جمـعـنـا قدر لكـن علـى وش نقــدر ؟

البارت الثاني

•
•
في بيت ابو صالح
بعد اذان المغرب بدو الضيوف يتجمعون و الشباب كانوا الي يصُب القهوه و الي يجيب الدلال و البراريد و الي يفرشون الحوش و الي يشبون النار و الي يودي فناجيل و يجيب فناجيل و كانت ريحه العود بكل مكان و مختلطه بريحه القهوة العربيه و ريحه شبت النار...."و هذا كان الوضع عند الرجال"
•
| اما في جانب الحريم...
كانوا بكامل كشختهم و زينتهم و كانوا بنتظار الضيوف الي كانت تغسل الفناجيل لرجال و الي كانت جالسه تتصور و تصور كل شي و الي تبخر و الي تتعطر و الي تحط روجها و الي منكسر ظهرها من كثر الشغل
لميا بفضول: رَّي وينها للحين ما طلت علينا
مرام بضحك:امي باقي تهاوشها على الفستان تقول ما تبغاه
ليما ضحكت:مو من جدها ما تبي تلبس فستان ترا كل الديره بتجي على قولتهم لازم نكشخ
مرام:وش يفهم رَّي ما تحب تلبس البس الي ما يريحها
لميا:تصدقي والله هي الي عرفت طقت كلام الناس بطوفه و شافت راحت نفسها ههههههههههههههه
ساره بضحك و هي تاكل تمر:والله اتفق رَّي اهم شيء عندها نفسها
ام صالح:ايه بس لازم بعد تكشخ مو طول الوقت بذا السراويل الضيقه مدري كيف ترتاحون
الكل:
ههههههههههههههههههههههههههههههههههههههههههههه
و فجاءه طلعت رَّي الي صدمت الكل بجمالها بالفستان الازرق الحرير الطويل الي كان ماسك على الصدر و من تحت عادي و ظهر مكشوف و شعرها البني الي واصل الى الاكتاف و كان ويفي مع الميكب الي كان خفيف بس يبرز ملامحها الحاده الحلوه و روجها الاحمر الملحوظ...
لميا بصدمه من شكلها:واووووو بيرفكككتتت مره مره مره و بشكل غير متوقع
ساره ابتسمت:الله لا يضرس وش ذا الزينننن
مرام:الله شفتي كيف صار حلو؟؟ لا موتي ولا شيء هذا انتي حيه.
منال بصدمه:صراحه صدمتيني
ام صالح تبغا تغث رَّي:واااه والله الي بتعرس اول وحده
رَّي بمزح:و بكذا قررت اني اغيره
ام صالح بضحك :لا لا نمزح
رَّي رجعت رمت نفسها على الكنب:اوفر ما بدت السهره و تعبت من الفستان وش ذا الحاله هووففف صُبي صُبي لي شاهي
فداء طلعت و هي مو مسكره سحاب فستانها: رَّي والله اتفق معس يا بنت العم وش ذا الحاله
رَّي بضحك:تعالي تعالي اسكره لس الله يسرها والله انها حياه  لنا الله بس
ام صالح ضربت رجل رَّي بخفه ثم بعدها فداء:نعنبوكم باقي توكم بعمر الزهور و تتشكون اجل وش بقيتوا لي؟!!
رَّي انسدحت:مدريت يا تيته هل هو عمر زهور ولا شوك احسني ودي ارقد
ام صالح بمزح:مرقد ان شاء الله
بدو الضيوف يجون و بدا الكرف و الشغل
•
| في جانب الرجال...
