جمـعـنـا قدر لكـن علـى وش نقــدر ؟

البارت التاسع

•

•
بيت ابو صالح
و كان الكل يسولف و الوضع طبيعي
ابو سند قام و قال : انا جاي و معي عبدالعزيز و بنخذ لياء و بنمشي الحين
ابو صالح : افا و العشاء؟ و واجب الصبي الي انصاب في بيتي؟
وقف عبدالعزيز بكل رزانه و هو يعدل ثوبه و قال بصوته الثقيل الهادي : مشكور و ما تقصر يا عمي لكن والله ما نبي نثقل عليك و انا ابي اخذ اختي و لا ابيك تتعب نفسك و لا هنت ولا قصرت و جميلك واصل يبعد حيي بس ما نبي نكلف على احد و سلامتك
ابو صالح الي تعجب من ثقه بالكلام و كلامه المتناسق و الكل تعجب مو بس ابو صالح.
ضحك ابو صالح و قال : و من قال انه على كيفك ؟ عشاك بكره هنا ولا يكثر ، مازن ازهم اخته
عبدالعزيز بقهر : يا عمي!... و قاطعه ابو صالح بأشارة يعني "رح انتهى كلامي الي بيمشي"
ابو سند سحب عبدالعزيز و طلعوا
.....
و في جهة الحريم
الي قطع سوالفهم و ازعاجهم مازن
مازن بصوته الحاد و العالي : يأمي
ام صالح : وش فيك انت
مازن : أمي نادي اخت عبدالعزيز اخوها هنا يقول بيخذها
ام صالح : يويلي ابوك وش قال؟
مازن : خليني ساكت واضح عصب و زاد عبدالعزيز ذا فيه عناد و نظام انا الي يمشي رايي صدع في ابوي
راحت ام صالح و قالت للياء الي كانت جاهزه لان اعطاها خبر عبدالعزيز من قبل
مازن كان واقف على الباب و اقبلت له لياء الي كانت عيونها تفتن و صد منها بسرعه و كان بيطلع لكن استوقفه صوتها
لياء بحنان و لطف العالم : مازن ما نسيت وقفتك معي و ابي اقول لك لو كان ذا اخر لقاء بينا ابي اقولك اني...
مازن ناظرها بستغراب ليه وقفت كلام : ايه انس؟
لياء بخجل و صوت هادي : ان الله يحفظك و يوفقك بحياتك
مازن ابتسم : امين و من يقول فمان الله
......
و ركبت لياء و راحوا
ابو صالح : وش ذا السيارة اول مره اشوف سيارة كذا
غيث : هذي يالغالي لو ابيع سراج و مازن و فوقهم أحفادك الحمير ما جابوا قيمتها
سراج : انت لو نبيعك بتنفك ازمه منزليه و بتعتق ارواح بس توكل قدامي
مازن : سراج مستقعد لك
غيث : مره بلاك انت
•
وفي البيوت الخلفيه المهجوره
كان الكل متجمع حول طوله خشبية مهلكها الزمان و واقف في طرفها سعود الي كان كاشخ و واقف بثقه
نسيم ناظر لسعود : نبدا؟
سعود : اوك يلا نبدا
كان ترتيبه على الطاوله :-
الجهه اليسرى : سعيد - جابر - سليم - عايد
الجهه اليمنى : فالح - حمدان - أبراهيم-مسفر
سعود على راس الطاوله و نسيم في اخر الطاوله فاتح لهم على البروجكتر شرح مبسط لخطه الاختطاف و خطه المداهمه
فتح لهم نسيم العرض
و بدا يشرح لهم سعود بشكل مفصل و ختم الشرح و فهم الكل و بدا يقول لهم عن المبالغ الي بيخذونها لو انجزت المهمه بشكل كامل
سعود ببتسامه بارده : و صح ترا قدرنا نبني مقر لنا بعيد عن هنا يمكن عشره كيلو و نبدا نشتغل فيه و بيعجبكم
عايد : اكيد بيعجبنا
و طلعوا و محوا كل اثر لهم بالمنطقه
و كان مقرهم الجديد مو بسهوله يتحصل و كان مكان ما يخطر على بال احد 
•
بيت ابو صالح
جا شمشاد لعند ابو صالح و ووجه شاحب و حالته حاله و مربوك و وقف بصمت
ابو صالح ما حب وضعه : شمشاد وش معك؟ وش فيك كذا تعال اجلس و كيف جيت من البداوه !!؟
شمشاد بصوت يرجف : بابا انا يبغا انت لحالنا
سراج بطقطقه : اوووه شعندك شمشودي ؟
غيث : اسرار اسرار شدخلك و بعدين من سمح لك تقول كذا انا بس الي اقول له شمشودي!!!
