نيڤين قعدت مع حبوبتا الصباحية كلها وكلمتا انها ماشة البيت تلاقي شيرين وبتجي تزورا تاني إن شاء الله وبعد تخلص إمتحانات بتجي تقعد معاها أسبوع كامل، بكده الحبوبة رضت، قامت لمت حاجاتا ولبست وودعت هاجر ومرقت فاتت،عدم التلفون ده خلاها منعزلة عن العالم فقررت تحنس أمها ترجع ليها تلفونا وقبل ده بتكلم شيرين تضرب ليها لي أسعد عشان اشتاقت ليهو شديد وقررت تعتذر ليهو حتى لو ماهي الغلطانة..
شيرين وصلت من بدري وقالت لي حسام وقت أخلص بتصل بيك واتبادلو الأرقام وكل الحاصل ده صب في مصلحة حسام، رقما عندو بقى وبقدر يلقى الف عزر عشان يتكلم معاها...ودعتو شيرين بسرعة وبعدت مهرولة ودخلت سريع للبيت وهو دور مشا طوالي.. طلعت فوق لي شقتهم وضربت الجرس،لحظات و فتحت رباب الباب، طوالي قالت ليها أمييييي واترمت في حضنها...
بعد السلامات وبل الشوق دخلت وقعدو في أقرب حتة..
رباب سألتا : كيفك يا شيري يا بتي وحشتيني والله وكيف شيراز؟ ان شاء الله تكوني مرتاحة هناك ومافي زول ضايقك
شيرين : والله الحمدلله بخير كلهم، لكن بت أختك دي مدلعة ساكت بس، وراقدة بس تنق في التلفون مع خالتو رحمة وشمارات الضيوف بالحتة ههههه، وخالتي ولا مرة قالت ليها اديني أسلم على شيرين ولا سألت مني.. أما أنا كويسة الحمد لله، إنتو كيفكم ونيڤين كيف؟ ليه مشت لي حبوبة وباتت هناك؟ عرفت حاجة؟
رباب اتنهدت وقالت: كويسين نحن نيڤين كويسه مافيها شي، أنا اقترحت عليها تمشي تغيير شوية مع حبوبتا عشان إنتي مافي وكده
شيرين بأسف : أمي لازم ننهي الموضوع ده حالاً.. نيڤين كلمتها تجي فهي حتوصل بعد شوية أقصى شي ساعة
رباب: والله حاير بي الدليل ياشيري اقول ليها شنو؟
شيرين : خليها لي أنا ياأمي، بعدين نحن مهولين الموضوع لييه، أسعد ماكان خطيبا يعني والكان مجرد كلام لا بودي لا بجيب حتزعل شوية وتنسى
رباب : أمس نادية جات هنا هاااايجة قايلة نفسها بتخوفني
وحكت ليها رباب كل شيء حصل وكل اللي اتقال منهم الاتنين.
شيرين : فظيعه خالتو ناديه دي والله.. واحده زي دي دايرها تكون نسيبة لي بتك ؟ والله لو أسعد ده ود الباشا عديل ما بعرس ليه بتي.
رباب : كدي قومي ظبطي لينا قهوتك البتعدل الراس وتعالي
شيرين مبتسمة : عيووووني لي ربابة أحلى قهوة فيك يابلد
قامت على المطبخ وهي مبتسمة، مافي احلى من دفا البيت، كانت مامرتاحة في بيت شيراز نهائي بس الجبر..
وصلت نيڤين بعد فترة، دخلت لقتهم خاتين القهوة وبتونسوو، جرت على شيرين واتحاضنو مسافة
رباب : بعتيني من شفتي شيرين يعني؟
فكت اختها وحضنت أمها وقالت : لي كم يوم ماشفتها لكن إنتي في القلب ياربابة الأولى بلا منازع