و الي كانوا مشغولين و كل واحد لاهي بشغله دخل عم عبدالعزيز و قال بصوته العالي:السلام عليكم و رحمة الله و بركاته
الكل: وعليكم السلام و الرحمه
و كان وراه عبدالعزيز الي كان اطول من عمه لكن كان جميل جمال ملفت و هدوء ملامحه كان حلو دخل و بدا يسلم الين وصل لمازن و غيث و قال غيث بضحك:حي الله عزوز
عبدالعزيز الي انصدم من ميانه غيث كان يسمع مدح سند في  غيث بس ما توقعه لذا الدرجه جريئ :الله يحيك
غيث بحماس و يضرب الارض:تعال اجلس هنا جنبي
مازن:شف ترا من اليوم و هو يتسيمج و غاثناااا لا تجلس جنبه نصيح
عبدالعزيز بضحك:مقدر ارده والله ههههههههه
غيث يسوي حركه تستاهل:احسنننن احسن محد قال لك
عبدالعزيز: ههههههههههههههه
دخل ابو خلف و خلف و اخوه الصغير و ولد اخت خلف  و ابو سند و سند و ابو محمد و وراه ثاير و اخوانه وكان الكل يهاب ابو محمد و عياله و كان لهم هيبتهم بالديره كامله
اما خلف و سند و ثاير قاعدين يدورون بعيونهم عبدالعزيز
ثاير:مو بذاك الي جالس جنب غيث ولد ابو صالح؟!
سند ابتسم:غيث يخي على طول سحبه يزينه ههههههه
ثاير الي ما كان يعرف غيث ولا يحتك فيه لعدم توافق الشخصيات
سند جا نط جنب غيث من الجهه الثانيه و جا جنبه ثاير
عبدالعزيز بستغراب:وين خلف
سند:هـا كان معنا الحين وين اختفى
ثـاير يأشر براسه:شفه ذاك نشبوا له اخوه و ولد اخته ههههههههه
عبدالعزيز بضحك:فوق انه عايش بين ثمان بنات زاد ذا العله الصغير و اخته ما قصرت هههههههههههههههههه
سند بضحك:احسه متحسف على فرحته يوم عرف ان امه حامل بولد هههههههههههههههههههههههههههههههه
الكل:
هههههههههههههههههههههههههههههههههههههههههههههه
غيث:كم صار عمرهم ذا الورعان
سند: سبع سنوات اخو خلف و ولد اخته 5 سنوات
اما خلف نشب له اخوه الصغير احمد و ولد اخته سامي عشان يبغون يروحون معه لاخوياه الي كانو جالسين بطرف الحوش  مع غيث و لما رفض تعلقوا بثوبه يبكون  ههههههههههههههههه
و أخيرًا جا خلف و هو ماسك احمد بيد و شايل سامي باليد الثانيه
عبدالعزيز:خلف والله انك تعاني وش ذا الحاله صرت اب ما قد تزوجت
خلف و هو يمسح ثوبه الي صار كله كاكاو من سامي:خلها على الله يخوك
مازن مد له فنجال قهوة  و قام هو ساري يدورن بالقهوة
•
| في جانب الحريم...
جميع حريم الديره موجودين و فداء و تدور بالقهوة و رَّي بتمر و المناديل وراها و لكن رَّي كانت لافته للانتباه مره بجمالها الغريب الفاتن
و بعد ما اعطت رَّي ام فاهد المناديل اعجبت ام فاهد مره لكن رَّي كانت طاقه كبدها من الزحمه و الناس
ام فاهد ببتسامه:الا ام حمد كم تتوقعين عمر ام فستان ازرق ذي
ام حمد:والله من شكلها احسها 20 حولها ليه؟ اعجبتس تبغينها لفاهد؟هههههههههه
ام فاهد بضحك:عرفتي نيتي والله انها زوينه ذا البنيه بس خلي بمسكها على جنب اسالها
ام حمد مسكتها:لا لا مالس داعي برسل بنتي انا كانها تبغا تتعرف عليها و بتجيب العلم كامل
ام فاهد ابتسمت:اي والله ارسليها اجل
ام حمد دقت بنتها ندى و قالت لها كل شيء و نطت ندى لها
...