مازن : يلعنكم و الدلع هههههههههههههههههههههه
سراج : ولا له وجه يهاوش عليه هههههههههههههههههه
ابو صالح بصوت حاد : قم انقلع انت وياه و شف ان دريت ان به واحد منكم يتسمع عند الباب يا اذنيه ان اقطعها
سراج و مازن ناظروا غيث
غيث : احه والله اني بروح السوق ولا بتسمع حلفت
مازن : دام حلف على ضمانتي ما بيسوي شيء
ابو صالح : يلا طيب وروني عرض اكتافكم
و طلعوا ثلاثتهم و كلهم راحوا مع غيث السوق
ابو صالح : وش فيك انت
شمشاد يخوف : بابا انا كنت يعطي غنم اكلها و واحد اعطني هادا  ورقه و كان حاط مسدس في راس انا و قال وصل هادا بابا حق انت
فتح ابو صالح الورقه
ابو صالح ابتسم : اوه سعود وصل
ابو صالح مسح على كتف شمشاد و قال بحنيه
ابو صالح ببتسامه : الليله انت بتنام هنا
شمشاد بخجل : لا يابابا وين انام مقدر انا ارجع بداوه مش مشكل
ابو صالح بحده : بتنام مع سراج و غيث و مازن بغرفتهم معليك يخذك المكان غير روح الحين قفل على الحلال و برسل معك سالم يلا
راح شمشاد و معه سالم و قعد ابو صالح في حيره من امره وش يسوي من وين طلع
•
و في الطريق لسوق
غيث : احسكم مطولين ما جيتوا السوق ولا؟
مازن : ما اجي واجد هنا الشيبان اسالتهم ترفع الضغط و يالله امسك نفسي ما افصل عليهم
غيث : ههههههههههههههههههههههههههههههه
سراج لف يده على كتف غيث : عاد انت جوك
غيث ببتسامه : والله احب السوق و اجوائه و اهله يزينهم والله هنا الناس غير والله يا المدينة ان فيها مناظر و عالم تسد النفس هنا ودك تبقى ودك ما تطلع المدينة ما هي زينه لحد يجي لحد يجي ههههههههههههههههههه
مازن طق بضحك : تذكرته ذاك المدرسه ماهي زينه لحد يجي لحد يجي هههههههههههههههههههه
سراج : خزان رياكشنات ههههههههههههههههههههه
غيث و هو يضحك : ثمان مراقبين داش امتحان ولا سجن؟ ههههههههههههههههه
مازن : خلاص يا فله امش
سراج لف يده الثانيه على رقبه مازن و قعدوا يمشون و دخلوا السوق مع بعض
و كان سراج يغني و يكملون غيث و مازن
سراج : وو مابي اسال ويش حصل
غيث و مازن : مافي داعي للأمل
سراج : مستعجل حبيبي يمضي عمري مو معاك
غيث و مازن : خل هل لحظه و انت لسى فعيوني ملاك
غيث و مازن و سراج : مستعجل حبيبي يمضي عمري مو معاك خل هل لحظه و انت لسى فعيوني ملاك
غيث الي كان اجملهم صوت : ابغا اقوووللل اني احبك و انت لسى الي عشقتتته قبل لا دمعي يغير وجهك الي بك عرفتتتته
عبدالعزيز من الدكه بضحك : عااااشوووااا عيال سلطان
غيث اشر على عبدالعزيز و باحساس و بصوت جميل :  ماني بميت من غيابه جعل الليلي تقفي به لاحب غيري و قفا به من عقب ما صوتك ارضيبه ما عاد به شيء ارضا به
عبدالعزيز و الكل انصدم من جمال صوت غيث
