كمل صلاتو كيما العادة ...عارف بلي مكيصليش بناس و انما كيصلي بجنون...كمل صلاتو و سلم و يالاه ايضور على الجهة ليسرية لقا حداه طبق ديال الفواكه و گربة د الما ...قاد جلستو و بدا كياكل بشوية عليه ...رمش عينيه و مع رمشة وحدة لقا حداه الناس ...قبيلة بخيامهم و شغلهم...و نساءهم و رجالهم و اطفالهم...بلع ريقو و راجل كبير كيشوف فيه و جالسين معاه جوج رجال ...
حذافة ؛ سمي بالله و مرحبا بضيف الله
حيدر: بارك الله فيك
حذافة : سميتي حذافة..انا كبير لقبيلة شنو جابك لهنا
حيدر : جابتني القدرة...
حذافة: باينة عليك حجرتك تقيلة و قبيلتي ماقدراتش تقيسك و لا تآذيك..بلا شك عرفتي حنا شكون
حيدر: عارف ...انا جيت على قصد واحد
حذافة: عاود لينا و حنا نعاونوك
حيدر: مانقدرش...لي صافطاتني هنا وصاتني نحضي سواري
حذافة: تشاركنا الملحة و طعام و عليك الامان
حيدر:(تنهد) جيت نحرر موريجان
...كولشي سكت و توقف كيسمعو هضرتو ...
حذافة: نتا عارف راسك شنو بغيتي دير ؟
حيدر: عارف
حدافة: نتا عارف شكون حبسها و علاش ؟
حيدر: عارف
حذافة:(ناض. هز عكازو) تبعني لخيمة خصنا ندويو مزيان ...
أنت تقرأ
⚜️ الـــجٰـــــان ⚜️كاملة
خيال (فانتازيا)بقلم : ✨ سكينة سليماني ✨ قالو ناس زمان الى المحبة دخلات للقلب و تربعات عمرها تزول واخا يتدخلو سلاطين الجان و قالو الى شفتي جوج توالمو و على الدوام تعاشرو عرف بلي الدرك على واحد و بلي حبيبو معذبو و مشربو علقم يامو...نصليو على خير الناس و ا...
