قرا الرسالة مرات ومرات وهو محتار، ده منو الرسل كلام زي ده وأصلاً ما في زول عارف الموضوع ده غيرو هو و امو واخواتو، حتى العروس نفسها ما عارفه.. ما اهتم لكلام الرسالة قدر ما اهتم لي إنو منو ممكن يكون عارف الموضوع ده وبيرسل ليو في رقمو.. واتصل على الرقم مع انه كان حاسس انه ما حيلقى رد لانو ده شخص واضح انه عايز يهدد لكن ما عايز يتكلم ،بدليل انو قال كلامو في رسالة.. جرب يرد الرساله وقال( أين كان صاحب الرسالة دي فأحب أقول ليك انت تعبان ساي والسواي ما حداث) رسلا بس ما في زول استلم فقال ما مشكلة أكيد حيستلما لإنو حيشوف إذا مفعول الرسالة جاب نتيجة ولا لأ .. مشى سأل أمو إذا هم قالو الموضوع ده لأي زول خارج الأسره أو حتى من جوا الأسره المهم زول عندو الرقم .. وراها الكلام اللي اتكتب في الرسالة و استغربت وقالت ليهو: ده شيء عجيب منو ممكن يكتب ليك كلام زي ده وليه أصلاً يكتب كلام زي ده ويقول ليك تعال قابلني حاجة غريبة والله..
قال ليها : الشي البحير كمان إنو عارف يا دوب أنا ساعي يعني عارف إنو الموضوع لسه جديد وما تم وبهددني انو ماحيتم
قالت ليهو : كدي شيل الصبر خليني اتكلم مع أخواتك واسألهم لو كلمو أي زول خارج نطاق بيتنا ولا يكون من جهة ناس هاجر بس ما أظن لأنو أصلاً هم ما دايرين ينشرو الموضوع دارين كل شي يكون في طي الكتمان حالياً فأكيد ده زول عارفنا وعارفك انت تحديداً .. لكن ولا يهمك ما تفكر في الموضوع من أساسو
قال ليها :أنا كل الحكاية ما عايز تحصل مشاكل من جهتي للناس ديل إنتي عارفه في ناس بيحبو الضر والاذية
قالت بطمنو :ولا يهمك يا حبيبي كل شي مسطر ومكتوب والفي يدك ما بجي في يد غيرك..
أطمئن شويه لي كلاما وقام مشى لي شغلو وحاول ينسى كل الحصل وفعلاً انشغل طول اليوم ونسى الموضوع تماما بس في اثناء اليوم جاتو رساله تانيه من نفس الرقم رداً على كلامو الرسلو بتقول( حرام بت الناس تعرس واحد زيك معقد ومنفسن فأنا حأخرب ليك كل شي)
قرا الرساله كتير، كان متأكد إنو سمع التشبيه ده قبل اليوم، وبس طقت ليهو في راسو طليقتو مرام.. نفسسسس التشبيه ده كانو بيقولو عنو هي وحبيبا.. بس لو دي هي كيف عرفت عنو الكلام ده الا اذا كانت بتتقصى أخبارو! قرر يتأكد إذا كانت هي ولا لا واتصل على أمو بسرعة وسألا: يا أمي كيف قيلتي ان شاء الله كلو تمام
سلمت وقالت ليهو : الحمد لله والله تمام انت كيف؟
غسان : وانا كمان كويس الحمد لله أمي بس عايز أسألك هل سألتي لي البنات فريال وفرحة من الكلام القبيل اتكلمنا فيهو؟
قالت ليهو : سألتهم أيوه لكن بعد تجي بحكي ليك الحاصل
قال: طيب انا حسي جاي طوالي..
فعلا قام طوالي وقفل المكتب واستأذن من القاعدين معاهو في المكتب وقال ليهم كملو إنتو وأنا عندي مشوار ضروري ماشي ليهو.. طيران مشى على البيت وأول مادخل لقى أمو في الهول بتاعا راقدة ومريحة، سلم عليها وقعد منتظر ترضي فضولو، قال ليها :جاتني رساله تانية مكتوب فيها إنو أنا زول معقد ومفروض ما اعرس بت الناس
