قالت ليهو : خلاص رايك شنو ارسل ليك رقم نيڤين تتصل عليها بنفسك وتطمن
ما فكر في كده بس لي لأ, يطمئن عليها ده احسن عذر
قال: اذا ما بسبب ليها إزعاج رسليهو لي.
قالت : نيڤين مابتنوم مالم ترسم شوية أصلها بتحب الرسم مشروع رسامة،
غسان : خلاص تمام ، شاكر لتفهمك
شيرين : شكراً ليك انت للمرة الاخيرة ياود العم
اتوادعو ورسلت ليهو رقم نيڤين بعد دقيقتين بالضبط،
حفظو عندو وخت التلفون ، بقى يتململ والافكار حاوطتو : ياربي اضرب حسي؟ اخخخخخ انت قصتك شنو ماترسى ليك على بر عايز ولا ماعايز ماتعمل ليك موضوع وونسة وسؤالات وانت ماعارف راسك من رجليك، اووووف وبعدييين.... الله يسامحك ياأمي زنك في راسي خلاني اتقريف للموضوع..
قرر يتصل كم جرس واذا ماردت يقفل ويكون عمل العليو وحاول مايسترسل لحد مايقرر هو عايز شنو بالضبط...
نيڤين وقتها كانت صاحية فعلاً بس مابترسم لأنها قررت ترسل لي بكور، ماظريفة بعد كل المكالمات اللقتا ماترجع تسأل عنو.. فكرت هل ترسل الرساله ولا تتصل عديل فقالت لا احسن رساله وفتحت الواتساب وبعتت الرسالة.. بكور في اللحظات ديكي كان فاتح لايف تيك توك بي تلفون تاني فلما شاف اشعار رسالة عاين للتلفون لقى اسم نيڤين ماصدق وقال للناس الداخلة : وشكم حلو علي استلمت رسالة من زولة عزيزة علي كانت غايبة، حا أقفل اللايف عشرة دقايق بس وارجع تاني خليكم قراب..
تلفونها رن مسافة شافتو لقتو بكور فردت عليهو ،طوالي خش شمال وقال : ياخي حلم ولا علم؟ نيڤين ردت أخيراً
قالت : إزيك يا بكور كيفك الأخبار شنو
بكور: والله تمام الحمد لله الا اختفاءك ده حيرنا
نيڤين : أمي كانت شايله تلفوني الفتره الفاتت بس رجعتو لي بعد تحنيسات مطوله.
بكور : فرقتي معاي يا زولتي مع انو معرفتنا ماطولت أيام معدودة.. كدي أسمعيني عندك تيك توك؟
نيڤين : عندي لكن ما قاعده استخدمه
بكور بحماس :رسلي لي الرابط بتاعك علشان اتابعك وأعمل ليكي دعوه للآيف بتاعي..
نيڤين : بتفتح لايفات!
بكور : يا زوله عندي متابعين كتاااار شديد
نيڤين : واااو تماام والله أيامك ،لكن مابقدر أساهر ممتحنة ولازم ازاكر أفضل لي
بكور: خسارة لكن معوضة لو فتحت بالنهار او وقت بدري خشي نتونس عليك الله
نيڤين : ظابط
بكور : صوتك ماتمام مالك كنتي نايمة؟
نيڤين مشتو وقالت: آي نايمة من قبييل كنت، يادوب عايزة ازاكر لي حاجة تنفعني؟
