نيڤين اتحول همها من التفكير في أسعد للتفكير في غسان ومانامت لي قريب الفجر.. صوتو في آخر المكالمة ماببشر بالخير، يبدو إنها زكرتو بحاجة مؤلمة بغباء منها، بس دقيقة! معقول كان متزوج؟ بس ماباين عليهو.. ويعني المتزوج عندو علامة يعرفو بيها مثلاً؟ كان متزوج! يعني انتهى يعني انفصل عن مرتو صاح؟ طلقا! كلمة الطلاق دي بتكتم نفسا شديد.. قررت إنو نهائي ماتفتح الموضوع ده تاني ولو هو قال حاجة ومااظن يقول حتوقفو..
من بعد اليوم ده غسان تاني لا ضرب ولا رسل رسالة فلقت انو كده أحسن وانشغلت تاني في روحا والكسر والغيار على الجرح وكده.. شيرين سألتا عن سر الونسة مع غسان المستمرة
نيڤين قالت : مافي سر ولا شي بس من بعد مااشتغلت معاهو الفترة الفاتت دي بقينا نتكلم مرات خصوصاً في موضوع الاستراحة والزيارات وكده
شيرين بطريقة تحقيقات : طيب ويوم داك بالليل ؟ أعتقد الوقت متأخر كان على الكلام في الحاجات دي
نيڤين : عايزة توصلي لي شنو؟ مافي شي من الفي بالك صدقيني، غسان زول محترم شديد اكتر مما تتصوري، تعاملو راقي مع الناس والكلام معاهو ممتع، زايد إني خلاص قفلت باب الريد والونسة الدقاق..
شيرين ضاحكة : طيب زول بالمواصفات الخنفشارية دي بتساب سااااي كده ؟
نيڤين : يمكن مرتبط؟ أنا ماعارفة والله جوانب حياتو شنو، إنتي ماليك دعوة بي خليك في حسوووم
شيرين : مافي حسام بعد اليوم
نيڤين : لييه؟
شيرين : شيراز فعلاً صارحتو إنو يخطب هدى بت خالو محمد، هو كلمني وأنا قلت ليهو إختيارها موفق فشاكلني وقال لي انتي قايلاني زول مادي وشنو وشنو وزعل شديد وبعدها مااتكلمنا تاني
نيڤين : انتي جد متخلفه، زول زي حسام ده بتخلا؟ ود ناس وزول مجتهد وشغال وزول حارة وعايزك شديد تقولي مادايراهو عشان خايفة ليك من وهم؟
شيرين حست بلغطا وقالت ليها : اظني فقدتو خلاص بعد كده، يستاهل الأحسن مني
نيڤين مغيوظة منها شديد فقالت : هس عليك الله ماتوجعيني على الوجع العلي، اطمني حيجيك لأنو بحبك مع انك فعلاً ماتستاهلي
شيرين ضاحكة : الله نجدك مني بي رقدتك دي
نيڤين اتجاهلتا وقالت : إنتي أمي وين، شايفاها رجعت العلاقات مع حبوبة ومتزاملين طول النهار
شيرين إبتسمت وقالت : أمي مابتشيل في قلبها ضد زول، حسييي لو ابوي زاتو اعتزر ليها ساي بتقول ليهو العفو والعافية وتدعي ليهو بالراحة والسعادة
نيڤين : نفسي اكون زيها كده عشان الله يكرمني في حياتي..
شيرين : بقوم بشوفهم بسوو في شنو..
