قامت رباب دخلت جوة وهي بتنادي : نيڤين! وينك يابت
دخلت لقتا راقدة على بطنها وبترسم بي مزاااج فقالت: ده شنو راقدة كده وبتشخبطي صليتي؟ ولا مادارية بي الدنيا
نيڤين : صليت قبل خمسة دقايق يادوووب رقدت حسي وبديت أرسم إنتي جيتي
رباب: وينا قرايتك ووينو عمارك؟
نيڤين : أمي حسي في شنو عملت شنو أنا؟ عايزة ارسم حبة واغير الموود حق القراية
رباب: طيب قومي يلا ماشين لي ناس خالك محمد
نيڤين ما عرفت ليه ما حبت الموضوع.. دي اول مره في حياتها تكون ما دايره تلاقي أسعد عشان كذا ما تحمست،قالت ليها: لييه في شنو
رباب قالت: إنتي لسه هتنحي لي وتسألي قومي يلا بسرعه ألبسي
قامت نيڤين على مضض ومشت غيرت هدوما واستعدت للطلعه.
وصلو بيت ناس محمد في ظرف ساعه ودخلو سلمو لقو محمد وناديه وهدى ،والاولاد الباقيين ما في، نيڤين ارتاحت نوعاً ما لعدم وجود أسعد في البيت..
قالوا لي نيفين امشي سوي لينا شاي انتي وهدى. نظام توزيعه كده، ما كانت رضيانة وقالت في نفسها حتى وأنا ضيفة في بيت الناس لازم أخدم أنا؟ بس مشت في النهايه هي وهدى للمطبخ.. هدى قعدت تطربق وتتكلم عن تلفونا الجديد الاشترتو وإنها إشترت أغلى نوع واتفلهمت ماخلت شي ونيڤين بس تهز بي راسا، اصلاً بالها بعيد بتفكر في شيرين وانها اشتاقت ليها....
رباب بعد ونسة عامة قالت لي محمد أخوها خير يا أخوي ان شاء الله خير في شنو هدي جينا.
محمد اتنحنح وقال لها شوفي يا رباب بصراحه وبدون مطاولات في عريس متقدم لي بتك نيڤين
رباب قالت باستغراب: عريس ؟
محمد قال ليها :أيوه عريس زول كويس شديد وشاريها.
رباب صمتت مسافه ورجعت قالت ليهو: يعني متقدم لي نيڤين بالتحديد؟ لأني أنا نيڤين عايزاها تقرا هي لسة صغيرة وبعدين بعرسو للكبيره الأول ولا الصغيره؟
محمد قال ليها : العرس قسمه يا بنت امي ما بالكبر.. الولد كويس وشاريها أحسن ليك توافقي تقابليهم وتتعرفي بيه... إنتي محموله يارباب ياختي عرسي للبنت أخير ليكي تشيل عنك كتف..
رباب: اعرس ليها هسه في عمر زي ده زي ما حصل علي أنا زمان وتبقى عليها البقت علي؟ لو جار عليها الزمان تقبل وين؟ .. تبقى عاله في ضهور الناس وما في زول طايقا؟ لا لا يااخوي مابعرس ليها حسي
ناديه أخيراً بعد صمت اتكلمت وقالت ليها : هي يا رباب كل الناس قسمتها واحده؟ كان انتي فشلتي بنتك حتفشل برضو؟ باركيها.. انتي حتى ما سالتي الولد منو ولا ولد ناس منو.