عبدالعزيز نزل من الدكه بضحك : نعنبوه الي ما يحبك والله ههههههههههههههههههههههه
خلف : يا ولد ما شاء الله والله صوتك حلو
سند : غيث غني لنا كذا شيله حلوه ولا اغنيه
غيث : احممم احممم ...🎵وشلي بحبن عذاريبه تطغى عليه و على اصحابه
مازن : لو جات فرقاك بمصيبه
عبدالعزيز : امواجه الموت مشقى به
سند : لا عاد حبً رمتني به
ناظروا خلف كلهم
خلف : ماني حافظ لا تنتظرون اكمل
عبدالعزيز : خربتها يا تبن
سراج ضحك : يلا انا رايح كملوا انطربوا هنا انتم
عبدالعزيز : سراج مسوي كبير و متزوج مو فاضي لنا
غيث : شايف غاثنا بالثقل من اسبوع
سراج ناظره بطرف عين و ابتسامه : توكلوا بس ههههه
مازن : سراج بجي معك
طبعًا محد اعترض على روحت مازن لانه خير شر ما يسولف واجد
راحوا سراج و مازن
و قعد غيث يسولف و يضحك بالدكه و يساعد العيال بشغلهم و كان مولع السوق ضحك و سوالف
•
بيت ابو صالح
عند رَّي و فداء الي كانوا رايحين يزورون اماني و كلموا اسراء تقابلهم في السوق و يروحون من هناك سوا
ام صالح : ما ضنتي بتستقبلكم لكن انتبهوا
طلعوا رّي و فداء مسرعات لسوق
.....
في طريق السوق
رَّي كانت عبايتها مفتوحه و ما انتبهت
فداء شافت سراج و مازن جايين من بعيد
و رجعت لرَّي
فداء بفزع : رَّي يا حمار قفلي العبايه عمي سراج و مازن جايين !!!
رَّي قفلتها : ما كنت منتبهه زين انس قلتي لي
سراج شافهم : رَّي فداء على وين!!؟؟
رَّي : رايحين لاماني طلعت من المستشفى امس
مازن بحده : روحوا من الطرف الي فيه محلات الحريم و ابعدوا من الدكه عيال الجماعه كلهم هناك
رَّي و فداء بخرشه : ابشر
سراج : يلا يلا عجلوا
و راحوا بسرعة
...
في السوق
دخلت رَّي و فداء بشكل هجومي يدورون على اسراء
سند شافهم من بعيد و همس لخلف : يبدو انه تم مداهمه السوق ههههههههههههههههههههه
خلف : هـاه
سند لف راسه عليهم : يا حمار هناك
خلف : على تراب غيث هنا!!!
سند : ادري
غيث قام : يلا انا استأذنكم
لف و شاف رَّي و فداء كانهم يدورون على احد
غيث : متى جاو ذا الثنتين
عبدالعزيز : مين؟
غيث : اوه معليك المهم مع السلامة
الكل : مع السلامة
و توجه غيث مسرع لرَّي و فداء
غيث مسك كتف رَّي : انتم وش جابكم هنا !؟؟
رَّي بصراخ : يييمممعععههههه!!!!
و فداء انخرشت من صراخ  رَّي و صرخت : يااااااممميي!!!
غيث انخرش : وجعععع يا حمااار هذا انا غيث غيث
فداء : الله يخرشكم
رَّي شافت عبدالعزيز واقف يهاوش سند : قلبي قلبي بغا يطيح
فداء فهمت و ضحكت اما غيث قال بتنهد : حمار انتي السوق كله يناظر يحسب اني مسوي لس شيء
رَّي : قول لنا اول
غيث باستهبال : خلاص المره الجايه اقول معس غيث سلطان صالح الـ^^^
رَّي ضحكت و قالوا له كل شيء و راح غيث و بقت رَّي و فداء ينتظرون اسراء الي مالها حس
بعد 10 دقيقه...
