مها طلبت اغنيه وقعدت تصور عليها وترقص لمحتها ام احمد من هناك وقالت بنتها عائشه:يمه حتى احلام حلوه
ام احمد :انا ماابي الا مها ولدي يبي الزين
عائشه:امشي خل ندخل نتعشى
ام احمد وقفت تناظرها وهي ترقص ودخلت بعدين تتعشى
انتهى اليوم الجميل وكل واحد توجه بيته
في الفندق دخل محمد وحط المفاتيح ع الطاوله ونزل بشته وحطه ع الكرسي وجلس اسماء كانت بتموت من الحياء والتوتر دخلت وجلست ع السرير وماتدري وش تسوي
محمد دخل وتوجه لاسماء مسك يدها وقال:اوعدك اصير لك الزوج الحنون والمحب والمخلص وازعل الدنيا ولاازعلك الله يديمك لي ولايحرمني منك ياعيون محمد
اسماء استحت من الكلام واحمر وجهها وهمست:ولايحرمني منك ياحبيبي
محمد:ياايش؟
اسماء:ياحبيبي
محمد:ياروح وعيون حبيبك والله
محمد:ماجعتي؟
اسماء:شوي
محمد:انا طالب اكل وبيوصل الحين انتظرك بالصاله
اسماء:تمام
طلع محمد وراح ينتظرها بالصاله واسماء حطت فستانها ع الكرسي ولبست فستانها الابيض الهادي ومسحت الميكب وحطت روج بس وطلعت عنده
محمد:ياهلا ياهلا
اسماء:هلا فيك
قعدو يتعشون ويسولفون وبعدها توجهو للغرفه ينامون
في بيت فهد:
عبير:تعبت خلاااصص برتاح ساره شيلي عيالك عني
ساره:خليهم شوي وينامون
عبير:يختي راسي مصدع من الاغاني والرقص خلاص برتاح
مها:خلود سامي تعالو عندي بالغرفه
ساره:مها خليهم عندك بروح اخذ شور وارتاح ساعه كذا
مها:تم ماعليك عندي لاتخافين
ساره:الله يوفقك ياشيخه
مها:امين وياك
توجهت لغرفتها ولبست بجامتها ومسحت الميكب وراحت لسريرها وخالد وسامي كانو ع الايباد يتابعون
فتحت جوالها وقعدت تشيك وشافت اشعار من يوسف:صاحيه
مها:اي
يوسف:كيفك بعد التعب
مها:اهخ متكسره خلاص ابي انام
يوسف:نامي ياعيوني وارتاحي
مها:خلود عندي ع الايباد مقدر انام من ازعاجه
يوسف:ماشاء الله تبارك الله الزواج كان يفتح النفس
مها:الحمد لله وربي تعبنا وجهزنا وخفت مايطلع كل شيء مثل ماابي
يوسف:كل شيء تحطين يدك فيه متأكد بيطلع حلو
مها:ياروحي والله
يوسف ابتسم وكتب:اخييراً سمعت منك كلمة حلوه
مها انصدمت من الكلمه ماكانت مركزه وكتبت:ترا عادي اكتبها لكل اللي عندي
يوسف:طيب اسكتي خليني افرح بالكلمه شوي
مها:واضح انك مروق
يوسف:لا والله اليوم انا وعامر كرفنا بعد مو بس انتو
مها:وش سويتو
يوسف:كل شيء قهوينا الرجال وحضرنا العشاء وقعدنا نستقبل كل اللي يدخلون
مها:الله يجزاك خير يلا عقبال يخدمونك بزواجك
يوسف:ان شاء الله وعروستي انتي
مها ابتسمت وكتبت:امكن مااكون انا
يوسف:اذا مو انتي ماراح يخدموني اجل لان ماراح اتزوج
مها:اوف
يوسف:انتي اخذتي قلبي بدون استأذان انتي استحوذتي شعوري انتي صرتي كل شيء ليوسف انتي النور اللي يشوفه يوسف وسط سواد العالم انتي خليتيني مااشوف غيرك ولايلفت انتباهي احد انتي بأختصار اعميتيني عن غيرك
مها قامت عدلت جلستها وقعدت تبتسم ومو قادره تسيطر على مشاعرها وكتبت:احبك
يوسف انصدم وابتسم ابتسامه عريضه وكتب:اموت فييييييييك
مها:احس زودناها ننام احسن
يوسف:مدري كيف بنام بعد هالكلمه
مها:حتى انا مدري بس خلاص لازم اقفل جوالي
يوسف:تمام نوم العوافي
مها:الله يعافيك
يوسف مو قادر ينام ويفكر بكلمتها وكيف قدر يعبر لها عن حبه وهي كيف عبرت عبرت
قام يصلي الوتر وكل دعواته ان الله يجعل مها من نصيبه
صباح يوم جديد ع الابطال
أنت تقرأ
ياضحكة الباكر اللي ماتوقعته
Romanceروايتي الاولى✨💜. جعلك بعد كل من جاني وخلاني وجعلك بعد كل من جيته وخليته يااخر محطاتي وياخير خلاني ياضحكه الباكر اللي ماتوقعته حساب الكاتبه انستا(raiixli)
