⚜️ الــــــجـــان ⚜️
سكينة سليماني
البارت 39:
فقصر السلطان و فزمانو ووقيتو عمات الكآبة و خيم الحزن على المملكة و ناسها كاملين ...السلطان غابر ليه الاثر و خبار مو/تو شاعت بين الناس رغم انهم مالقاو لا حوايج مقطعين لا كسدة...ام السلطان مريضة فموضعها و على كية ولدها تشوات عيات و تهدات و ففراشها نعسات...دازت مدة طويلة و سلمو امرهم لله ...كانت غادة فاتجاه جناح السلطان غير دخلات دخل من موراها عبد الله ...
تاجة: الحزن و الهم تسالا وقتهم
عبد الله : عمر ايتسالا وقتهم و مولاي مالقيناهش
تاجة: الغلط لول و لخر ديالك...تقتي فالعدو و دخلتيه علينا
عبد الله: ماكنتش عارفها ...
تاجة: و المملكة ماغاديش توقف و تفنى على قبل سلطان دوز وقيتو و مشا
عبد الله: (شاف فيها بنظرة غريبة) كتكلمي على خوك اتاجة
تاجة: خويا الله ارحمو و يواليه برحمة الله ...ماشي هو لول و لا لخر ..خوتي من قبلو عطاوك عمرهم و با لي كنت نجلس عندو و يوريني اساليب الحكم حتى هو مشا ...
عبد الله: شنو كتقصدي
تاجة (جلسات فوق لفراش) ايبدا عهدي ..السلطانة تاجة ...انوقفو هاد المملكة و نتا خصك تعاوني
عبد الله:(كيحرك ليها راسو بلا) عنداااك ...عنداك تعميلك السلطة عينيك و تنساي راسك
تاجة: مانسيتش راسي ...و وسيلتي كتبرر غايتي...يا نبقاو هاكا حتى يعرفو ضعفنا و ... ينهش فينا لعدو ...ولا انهزو ب بلادنا
عبد الله : ماعرفتش انا حاير
تاجة: عبد الله ..خصك تعاوني ..و لا الامانة لي خلا حيدر من وراه اضيع ...
...بقا كيشوف فيها و فتالي سلم امرو لله و هبط باس ثوبها...
عبد الله: انشيع لخبار بين الناس و كبار د لبلاد و الوزراء...يقبلو و يرحبو ب السلطانة تاجة ...
تاجة: (ابتاسمات ليه و عطاتو اشارة ) حربنا مع الشمال اتبدا من غدا
عبد الله: لااا حيدر مايقبلش هاكا هو كيخطط للهرب و لكن ماشي دابا
تاجة: قلتلك حيدر مشا و انا لي كاينة و الحرب راه انبداوها بغيت ناخد بالتار ..كون كانت الفايدة فيه كون بداها شحال هادي انا ماغاديش نتسنى
عبد الله: خاصنا الوقت
تاجة: مكاينش وقت ...نفذ
عبد الله:(هبط راسو) امرك ...
....
كان طايح ف صحرا و شمس نحاسة ف سما مذهبة...حارة و سخونة و كضرب فوجهو...حل عينيه كيتنفس بشوية و كينوض...لقا رملة كاملها ف صحتو لكن سلهامو كان بين كتافو..نفس سلهام جدو لي عزيز عليه ...تعجب شنو وصل السلهام عندو و لكن ماعطاش للامر اهمية ...بقا كيضور راسو و كيغوت ب اعلى صوت ...
حيدر: ختااااااام ...ختااااااام
يتبع
أنت تقرأ
⚜️ الـــجٰـــــان ⚜️كاملة
Fantasíaبقلم : ✨ سكينة سليماني ✨ قالو ناس زمان الى المحبة دخلات للقلب و تربعات عمرها تزول واخا يتدخلو سلاطين الجان و قالو الى شفتي جوج توالمو و على الدوام تعاشرو عرف بلي الدرك على واحد و بلي حبيبو معذبو و مشربو علقم يامو...نصليو على خير الناس و ا...