نيڤين اتحمست للخبر شديد وقالت لي أبوها حيمشو يزوروهو هي وشيرين ان شاء الله، عادل كان رجع الإمارات وعرف الخبر وهو هناك وبلغو ليهم.. كل واحدة كلمت زولا واتفقو يمشو سوا مع بعض يشوفوهو ويطمنو عليهو...
العصر جا فقامو اتلبسو وقعدو منتظرين وطلبو من حبوبة هاجر تقعد مع رباب تتقلا لحد مايرجعو.. جو الشباب كل واحد سايق وقررو كل واحد يسوق زولتو معاهو فرصة خلط وكده كونهم طولو من اللقائات...
حسام قال لي شيرين بزعل : القسيمة العندي دي الا ابلها واشرب مويتا بعد ده
ضحكت وقالت بعدم فهم متعمد : لي مالا؟
قال بغيظ : قولي لي فايدتا شنو يعني مستفيد منها شنو؟ لابشوفك ولا بقدر حتى المسك بي يدي لمسة
إبتسمت أكبر إبتسامة وقالت : كلو في وقتو حلو يا بتاع فتون
حسام : وفتون مالا؟ أحسن منك اصلا مابتكسف راجلا ولا بتردو خايب
شيرين :كان احسن لي اركب مع غسان ونيڤين بدل تأنيب الضمير دا كل شوية
قال ليها بطريقة رومانسية وهو مركز في الطريق : حبي ليك لو ماشفع لي البشفع لي شنو تاني، على الأقل قدمي السبت عشان تلقي كللل أيام الأسبوع
قالت براحة : كيف اقدم السبت؟
قال وهو لسة مثبت عينو على الطريق : بوريك لكن عايزك ماتخرخري طيب؟...
أما نيڤين وغسان كانو صامتين أغلب الوقت لأنو زعلان من ما ركبو، في النهاية غلبو فقال : ما واضح ليك إني مضايق من حاجة؟
نيڤين : مضايق فعلاً؟ معليش أفكاري بعيد عند بكور ماخليت ليك بالي
قال بنبرة زهج: ممكن ماتقولي بكور دي تاني ؟لإنها بتزعجني
نيڤين : لييه؟ماهو اسمو كده
قال : لأ إسمو أبوبكر
قالت بلا مبالاة : كل الناس بنادوهو بكور بقت علي يعني؟ إسمو الأصلي مافي زول بقولو ليهو فهمت!
غسان : لا وكمان حسام بكل اريحية لمن طلبتي منو يسلفك سلك الشاحن قال ليك حاضرين يانوڤا
عاينت ليهو بي نظرة ما فاهماك فقال : لييه يقول ليك نوڤا من الأساس انتي إسمك نيڤين
قالت بزفرة نفس : ده المزعلك يعني؟
قال بجدية : أيوه طبعاً ولو انتي ماحاسة بي الغلط وين تبقى مشكلة، مامفروض راجل غيري ينطق إسمك ده ومامفروض تنادي راجل تاني بي اسم مصغر غيري
قالت بي إبتسامة : بس انت من عرفتك إسمك غسان يعني وبعدين انت لايق عليك إسمك كامل من غير تصغير
إبتسم طوالي وراحت الصرة الفي حواجبو بس قال : المهم راعي لي مشاعري وماتنادي زول غيري بي إسم مصغر
