🍒المفروحة ومول الحانوت 🍒( مكتملة)

part94

‏‎~المفروحة و مول الحانوت ~
‏‎~المفروحة و مول الحانوت ~
‏‎بقلم : رجاء جاكار
ج : 94
بشرى بصرامة  : حتى نتي كتعرفي تشرطي ا لآلة !!!!
حسن بحدة : ومالها متشرط راهاا هي المعنية ب الأمر ولا لا ؟
فرح قلبات عينيها ناحية باهاا ولفات على هضرة بشرى فين مابغات تقول ولا دير شي حاجة تعقدها ليهاا ..
حسن : قولي أبنتي شنو الشروط
فرح : مم معرفتش واش هو ناوي يستقر هنا ولا فرنسا
هشام : هضرنا ف الموضوع هو براسو مخربق معارفش كنضن هادشي حتى تكلسو بجوج وتناقشه من الأحسن ..أو لا لا
حسن : اه من الأحسن كلسو بجوج وحطوا النقط على الحروف ..
فرح : معرفتش مهم حتى لغدا الا كان الوقت ..
بشرى : كنضن ف الصباح انا غتجي رندة تعاوني الحلوة لي ناخدو راها واجدة مهم غدا ونشوفو اش نديرو
حسن : هضرت انا مع الحاج الصباح و تناقشناا وتشاركنا التقدية ف الخطوبة بجوج ..
هشام : عندك نمرة د عهد الدين ؟
فرح : أنا ؟
هشام : اييه نتي ..
فرح : لا
هشام : غنقول ليه يصوني عليك وتناقشو وحطو النقط على الحروف ..
فرح تأفأفات بسخط : بلاش فيا نعااس بزااف ..
هشام : متهربيش من هاد الموضوع راه تابعك تابعك ..
فرح : هم مهم انا غنمشي لبيتي تصبحون على خير ..
حسن : حتى تعشاي ..
فرح : شبعانة
بشرى : اواا نعسي بكري متبقايش فاتحة عينيك غير مع تلفون نعسي بكري باش صباح بكري تكوني فايقة  دوشي وتفادي حالتك ..
فرح : علاش غنلبس سروال دجين ونمشي
بشرى ضحكات ب الفقصة : ههه منيتك ولا من ريتك ابنتي سيري تنعسي لا طرطقي ليا المرارة ..
دخلات لبيتها و خلات بشرى كتنكر كيف العادة جلسات على الناموسية كدور ف البيت من هنا وهناا  وتقاد فيه ..حتى هزات تلفونها تلف فيه شوية د الوقت دخلات لفيسبوك كيف العادة  تشوف هناا و دير جادوغ وضحك بصوت مرتافع الا بان ليها شي بوسط كيضحك ..
شافت تلفونها كيصوني بنمرة ممقيداش عرفاته هو ..بقات دقائق كتشوف واش نصوني ولا اه لا اه لا ..
فرح : تفوو داك الگنس دغيا وصلهاا ..
تنهدات ودوزات الخط بشجاعة ..
فرح : الو شكون معاياا !
جالس ف بيته كيف العادة مسرح رجليه ف الصالون ديال الطبقة دياله و كاس قهوة على طاولة جنبه .. الهدوء ف المكان دماغو كيفكر لبعيد و فقرار الإستقرار !!
حتى سمع رنين الهاتف قاطعو من أفكاره شاف المتصل كان هشام جاوب بهدوء ..
هشام: افين
عهد الدين : جالس ف داري ياك لباس؟
هشام : توحشتك ألخاواا ..
عهد الدين ب إبتسامة : يتوحشك الخير ههههه
هشام : ويااك مهم فرح عندها شي شروط هضرو و تناقشو عليهم أنا خليتك دابا ؟
عقد حواجبه من كلمة شروط مكانش متوقع تتشرط ..
عهد الدين : أهااه وخاا
هشام : ياك ديجا عندك نمرة ديالهاا ..
عهد الدين : اه
هشام : نتقاشعوا  غداا تهلاا
قطع الخط مع هشام وبدا يقلب على رقمهاا حتى طلع ليه تبسم من السمية لي كاتب ليها ~ المفروحة 💍 ~
دوز ليها الخط دقائق قليلة و رنين الإتصال كيتسمع حتى زفر بعصبية  يالاه عيقطع حتى سمع صوتهاا ..
فرح : شكون معاياا ؟
عهد الدين بهدوء : معرفتينيش ؟