⚜️ الــــــجـــان ⚜️
سكينة سليماني
البارت 14:
جاو لخدم باش ينزلو الجارية لي جنات على روحها و رقوش غوتات على الجواري لي مجمعين كيشوفو و كل واحد مشا لشغلو اما ختام مابقات قادرة تزيد ...تخنقات كثر و كثر و خرجات من تماك كتجري بين ممرات لقصر ...ماعرفاتش راسها فين كتمشي و لا فين خرجات حتى لقات راسها ف قنت خاوي لقدام ديالو بحال اللور ماعرفات واش تزيد و لا ترجع بلور...حطات يدها على الحيط كتنفس بصعوبة و قلبها كيضرب دقاتو تسارعات...حتى بدات كتسمع نفس لبكا لي سمعاتو ديك المرة ف رياض جداتها و بسبابو تلاحت لهاد لقرينة لكحلة...طلعات راسها لفوق و شافت قدامها مرا لابسة كاملها لكحل و كتشوف فيها ...
...." قسحي قلبك و حطي عليه حجرة مازال ماشفتي والو ابنت الگوطة"
ختام : ششش ش شكون نتي ؟
..." انا اللعنة لي جابتك لهنا و بين حيوط لقصر حطاتك ...الدين ماخلصاتوش سلالتك و نتي خصك تخلصيه "
...رجعات ختام بجوج خطوات اللور و ضارت باغا تجري ...لقات راسها مزدوحة ف الحيط و ماقادراش تتحرك بحال مشدودة بسناسل جسمها تنمل عليها و الما طاح ليها ف ركابي
..." سمعي مايفيدك كلمة من ذهب توقف معاك ف نهار لكحل "
ختام:(كتنفس بجهد ) يااااربي نكون كنحلم ياربي نكون كنحلم و نفيق ...مي ميمونة...ماما ...بابا فينكم بغيت نرجع صافي
...الميعاد بيننا وصل و كاع لي دردگاتو المعزة في راس الجبل كتخلصو عند الدباغ "
ختام:(البكية شاداها و بصوت مخنوق نطقات) شكون نتي و شنو بغيتي مني
..."ماشي مهم تعرفيني شكون واش نكون و لكن لي خصك تعرفيه بلي انا ظلك و تابعاك عارفاك فوقاش كتنفسي و فوقاش كتخنقي بيدي موتك و حتى حياتك ابنت الگوطة "
ختام:(ماقادراش تحرك و كتحس بيديها تنملو عليها و كترجف) شنو بغيتي ؟؟
"... بيني و بين جداك حساب قديم طاسيلتكم كتخلصو كل مرة و لي قدرات ديرو كترجع و لي ماقدراتش كتلف و هنا كتبقا ...بغيتي فدارك تكوني و لزمانك ترجعي ماعليك غير تنفذي ...و الى ماقدرتيش خصك تخسري لي عزيز عليك و ترجعي بلا بيه "
ختام :(دموعها شلال) مافهمت والو ...خليني نمشييي
...(قربات منها و بصبعها لي فيه ظفر طويل هزات ليها ذقنها و كتشوف فيها بعينيها الحومر جغمة د الدم ) "دم السلطان خصو يتهدر...سلالة عز العرب خصها تموت و تدفن "
ختام بلعات ريقها من منظر عينيها و ماقدراتش تزيد تنطق مازال ...
" هيل ...عقلي على سميتي مزيان ..هيييل "
ختام: (بدات تشهق و تبكي بحرقة) عفاك لاما خليني نمشي بحالي عييت ماقاداش نزيد ...
هيل : سيبي دمو و وعدي انوفي بيه ...
...تلاشات هيل بحال عمرها كانت و تفكات ختام من الحيط لي كانت لاسقة فيه و هبطات للارض طايحة و كتبكي ...رجليها بكثرة الخوف ماقدراتش توقف عليهم و ماقدراتش تستوعب شنو جرا ليها و لكن لي عارفاه ان ديك المرا ماشي من الانس و بعيدة عليهم ...كتفكر غير اشمن ذنب دارتو حتى وصلات لهنا و لي خصها ديرو عمرها حتى تخيلاتو و عارفة راسها ماتقدرش عليه ...بدات تمسح دموعها و تنخصص حتى وقف عليها حجي و غنيمة كتشوفهم من بعيد ...
غنيمة: شنو كاين تما ؟
حجي: الجارية الجديدة ادادا غنيمة
غنيمة: شنو كدير الجارية تما و شنو وصلها لهاد لمكان
حجي: علمي من علمك ...(هزها من يدها ) شنو كديري هنا
ختام:(كضور ف عينيها) انا ...انا
حجي: خصها تربا و تعلم مزيان لقواعد ...بانلي رقوش مادايراش خدمتها
غنيمة: داكشي منبعد ...عطيها صينية تهزها معانا
حجي: انديوها معانا ل جلسة د مولاي سلطان و لالة ام سيدي ادادا غنيمة ؟؟؟
غنيمة: منين جاب ربي لعوين مانفرطوش فيه و منبعد ربيها على خفة رجلين ...
حجي: (دفع ختام) يالاه تحركي هزي ديك صينية ....
تصبحن على واقع اجمل 🔥
أنت تقرأ
⚜️ الـــجٰـــــان ⚜️كاملة
خيال (فانتازيا)بقلم : ✨ سكينة سليماني ✨ قالو ناس زمان الى المحبة دخلات للقلب و تربعات عمرها تزول واخا يتدخلو سلاطين الجان و قالو الى شفتي جوج توالمو و على الدوام تعاشرو عرف بلي الدرك على واحد و بلي حبيبو معذبو و مشربو علقم يامو...نصليو على خير الناس و ا...
