رباب بعد ما رجعت ما لاحظت انه نيڤين متغيرة، كانت في همها وما لاحظت ليها لكن جاتا و قالت ليها : نوڤا إنتي طولتي من حبوبتك.. حقو تمشي ليهم وتبيتي عندها غيري جو وقيلي وتعالي بكره بالليل ان شاء الله.
نيڤين حبت الاقتراح وقالت: يعني ما عندك مانع لو مشيت؟
رباب: مش أنا اللي اقترحت عليكي كيف عندي مانع يبقى.
نيڤين لقتها فرصه تهرب عشان تفكر برواقه هل تستجيب لي طلب خالا محمد ولا ترفض وما تبيع حبها لي أسعد.. هل عرسها حيريح أمها ويخفف الحمل عنها فعلاً ؟..
فوق لي ده كلو كان في سؤال بدور في راسا لييه أمها ماكلمتا بي العريس ده لحد الآن ؟يكون محمد فاتحها هي أول قبل أمها تعرف؟..
المهم قبل ما يجي المغرب كانت لمت شنطة صغيرة وأمها ركبتا وفاتت طوالي بيت حبوبتا..
رباب كانت حاسه انه حيحصل شيء كعب فكان لازم تبعد نيڤين من البيت.. علشان ما تتصدم قبل ما هي توريها كل شيء وفعلاً كان توقعا صح لأنو ناديه جات هااااايجه وضربت الباب بي غضب وهي بتقول افتحي ياربااااب..
لما رباب فتحت الباب قالت ليها: ناديه؟ اتفضلي خشي خير
نادية دخلت وقفت في الصالة وصرخت بي طول حسها وقالت: أنا ما جايه اتفضل جايه أعرفك حاجه واحدة بسسس... لو قايله إنك بتحرشي ولدي علي فانت غلطاااانه...... ده ولديييي ولد بطني وبسمع كلامي أنا في الأخير . و أنا أخترت ليهو أمل بت نعيمه أختييي فبطلي تجري وراهو إنتي وتلزي ليهو بتك..
رباب لاول مرة في حياتا تفقد اعصابا وردت عليها و بنفس الصوت العالي: هييييي ياناديه أول شي ولدك وعندك وخطبتي ليه.. جاية لي أنا لي شنو تاني؟ ثم ثانياً ولدك هو الطلب بتي مني قبل اليوم لكن أنا ما اتخطيتكم وقلت حتجو تطلبوها رسمي لكن أنا زااااتي غبية ما عرفت إنو خطبتو ليهو... وعشان يقنع من بتي دايرين تدبسوها في عرسة قاطعنها من راسكم؟ وكمان دايريني اجدعا في السعودية عشان ولدك مايسكها؟ انتي وقت ما مالية يدك منو خاطبة ليهو لييه ؟ شفتي يا ناديه أسمعيني كوييييس أنا بقبل اي شيء منكم إلا في بناتي نيڤين وشيرين كمان... البزعل بناتي بزعلو ومابخت ليهو ايييي اعتبار فأمسكي إنتي ولدك عليك وأنا اصلاً بتي عندي وكلو أرضاً تشرب نداها. وصلت؟
ناديه سكتت لأنها اتفاجأت من صوت رباب العالي العمرها ماطلعتو في زول قبل كده.. صلحت توبا وبنبرة صوت اوطي من الأول قالت: حزرتك يارباب أبعدو من أسعد..
ومرقت بي دربا فاتت وهي بتغلي من الزعل والهجمة...
بعد فاتت رباب قفلت الباب وقعدت تتنفس بصعوبة وتاني بكت، بكت بكت كتير، لمتين حتسمح ليهم ينكدو عليها وعلى بناتا لمتين حيكونو مكسورين الجناح وما بيقدرو يدافعو عن نفسهم.. قررت تبقى قويه علشان مصلحة بناتا، حتقيف ضد اي زول يجي عليهم ويحاول يكسر قلبهم ويزعلهم, من الليله في رباب جديده.. ____