|في المطبخ
دخلت ندى على رَّي
ندى بكذب:كنت ابغا مويه
رَّي الي كانت طفشانه و تشرب شاهي نعناع و اشرت و هي تاكيه على طاوله المطبخ:شفيها هناك بزاوية يا حلوه
ندى اخذت المويه و ناظرت رَّي و قالت بكذب:اعذريني بس عادي اجلس معس هنا طفشت من سوالف العجايز
رَّي: ههههههههههههههههههههه يعمري حتى انتي تعالي تعالي ما عندس مشكلة
ندى ابتسمت ضبطت خطتها: ايه وش اسمس
رَّي ببتسامه:اسمي رَّي
ندى:حلو اسمس
رَّي: احب اسمي ترا هههههه
ندى تحاول تسحب معلومات اكثر:ايه و كم عمرس طيب
رَّي:18
انصدمت ندى هنا بقوه:لحظه هـا صغيره
رَّي بعدم فهم:ليش صغيره؟
ندى بترقيع:اااا-قصدي على عمري انتي صغيرة
رَّي بدا شكها:اها ليش انتي كم؟
ندى:24
رَّي:واو كبيرة مره هههههههه
ندى:شفتي ههههههه و قالت ندى عشان تكمل معلوماتها:انتي بنت مين من عيال ابو صالح؟!
رَّي الي تاكد شكها ان ذي وراها شيء: وش فيس تحققين معي انتي؟
ندى بقمطه:ها لا بس اسال
رَّي قامت:بنت فهد و بنته الثانيه
و راحت رَّي من عندها اما ندى كملت معلوماتها و لا همها أن  رَّي كشفتها او لا
...
| في الحوش الخلفي
دخلت رَّي على فداء الي كانت تسولف مع بنتين غريبات
رَّي جات بطفش واضح
فداء بستغراب: رَّي وش فيس؟
رَّي شافت البنات:الله ذولي مين؟؟
فداء اشرت عليهم:هذي اماني و هذي اسراء
اماني بمزح:تراني صغيرة مره لايغركم طولي
اسراء بضحك و اشرت لرَّي : و انتي مين؟؟
رَّي:بنت عم فداء رَّي
اسراء:اهااا قالت لنا عنس فداء
رَّي بضحك:ما تقصرين يا فوفه
فداء ضمتها من جنب:من حقي اتباها ببنت عمي
اماني و هي تكذب فداء:اييييه تتباها كذابها تراها كانت تقول انس مختمه المشاكل في المدرسة و مختمتها مع عيال الديرة في الطفولة ههههههههههههههههههههههه
رَّي ناظره للمجلس:والله بختم المشاكل في جبهت ذيك الي اسمها ندى
اسراء:وش صاير
رَّي:مدري كانها تحقق معي اخ تقهر
اسراء الي تعرف ندى:يووووه ندى بنت ابو حمد ذي
رَّي بعدم فهم:هـاه تعرفينها
إسراء بمزح و ضربت كتف رَّي:نقول مبروك؟؟
فداء و اماني:
هههههههههههههههههههههههههههههههههههههههههههههه
رَّي:وششش مبروك ليه
اسراء:بيزوجونس دامها سالت عنس
رَّي بصراخ:يععععع لاااااا تكفين
اسراء:وش سالت طيب
رَّي بقهر:اسمي بنت من عمري
فداء بصدمه:اح!!
