نيڤين قعدت مع عمتا تتونس وكلمتا انو أبوها ضرب تاني ورسل مبلغ كويس عشان أيام رقاد المستشفى.. أسعد كان بفتش على فرصة تاني توقفو معاها ،إتزكر إنو كان الكتف الحنين ليها في كل موقف بس حسي الكتوف كترو وبقى ما ذو أهمية ولا بقى أول من يشكو ليهو الهموم.. دفع مبلغ في حسابات المستشفى برضو وأبوهو عرف ومارضى منو وقال ليهو إنت بالذات تبعد عن عمتك ومرض عمتك وبنات عمتك
أسعد: يا أبوي عمتي محتاجانا كلنا نقيف ولا البقيف منو غيرنا هي عندها زول غيرنا؟ هي ولد ماعندها
محمد: أنا عارف قصدك كوييس ويبدو إنك لسة خاتي بتها في راسك
أسعد قال ليهو: أي خاتيها يا أبوي وأنا بي صراحه كدا ياابوي ناوي اتزوجا خصوصاً في الظروف دي لأنو ماليها غيري زول يقيف ليهم وأول ما اتزوجا حاصرف على علاج عمتي واديها البتستحقو لأنو أنا راجل بتها وما اظن عمتي حترفض لأنها ما حتلاقي أحسن من ود أخوها يعرس بتها ولا رايك شنو؟
قال ليهو: البت ابوها قاعد تفتكرو هيرضى بيك وانت في رقبتك مرا ولا مرتك اصلا حترضى تقعد في ذمتك تاني
أسعد : أبوها ما عندو فيها حق لأنو ما رباها في يوم من الأيام وربتا عمتي واتكفلت بيها طول عمرها
محمد: الشرع والقانون ما بيعرفو ليك رباها ولا ما رباها لانو طالما هو موجود فهو وكيلا والمسؤول عنها
أسعد : يا أبوي انت قول بس ماموافق وخلاص ماتحاول تخت لي عراقيل
محمد: انت يا ولد ما فاهم حاجة وما عارف حاجة والحياة دي ماعركتك لسة، التعامل بالعواطف في الحياه بخسرك الكتير وعمتك اللي انت بتحبها دي وعايز تقيف ليها ما حتقابلك في يوم من الأيام بي حفظ الجميل وحتشوف منها سواد الليل ما تخسر مرتك ووضعك عشان شوية مشاعر بتجي وتروح
أسعد : وضعي يابوي أنا السويتو ما مرتي أنا ساهرتا ليالي عشان الورشه دي تقيف على حيلا ما مرتي ولو فاكرين إني في يوم من الأيام حاشيل قروشا عشان احسن وضعي زي ما انت سويت مع أمي زمان هي وأبوها تبقى غلطان يا أبوي
محمد بغضب : لو ماكنا قدام العالم والناس كان قتلتك ورويت بي دمك الواطة يبدو اني ماربيتك، اصلا تربية النسوان مافوقا عمار
قام محمد وقال : اخير اقوم اشوف الوراي بدل احرق دمي في ولد عاق كايس رضا النسوان
أسعد مصر على كلامو و نتيجه الكلام ده اداهو حماس فقام ومشى نادى على نيڤين وقال ليها :دايرك دقيقه في موضوع مهم
نيڤين قامت ليهو وكانت اصلاً ما طايقه تتكلم معاهو لأنو مصر كل شويه والتانيه يفكرا بالذي مضى وهي حالياً ما فاضيه ليهو ولا لي زكرياتو.. وقف قصادا وقال ليها بنظرة كلها شجن: عندي ليكي عرض أرجو إنك تسمعيو وتعقليو كويس لأنو الحا أقولو ده كلو في مصلحتك حيكون إنتي وعمتي