عبدالعزيز شافهم اكثر من مره باقي بنفس المكان
سند : ايش فيك؟
عبدالعزيز : لهم عشر دقايق واقفين
خلف و هو يشرب شاهي و في يده مكنسه : تلقاهم ينتظرون بنت ابو عبدالله شسمها
سند : اوه اسراء
عبدالعزيز : اها طيب اسراء شفتها قبل فترة من الحين رايحه طالعه من السوق مع ماجد ؟
خلف : روح قول لهم ذبحهم البرد هناك هههههههههههههههههههههههههه
عبدالعزيز : روح انت !!
سند حط يده على كتف عبدالعزيز و بدا يناظره بحب : عزوز حبيب قلبي كلنا ندري ان ودك تروح بس مستحي روح الله يحفظك روح
عبدالعزيز بعد يد سند بقوه و اخذ المكنسه و صار يهدد يهبدهم : يا جعلها تروح روح العدو انكتم انت وياه ولا والله العلي العظيم ان اتوطى فيكم هنا !!!
خلف كان يشرب و يطلع صوت من الشاهي و ناظر هو و سند بعض و قالوا بنفس الوقت : يبدو ان عبدالعزيز غاضب
خلف ببتسامه : لذلك ؟
سند : علينا ؟
خلف و سند : ان نهرب
و هربوا و عبدالعزيز رماهم بالعصا لان ما فيه حيل يركض و كتفه تعبان و هو تعبان اصلا
ثاير : والله فيهم مبزره ما شفتها ببزران الديره
عبدالعزيز : صادق
ثاير ناظره ببرود : ترا ما انت بعيد منهم
عبدالعزيز ضحك : يا شينك ما توفر ههههههههههههه
عبدالعزيز ناظر رَّي بتمعن لاول مره
قال بنفسه : " ليه انشد لها دايم؟ الله يعين بس "
.....
عند رَّي و فداء الي يتصلون و اسراء ما ترد
فداء : دقي مره اخيرة تكفين
رَّي دقت
اسراء : هـلا رَّي احرقتي الجوال
رَّي بصوت عالي و عصبيه : جعل الموت يهلي في العدو  وش فيس ما تردين انتي !!!
اسراء : يمه انا صرت عند باب البيت عجلوا ماجد الي وصلني ما قدرت ارده عجلوا تعالوا انتظركم
رَّي : يلا اذلفي جايين ننتظر لنا ساعه طلعتي قد صرتي  هناك
و راحوا ركض لها
•
بيت خال اماني
عند الباب اسراء الي لمحت  رَّي و فداء من بعيد
اسراء : عجلوا
رَّي و فداء وصلوا أخيرًا
رَّي و هي منهلكه من الركض : هووووفففف هوووفففف تعببتتت ياربي
فداء : اوووههه أخيرًا
اسراء : اكبر احتمال بتصرفنا بس بنصمل مغلينا اليوم بتقابلها يعني بتقابلها
رَّي بعصبيه : والله بعد ذا التعب و الركض و الوقفه في البرد ربع ساعه اني لا ادخل لها يصير الي يصير
فداء : دقو دقو الباب
دقت اسراء الباب و هي خايفه لو انرفضوا و ما قدروا يوصلون لاماني المنهاره
•
•
•
أنـــتــهــى⌛️
__________________
{أستغفرُ اللهَ العظيمَ}
{سُبْحَانَ اللهِ الْعَظِيمِ وَبِحَمْدِهِ}
{لَا إِلَهَ إِلَّا اللَّه}
——————————
اليوم: الاثنين 
التاريخ:5/12/2022
الساعه: 11:05 PM
————————-
الكاتبة:ريناد[انـستـا:rxiina_90]
__________________