اسراء بضحك و صفقت:بسسسس انتهى ههههههه
رَّي:والله ما يزوجوني يخسون
اماني تهدي رَّي:معليس معليس يمزحون بس
فداء:يارب انه مزح والله جدي ما يرد احد يخطب ههههههههه
•
| في جانب الرجال
عبدالعزيز وقف و مد الفنجال لمازن: عيال تبون شيء؟
سند بستغراب من حاله عبدالعزيز:لحظه وين ما قد جا العشاء حتى
عبدالعزيز:مقدر والله لياء لوحدها بالبيت
خلف:ليه ؟ما جات مع عمتك؟؟
عبدالعزيز بطفش من كثره الاساله:لا تعبانه
ثاير الي حس بعبدالعزيز:خلاص الله معك و ترا امي بعد ما جات و قالت لي انها جهزت عشاء حلو و قالت قسمكم جاهز منه مر خذه معك
عبدالعزيز ابتسم لثاير:لاهنت يا ثاير
ثاير:ما بينا اخوان
و راح عبدالعزيز ركض للبيت لان اصيلة بعد ما اعطاها اكلها
وصل بتهم و لكنه نسى يمر ام ثاير الي كان بيتها بعيد شوي
عبدالعزيز بطفش:اخخخ ما تدري هم مسوين فيني خير ولا شر و ناظر لاسطبل أصيلة و قال ببتسامه: و الله انك اعز الاخويا
و راح فكها و طلعها و اكلها و قال و هو يمسح على وجهها:تعالي تعالي خليني امشيك شوي الين بيت ام ثاير
•
| في جانب الحريم
رَّي بطفش لفداء :ابغا اطلع تكفين حرريني
فداء فكرت:طيب عندنا حل واحد
رَّي تحمست:وش
فداء بغمزه:نهرب من الباب الخلفي و نتمشى بديرة شوي دام كلهم متجمعين هنا
رَّي؛ككككفوووو يلا قدام
راحت فداء تهرب عباياتهم و هي راجعه مسكتها امها و ارسلتها تغسل الفناجيل الي جات من عند الرجال
راحت فداء لرَّي: امي ارسلتني بشغله روحي لوحدس و بلحقس
رَّي طلعت راسها من الباب الخلفي وشافته مُظلم ولا فيه الا كم عمود اناره و قالت بنظره:اربس تبغينا نتمشى بذا الظلمه
فداء اعطتها العبايه بضحك:وربي بيعجبس روحي الين تعدين عشره بيوت بتلقين بيت ابيض و بعده بقاله صغيره بزاويه و في مقاعد هناك خذي ثنين ايس كريم و انتظريني هس جوالس و ذي محفظتس
رَّي اخذتهم:اها يعني على حسابي الايس كريم ؟
فداء باستها من بعيد:بنت عمي الفطينه
رَّي كشت على فداء و راحت طلعت بسرعه قبل احد يقفطها
طلعت رَّي و كانت بفستانها و بشبشب الحمام"وانتم بالكرامه"و كانت تمشي و هي فيها خوف بس كان الجو حلو و كانت قمرا و بعدت بعيد عن البيت و صارت عند البيت الابيض و كان حوله ورود ورديه لكن رَّي فجاءه سمعت صوت ولد يتكلم و خافت و كان فيه صوت غريب ثاني قربت تتخبى ورا كوم ورد متدلي من حوش البيت الابيض رَّي بنفسها:"يممه وش ذا "ولكن فجاءه طلع عبدالعزيز و أصيلة و كان يلعبها و يكلمها و لكن خرشت عبدالعزيز صرخت رَّي و انتبه لها و قرب وهو يمسح على وجه اصيلة عشان ما تنكر رَّي
عبدالعزيز لرَّي:علامك انتي؟؟
رَّي قالت بنفسها بستغراب:"علامك؟؟!"
عبدالعزيز:سستر اكلمك
رَّي بغضب:نعم نعم خوفتني لما طلعت و سكتت و قالت بفرحه:الله خيييلللل هذا لك؟؟
عبدالعزيز الي انصدم من تغير مزاجها الغريب و قال و هو يسحب أصيلة بخطامها لرَّي:مهره* مو خيل اسمها أصيلة
رَّي بعفويه:اسم جدتي مهره
عبدالعزيز ضحك و سكت بسرعه
رَّي الي تقدمت لا شعوريًا و حضنت وجه اصيلة و قالت:الله حلوه حبيتها
عبدالعزيز ابتسم:حبيبتي
رَّي الي سوت صايده جو العشاق:عندك حبيبه؟
عبدالعزيز بصدمه من غباء رَّي:هـااه لا و بعدين وش ذا السوال الغبي الي ماله دخل
