لما شافتو واقف في الممر قالت : أسعد؟
اتمالكت نفسها وقالت : شنو جابك هنا مالك بتفتش على شي؟
سكت ووقف مسافة بعاين ليها ، مااتكلمت ولفت قفلت باب الغرفة بي المفتاح وشالتو عشان تسلمو لي ناس الصالة.. لما لفت بي إتجاهو تاني اتنهد وقال : اشتقت ليك شديد، لي كم ماشفتك وجيت أسلم عليك
نيڤين مستنكرة : تسلم علي هنا؟ كنت وين من قبيل لي ماسلمت علي؟
قال: كنتي حتسلمي يعني؟ ما أكيد كنتي حتخافي من...... من خطيبك
حرقتو الكلمة وهو بنطقا ، عاينت ليهو وابتسمت وقالت : لاااا ياخ مافي شي بخوفني لانو سلامي عليك ماغلط ، إنت ود خالي ودي حقيقية مابيقدر غسان، ينكرا وبعدين هو عارف إنو انت الاتخليت عني وإني خلاص إعتبرتك من الماضي فحاسس بي الرضا والأمان، ثم الحاجة الفي النور قدام الناس مامنها خوف أو خجل فتاني لو لاقيتني في أي مجتمع و أي مناسبة سلم عادي وأنا بسلم عليك
إتنهدت بعدها بتعب وودعتو وقالت : خلينا نشوفك، يلا عن إذنك أنا متأخرة في ناس منتظريني
أسعد برضو اتنهد وقال بنبرة صوت واطية شديد: ماقادر أصدق انو بقينا اغراب كده وبنتكلم بي برود بعد كنااا...
قاطعتو وقالت : كنا، في الماضي ونحن في الحاضر حالياً.. عن إذنك يا أسعد لازم أمشي
ماقدرت تقيف تاني، خافت تضعف وتبكي ، عارفة ما بالساهل حتنساهو طول ماهو بظهر في وشها كده..
طلعت مشت من جمبو ولما وصلت آخر الممر وجاية تلف يمين تلقى غسان في وشها وكان جايي يشوفا.. اتفاجأت وقالت ليهو : هه بسم الله خلعتني
وقف مبتسم وجاي يتكلم كده لمح من فوق كتفا أسعد واقف بعيد وبعاين عليهم.. ملامحو طوالي اتغيرت ففهمت طوالي إنو شافو لكن ماعلقت بس قالت: يلا ماعايزين نتأخر على أمي يادوب لملمت حاجات شيرين الكانت هنا على السريع
حاول يتمالك أعصابو لأنو بعد تفكير سريع لقى إنو لو هاج وعصب حيفرح أسعد عشان كده عمل حركة تانية ومسك يدها رفعا لي خشمو وباسا وقال : تسلم يدك دايماً بتعاوني الكل
خلاها ليك تقح من الخلعة فضحك وقال،: يلا يلا نمشي
أسعد مالقى الفي نفسو وزفر بي زهج..
ساقا من يدها الابى يفكها وبقت ماشة جمبو بخجل فقال بمازحا :جربي احساس العروس وهي ماشة جمب عريسا
قالت بفخر : جرب إنت إحساس العريس وهو ماشي جمب ست العرايس
ضحك براحة وقال : حلوة منك حلوة
قالت براحة بتبرر وجود أسعد : غسان! ياريت ماتكون فهمت حاجة غلط من شوفة أس....
قال بسرعة : هششش ولا تقولي إسمو ده ولا سيرتو وتعكري علينا يومنا، ثم أنا واثق فيك وعارف إنو بكون جا وراك لي غرض في نفسو.. أنسي وخلينا حسي في حركة عروس وعريس دي عجبتني..
