نادية كانت سعيدة لما رحلت رباب، إنها أخيراً اتخلصت منها هي وبناتا ونزلو من رقبة محمد راجلا، حتى هدى فرحت مع أمها بسبب إنها مابتحب بنات عمتا نهائي وماشة ورا افكار أمها ،بس الأولاد حسو بي فراق عمتهم والبنات خصوصاً أسعد فقد حاجات كتيرة في وجود عمتو من طعم شاي الصباح حقها البحبو ولا قعدة العشا بالليل وشاي المغرب لمن يكون حاضر وفوق لي ده قطعة السكر نيڤين، من دون بنات الاسرة كلهم هي بالنسبة ليهو مميزة وبحبها حب كبير...
الأيام ديك بعد ما رحلت رباب وإستقرت جوها الجيران يسلمو ويتعرفو بيهم وكانو ناس طيبين وعشريين ودخلو فيها طوالي عشان كده رباب نفسيتا اتصلحت كتير وإستكانت...
ولكن هل الأمور تمشي عديل كده؟ لأ طبعاً لأن نادية حست بي غيرة من سكنت رباب براها وماشة تزيد رغم مرت مده على طلعت رباب من بيتهم، خصوصاً إنو رباب ارتاحت نفسياً وبقت زايدة سماحة وكمان مستقلة بحياتا هي وبناتا..
بقت ترمي كلام لي راجلا كل شوية وتقول ليهو : حسي قعدة رباب دي براها كده وسط ناس غرب وهي مطلقة وعرضة للكلامات دي حاجة كويسة؟ كان اخير تقعد في بيتا الانت قعدتها فيهو افضل... محمد: وشنو الفكرك لي قعدتا براها في الوقت ده بالذات
ناديا: كلام الناس خصوصاً هنا في الفريق
في الأول طنشا لكن زنها المتواصل بشكل دوري خلاهو مركز مع الكلام وفي مرة قال الكلام ده لي أخوانو لكنهم عشان مادايرين يشيلو مسؤوليتا قالو ليهو مافيها حاجة تقعد مع بناتا بي إحتراما، رقية أخت رباب نقلت الكلام هي واختها رحمة ليها طبعاً وورتا إنو أخوها ومرتو المصون بتكلمو فيها وفي طلاقا وقعادا براها مع بتين فتوات
رباب بي حزن: ياخي سبحان الله أخواني الكان مفروض يكونو هم سند لي مصرين ينغصو علي حياتي ومادايرين يخلوني في شقاي والآمي، وحسي فكرو لي طلاقي ماأنا سنين عايشة في طلاقي ده الجد شنو
رقية: ماتزعلي كلها تحاريش نسوان ما أكتر ، اعتقد نادية إنتي عارفاها حسودة ولسانا متبري منها
رباب: تحسدني على شنو على فشلي في الحياة؟
رحمة : أنسي ماتعبريهم والبقدر يدق صدرو ويعيشك انتي وبناتك يتفضل
رقية: وتعالي هنا إنتي عادل أخبارو شنو عرفك سكنتي براكي بي بناتك؟
رباب: عارف كلمو البنات
رحمة: قاعدين يمشو ليهو ؟ولا بجيهم هو
رباب: بمشو ليهو هم،الفترة الفاتت دي فجأه بقى الأب المحب سؤال وتلفونات وطلعات معاهم ولكن صرف مافي طبعاً...
زيارة الأخوات غير مانغصت فرحة رباب ماعملت شي....
////___/////____/////
بعد تمو سنتين على الرحول رباب لقت شغل بوساطة واحدة جارتا عند أخوها عندو مطبعة شغلا عندو .. الموضوع ده مامر مرور الكرام لأنو أخوانا وبالاخص محمد مارضو وكمان نادية تشيل وتشحن فيهو وفي مرة قالت ليهو :سكنتوها براها ودي النتيجة مااهتمت بي راي زول فيكم إنتو وليانا ومرقت إشتغلت