رَّي استوعبت انه يقصد اصيله:اهااا ههههههههههههههه معليش كنت افكر بشيء ثاني
عبدالعزيز و هو يرجع ورا و سحب أصيلة معه:الا انتي وش جايبك هنا و وش وضعك بلليل لوحدك تراك بنت ما ينفع تروحي لوحدك كذا
رَّي الي كانت تكره التفريق انتي بنت و انت ولد و قالت بنبره حاده:معليك ما اخاف انا اطيح قبيلة
عبدالعزيز بضحك:اوف لذا الدرجة
رَّي تنرفزت:ايه لذا الدرجة انت و غمازتك ذي بس وحده ههههههههههههههههههه
عبدالعزيز انتبه للفستان و الشبشب:واو اهنيك و المكس شبشب و فستان
رَّي رجعت تناظر الشبشب:اهاااا ايه تضايقت من الكعب و رميتها و لبست ذي
عبدالعزيز الي كان يحاول يحرجها:كنت ابي احرجك بس شكلك تحبين السوالف
و فجاءه تذكرت انها لازم تروح البقاله وقالت وهي تحط يدها على راسها:ييييووووه يا فداء الزفتتتت
عبدالعزيز بعدم فهم:هـاه
رَّي:ما اكلمك
عبدالعزيز الي مستمره رَّي تصدمه بغبائها:ما فيه الا انا و انتي
رَّي الي ورته الجوال يعني اتصل
عبدالعزيز تنرفز منها و حسها غثيثه و سكت و كمل لبيت ام ثاير لكن وقفه صوت رَّي:انتظر لا تروح و رحت و هي ترفع فستانها عن الارض و دخلت البقاله
عبدالعزيز قال بنفسه:"الحين ذي شوضعها ليه كذا عادي عندها تتمشى بالليل؟؟"
و رجعت رَّي و بيدها ثلاث حبات ايس كريم و كانت واحد بالفانيلا و واحد فراولة و واحد كاكاو و قالت و هي مبسوطه:وش تحب نوع
عبدالعزيز بستغراب:لا شكرًا ما ابي
رَّي باصرار:اقول قد اشتريته بتاخذه غصب و بما انك رفضت بتاخذ الفانيلا
عبدالعزيز ضحك بصوت عالي من حركات المبزره حقتها:هاتي هاتي والله انك بزر بس وش المناسبه يعني ؟
رَّي بفلسفه:شوف فكرت كذا ان لو انا صادفت احد و اعطاني ايس كريم بفرححح مره و قلت اكيد بيفرحك لو جبت لك معي
عبدالعزيز بتعجب من تفكيرها:نااايسسس تفكييير بعتمد تفكيرك
رَّي ابتسمت و هي تدخل الايس كريم الثنين بالكيس و راودها شعور ان ما ودها تنتهي ذا السوالف و قالت:اعتبرها هديه ختاميه لسوالفنا البايخه ههههههههههههههههههههههههههههههههههههه
عبدالعزيز بضحك:تمـام شكرًا للهديه ههههههههههههههه
رَّي راحت و كانت تفكر بتعجب بجمال عبدالعزيز و لكن الي اشغل تفكيرها اكثر وين راحت فداء البقرة
اما عبدالعزيز صح كان كله ايس كريم بس ضحكته طريقه تفكيرها و حركاتها مع انها مستفزه
•
في بيت ابو صالح
بدو الضيوف يروحون و بدت تنتهي الليلة الحافله
غيث و هو يشل الدلال و قال بضيق:يخي ارحم عبدالعزيز
كيف عايش اتذكر كان منتعم الحين تقول مسواط نحفان حالته حاله
مازن بحزن:واحد متوفين امه و ابوه بليله وحده وش تبغا يكون حاله مبسوط؟؟ اكيد بيتغير حاله لفراقهم ولا هم اي شخص والدين هذول
غيث بتنهد:جعلني ما اجرب فراق اوميمتي
مازن:اي والله
ساري بعدم فهم:عبدالعزيز مين؟؟
غيث:اخخخ يا ساري هذا واحد أمه وابـ...و قاطعه ساري:يبوي ما قلت احكي قصته قلت لك مين هو يعني اي واحد من الي كانو جالسين معكم
غيث بعصبيه:وييييع يشينك انقلع انقلع
مازن:الي طلع ما تعشى ابو غتره ابيض و طرفها كحلي منقش
ساري بصدمه:اما الحلو هذاك؟؟اخخخ يحرام صدق الله يصبره
مازن و غيث:اميـــن
مازن:بس وش الي الحلو ذاك يا قليل الخاتمه
ساري:ما كذبت الولد حلو و غريب شكله ما هو منكم
غيث:امه من اهل الرياض
ساري:اهااااا عشان كذا
...
