قالت بعد ما حست في شي غلط ( إنت منوو؟؟؟)..
ماجاها رد فقالت تاني ( غسان إنسان محترم مابقول كلامات زي دي حقت مراهقين، العب غيرا مين ماكنت)
حست إنو ده ممكن يكون أسعد لإنو كل شوية يسألا من غسان صفتو شنو
جاتا رسالة بتقول ( شكراً لكلامك ده عني، صراحة كنت عايز اختبرك لأنو البنات اغلبهم ما ليهم آمان)
ابتسمت بسخرية ورسلت ( اهااا تمام تمام مامشكلة، طيب عايزة اقول ليك قربت أخلص الإختبار ممكن بس لو ترسل لي زيادة تفاصيل تساعدني؟)
غسان( ياتو مادة طيب)
ضحكت مسااافة ورسلت ( إنت أسعد صاح؟ أحب افهمك حاجة بس، إنت كشفت نفسك لأنو أنا فعلاً مافي رسايل وونسات بيني وبين غسان عشان يقول لي كلام بالشكل ده إطمن)
بعد رسالتا بشوية جاها إتصال من نفس الرقم فردت طوالي، جاها صوت أسعد بقول ليها : طلعتي زكية يعني ومابتتغشي
نيڤين : شوف أنا حاقول ليك حقيقية غسان عشان أريح راسي ماعشان ترتاح انت، غسان أبوهو بكون ود عم أبوي وعرفناهو يوم عقد السيد الوالد وتاني مرة نتلاقى كان يوم وصلني لأنو إتلاقينا صدفة في شارع المدرسة بعد ماشفتك انت أول، لقاني تعبانة لأنو لحظتا جاني هبوط حاد وماقدر يخليني براي فعرض يوصلني شهامة منو وأصر لأنو خاف إني أقع في الشارع.. بس دي كل الحكاية، ياريت تخلي عندك إحساس وتنسى حاجة إسمها نيڤين وتركز في عرسك من بت خالتك الغالية..
أسعد خلاص إستسلم بعدها، كان محتاج إنو يغلطا في حقو عشان يبقو متعادلين وماينهشو الشعور بالذنب تجاها.. بعد اليوم مافي رجعة فعلاً بعد كل الأهل عرفو بي خطوبتو..
أما هي قفلت الخط وحظرت الرقم ده وحظرت رقمو الأصلي.. مالو بقى غريب كده ؟ ياهو ده أسعد نفسو البتعرفو عمرها كلو ؟ ولا عشان كانت شايفاهو بعين المحبة فما شايفة عيوبو؟ خلاص أصلا مابنفع تفكيرا ده فيهو لأنو ماحيوصلا لي مكان.. تلفونا ضرب تاني لقتو ده بكور ،الله ياخ نستو تماماً، ردت وقالت : معليييش يابكور جاني تلفون قطع على البث
بكور : طوالي إنتي كده أعذارك جاهزة، كلو ده تلفون؟
نيڤين : في الحقيقة تلفونين، فجأة بقيت مهمة للناس كلها
بكور : مامشكلة يازولة ولا يهمك، اسمعيني! أنا عايز اشوفك ياخ معقول بس ونسة تلفونات كده وخلاص؟
قالت : مابقدر يابكور ، عندي قراية ومابقدر اطلع برا البيت غير للمدرسة
بكور : ماتبقي خوافة يااخ، مابنمشي مكان بعيد
قرررربت ترضخ لكن قالت ليهو : مابقدر آسفة والله
بكور : انتي قولي ماعايزة تلاقيني بس، لو حابة كده كان لقيتي مليون عذر
