مشت الأيام والبنات شويه اتحسنو ، بقت رباب ما قادره تقعد وطلبت من هاجر انها ترجع بيتا هي وبناتا، بالرغم من انه عادل رجع الإمارات من اكتر من شهر ولكنها ما كانت قادره تقعد في بيت نسابتا السابقيين أكتر من كده..هاجر ما حبت تضغط عليها اكتر لانه الفتره الفاتت كانت كل شي طلبتو منها نفذته ليها فقررت إنو تخليها على راحتا،بكده رجعو بيتهم بالسلامة فرحانيين..
شيرين رجعت جامعتا ونيڤين فضلت في البيت زهجانة رغم انها بترسم عادي لأنو كسرها في ناحية الشمال ويدها اليمين سليمة.. ومرات بتدخل مع بكور لايف تتونس وكمان علما تفعل حسابا كيف وتنشر رسوماتا وتعمل محتوى وتشغل نفسها.. غسان بقى يتصل عليها بشكل مكرر لدرجة بقت حاسة بعدم الارتياح، التعود صعب وهي ماعايزة تتعود تاني على شي حيتفقد مع الأيام، بكور كان بالنسبة ليها مختلف عن غسان لأنها بتحس غسان بقى كلامو يحيد عن المعتاد وبقى في كلام خاص وسؤال عن علاقتا القديمة ومافاهمة هو عايز يوصل لي شنو وفي مرة قرر يحكي عن زواجو وأسباب الفشل والطلاق بالرغم من إنها منعتو بس برضو حكى ليها.. واستو طبعاً بس ماكانت مبسوطة بالسمعتو.. غسان لمس فيها الحتة دي إنها ماعايزة تخوض في موضوع العلاقات والكلام في الماضي وماحابة اصلاً اي كلام غير مواضيعهم الزمان والعمل الطوعي والرسم وبس كده.. وكل مايقرر يوقف كلام ويسيبا بس تاااني يرجع يتصل باي حجة ويتونس معاها.. ماعارف هل يفاتحا ولا يخلي الموضوع يتم عبر أمو.. خايف شديد من رفضها لأنو اتعلق بيها وهي ما رامية لي بعيد وما مدياهو اي ضو أخضر.. في مرة سألا عديل وقال:في رايك الإنسان المُطلَق من حقو يتزوج تاني؟
قالت ليهو اجابة غريبة مااتوقعا : المطلق ايوه من حقو يتزوج تاني أكيد.. بس ده لو كان راجل، الراجل من حقو يطلق ومن حقو يرمي ومن حقو يهين ومن حقو يعمل اي شي.. لأنو في حكم المجتمع راجل مافي شي بعيبو.... بس المرا لو مطلقة! في حكم المجتمع ناقصه وهي مفروض تترمي، خصوصا لو معاها أولاد.. في حكم المجتمع يا ريت لو تموت، تموت هي واولادا ويرتاحو من همها هي واولادا.. في حكم المجتمع شحاده في حكم المجتمع ناقصه وما عندها اخلاق وما بتعرف تربي.. اطمن ياغسان انت من حقك تعرس والف من تتمناك
غسان بعتاب: بس انا ماكده، أنا ما قاسي للدرجة دي أنا كان لي أسبابي ووريتك ليها
قالت : لااااا انا كلامي عام مااتهمتك بي شي، وحتى لو كنت ظالم برضو بتلقى البتعرسك انت راجل، فاهمني؟
قام سألا بصريح العبارة : طيب إنتي ممكن تقبلي زول في نفس ظرفي كده؟ يعني ممكن تقبليني؟
سكتت شوية وقالت : أنا أصلاً مابصلح للزواج، الزواج على مااسمع كده محتاج طولة بال وشيل مسؤولية وأنا مابقدر أتحمل بنهار من أول نقاش عشان كده ماتسأل اذا بوافق بي زول مطلق ولا لأ لأني لا خالي لا كان مرتبط مابتوافق معاهم ههههه