في المطبخ
كانو الي تغسل و الي تشيل و الي ترتب و الي تمسح
ناظره فداء رَّي الي كانت سارحه. بعيد و قالت:شعندها ليلى
رَّي:هـاه
مرام:اوهووووووههههه ماهي حولنا
رَّي بتعب:راسي مصدع
فداء:سلامات وش فيس
رَّي: حلقي
فداء:من الايس كريم
مرام:اما اكلتوا ايس كريم مين جابه
رَّي بترقيع:ارسلنا ساري
مرام:كان تذكرتوني طيب
رَّي:بروح ارقد
فداء:اما بترقدين الحين بتفوتس جلسه الحش بعد العزيمه مجهزينها بصاله على حليب
رَّي:مالي خلق تعليقات سلمى ولا لي خلق ذنوب احد بروح ارقد احسن
فداء استغربت حالتها بس تركتها ما اصرت عليها
اما رَّي كانت تعبانه و بدت تدخلها حراره مع احتقان و حلقها يوجعها ودخلت نامت بعمق من شدت التعب
ام رَّي:وين رَّي؟؟؟
فداء وهي تنزل الحليب:تعبانه تقول و طلعت تنام
ام رَّي بستغراب:كيف تعبانه مافيها الا العافيه من شوي
فداء:والله مدري بس باين عليها التعب وجهها شاحب و يالله تتكلم
نجوى قامت تجيب كاسه من المطبخ و ملتها حليب:هـا فداء وديه لها لازم تشربه بيفيدها
سلمى بحقد:الله وش ذا الاهتمام حتى اشوف ام فاهد ما فكت عينها عن رَّي
فداء:على الطاري حتى حققت معها ندى كم عمرها و بنت من والله شكل التبن ام فاهد حطت عينها على رَّي
ام رَّي بمزح:ليه غيرانين من بنتي
سلمى:عشتوا من زينها
فداء:يا عمه انتبهي تكفين لرَّي لا يخطبونها لفاهد تراه سربوت محد يبغاه
ساره:اي والله صاك عمره الـ30 ما قد تزوج محد يبغاه
ام رَّي:ليه شسالفه
فداء: قلت لس سربوت محد يبغاه ولا احد يزوجه لكن والله لو يخطب عند جدي ما يرده يعز عليه ابو فاهد ما بيكسر بخاطره مدري عن عمي فهد بس رايه من راي جدي اكيد
ام رَّي خافت:بسم الله على بنتي
مرام:يويلي عاد امي بتضحي فيني لاني الكبيره
ام صالح:الله يكفينا شرها ذا الحيه ام فاهد
•
في جانب الرجال
كانو يشربون حليب و حول النار اما ابو صالح راح ينام من بعد الصلاه على طول
سراج وهو يشرب و يطلع صوت:اوففف يالحليب من مسويه
ساري ضرب صدره؛ أمي
سراج:يخي فطومممم
سالم:والله لذيذ
صالح بضحك؛انه بعد التعب الطعم يجي كذا
غيث وهو معكر حواجبه:اي تعب يرحم والديكم متكين محد يكرف الا انا و الخرفان ذولا "يقصد مازن و ساري"
مازن:ارحمنا يا التيس
الكل:
هههههههههههههههههههههههههههههههههههههههههههههه
سراج:ياخي غيث والله انك قليل ادب
غيث وهو يبلع عشان يلحق يسبه:انت قليل الادب
ساري وهو يضرب ركبت غيث:يحترق ينسلخ يندعس ما يرده شيء عن الرد يبني ارحم نفسك
غيث: خالك و اكبر منك و تقول لي ابني استحي على وجهك
سراج:ساري خذ راحتك معليك منه
ساري ابتسم :ابشر يا خالي
غيث ناظره بستحقار:انقلع انت و ذا التقويم
ساري:وش؟! قاهرك؟ ههههههههههههههههههههه
غيث رجع ناظره:الله تصدق ناسبك التقويم
