الكل بعد صرخة رحمة إتوترو وقامو على حليهم، رباب جرت عليها بهجمة وبصوت مفزوع قالت: بسم الله الرحمن الرحيم في شنو يا رحمه مالك قولي اتكلمي في شنو؟
رحمة بكت طوالي و قالت: الليله ووب علي من الجانا يا رباب يا أختي، ود محمد أخوك قالو غرق في البحر غطس ولي الان مالاقينو
نيڤين حيلا برد وقعدت في السرير وهي ماسكة قلبها وشيرين كمان حست نفس الاحساس ورباب تصرخ : لا إلا الله محمد رسول الله ود أخوي ياتو فيهم؟
رحمة قعدت في أقرب كرسي وبدت تولول : هيثممممم هيثم مااات هيثم قالو راح
رباب: هيثم البوديهو البحر شنو كيف الكلام ده شيراز : إنتي متأكده ياأمي؟
رحمة لسة في البتسوي فيه قالت : محمد اخوكي كلم ماريا وجرا مشا مع الأولاد يفتشوهو قالليها كلمي أمي
شيراز باكية : كرررر علي ياهيثم كر علي
وحاجة سكينة تحوقل متأثرة وبتحاول تهدي فيهم، قالت بعدها لشيراز: حسام راقد في البيت النقوم عليه أناديهو يوديكم ليهم
فعلاً قامت مشت نادتو وهم بقو يتجارو ،شيرين جرت جابت حاجاتا من جوة، شيراز اتصلت على زوجها بدري وكلمته بالخبر. أمها قالت ليها :إنتي لسه جرحك جديد، بعد نحنا نوصل هناك بتصل عليك اتكلمي معاهم وعزيهم.. ومشي حالك لحد بكره الصباح تجي ماريا هنا وانتي تعالي براك مع بدرالدين
بقو جاهزين ومنظريين حسام والحاجة يجو وهم لسه قاعدين بيبكو ما قادرين يسكتو.
رجعت الحاجه وكانت مغيره بتوب تاني ومعاها حسام الوقف عزاهم وقال ليهم يلا تفضلو
فطلعو كلهم وركبو في العربيه ودور بيهم فات..
وصلو البيت ولقو ليك الباب مفتوح على ضلفتينو الكبار ونسوان الحله مشتتين في الشارع والحوش والناس كلها بتصرخ وتبكي.. دخلو جوه وكان المشهد حافل، لقو ليك ناديه دي تدردق بالواطه وتقول ولدي جيبو لي ولدي.. ولدي الصبي الما فرحت بي جديدو جيبو لي وروني ليه..
وهدى غمرانه في الواطه ويرفعو فيها النسوان. وبقيت الخالات والعمات بيبكوا وحالتهم صعبه.. دخلو وحررو البكا زيادة وعملو الما بتعمل.. إلا رباب جرت على نادية وحاولت ترفعا وقالت ليها بصوت باكي : نادية قومي ما تفرجي عليك النسوان يشوفوك مكشفة كده اقعدي فوق في سريرك وأبكي ولدك قومي يلا.
الغريبة إنو نادية رضت بعد انتبهت وقامت على حيلا وصلحت التوب وقعدت في قلب السرير وواصلت بكاها ونحيبا..
هيثم ماطلع وفضلو الرجال جمب البحر للصباح، وفي البيت مافيهم زول غفل لحظة حتى، في ظل الظروف دي بقو ما في زول فاهم حاجة وبس قاعدين مترقبين. الموقف جد بيهز خصوصاً إنو هيثم ده معروف في كل الاسرة انه زول طيبان وزول في حاله ومحبوووب شديد..