ساري:حبيبي تسلم ابوسك؟؟
غيث اعطاه خده:تفضل
ساري باسه
مازن الي كان يكره ذا الحركات:يعععع الله يقرفكم يا وصخان
الكل:
ههههههههههههههههههههههههههههههههههههههههههههه
•
{بدايه يوم جديد على الديره و اهلها}
•
في بيت عبدالعزيز | الصاله
و لياء و عبدالعزيز يجهزون الفطور لياء تحضر و عبدالعزيز يوديه لسفره و كان عبدالعزيز عازم خلف و سند و ثاير للفطور
عبدالعزيز:والله انك أعظم اخت
لياء و هي تتخصر:كيف بس
عبدالعزيز ابتسم: عظيمه
لياء وهي تأشر بملعقه الخشب:هـاه ترا وعدتني بكره نطلع نتعشى بالمدينه
عبدالعزيز و يأشر على عيونه:من ذي قبل ذي ابشري
لياء:تسلم و تبشر بالجنة أن شاء الله
شوي دق الجرس طلعت لياء تفطر فوق و العيال بالصاله تحت
عبدالعزيز:جيت جيت و فتح لهم:هـلا والله ارحبوا ارحبوا دشو دشو حي الله من يانا
ثاير:السلام عليكم ورحمة الله و بركاته
عبدالعزيز :وعليكم السلام ورحمة الله و بركاته يالله حيه
خلف اقبل يحضن عبدالعزيز:اخخخخ اشتقت لك
سند بنظره قرف:امداك تشتاق؟
عبدالعزيز :قلبه خفيف ما يتحمل فراقي
خلف:اي والله اي والله
عبدالعزيز قفل الباب و قال:يلا يلا الفطور جاهز ترا
دخلوا و جلسوا على الفطور و قال ثاير:الا عبدالعزيز وش تخصصك بالجامعه؟
عبدالعزيز نزل الشاهي:انجليزي ليه ؟
ثاير الي كان قلق على وضع عبدالعزيز:تبغا تكمل؟
عبدالعزيز بعزم:اي ان شاء الله بس يمكن اغير تخصصي
ثاير:اهااا الله يوفقك يخوي بس سالت من خوفي عليك و اذا ناقص عليك ولا شيء ترا بالخدمه
عبدالعزيز ابتسم:ما تقصر يا ثاير جميلك سابق و انا خوك
سند و في فمه اكل:اما ناوي تكمل؟؟
عبدالعزيز :ايه اكيد بأذن الله
خلف:اول شيء ابلع القمه
سند:طيب يا نشبه
خلف:الا عبدالعزيز وش التخصص الي بخاطرك
عبدالعزيز:طب ان شاء الله
خلف بتفكير:طيب تحتاج مساعده؟!
عبدالعزيز:لا والله تسلم حبيبي
•
و في احدى البيوت الخلفيه المهجوره
سعود:شوفو بناخذ حقنا كامل من سلطان و عائلته و الي يكونون بالخطه و في الميدان هم سعيد و نسيم وجابر انتم الي بتكونون ضمن الميدان و حاولو تعرفون اخبار عائلتهم بتفصيل بدون ما يعرفونكم او يحسون
سعيد:خلاص امرك
نسيم:امرك
جابر و هو يطفي الزقاره بالجدار:صدقني تلطيخ شرفهم هو افضل انتقام
سعود ابتسم:بنلطخه بنلطخه يا جابر بس خله يجي يوم فرحهم و بنعرف ندمرهم و ننهي عايلتك يا سلطان يا كلب
و انطلقوا الثلاثه يبحثون عن اخبار تخص عائله ابو صالح
•
•
•
أنـــتــهــى⌛️
__________________
{أستغفرُ اللهَ العظيمَ}
{سُبْحَانَ اللهِ الْعَظِيمِ وَبِحَمْدِهِ}
{لَا إِلَهَ إِلَّا اللَّه}
——————————
اليوم:الاحد
التاريخ:25/7/2022
الساعه: 10:22 PM
——————————
الكاتبة:ريناد[انـستـا: rxiina_90]
__________________