قال بسرعة : نيڤين ؟ نيڤين بتبكي إنتي؟
اتخلعت من صوتو وزحت التلفون وعاينت في الشاشه لقت رقمو الما مسجل فحست بحرج شديييييد وهو لسة بقول : مالك بتبكي حصل شنو تاني
مسكت نفسها شوية وردت بصوت باكي ماقدرت تخبيهو : غسان؟ مافي شي مافي شي آسفة اتصلت بالغلط
غسان بسرعة : انتظري ماتقفلي دقيقة
نيڤين بأسف: ماكان قصدي أزعجك كنت حااتصل على شيرين أختي معليش ماقصدي
غسان بصوت واطي: كدي أهدي شوية وحاولي اتنفسي براحة براحة
سكتت وهي بتحاول تقش دموعا فهو استغل اللحظة دي وقال : نيڤين! اسمعيني ، كل البقدر اقولو ليك حالياً مافي شي بستحق دموعك دي، ماتبكي بترجاك
نيڤين بصوت حنين وصغير : طيب
غسان : ماتقفلي، العايزة تسمعيهو من شيرين بقدر اقولو ليك أنا،بس لو أعرف مالك
كان مستغرب من نفسو لأنه أول مرة يكون لحوح كده، يمكن حب الاستطلاع يمكن حابب يكون الفارس المغوار المنقذ على قول شيرين المهم ماحابب يقفل الخط..
نيڤين قالت ليهو بعد فكرت في كذبة : الليلة فقدت زول عزيز وغالي
لقت انها مابتكذب هي فعلاً فقدت أسعد خلاص
غسان مستفسر: زول اتوفى يعني؟
نيڤين : أيوة ،مات للأبد
غسان بقى يحاول يصبر فيها بكلمات العزاء على أمل تسكت وماتبكي تاني..
سكتت شوية وقالت : بالجد خجلانة منك كل مرة بخلعك معاي
غسان : لاااا عادي على الأقل المرة دي قدرت اهديك مازي اخر مرة كنتي ماطايقاني ورفضتي تسكتي
ضحكت براحة وقالت: معليش
قال ليها: دي المرة الكم تقولي فيها آسفة ومعليش وتعتذري؟ ثم إنو معليش بقولوها للطفل الصغير وانا زول كبير.. أسمعيني خليك مني حسي إنتي في المدرسة؟
نيڤين :لا في البيت
غسان ضاحك : متسيبة يعني
نيڤين : زهجت من القراية والحصص
قال مستفسر: بالمناسبة شيرين قالت لي إنك رسامة صاح الكلام ده؟
اتغاظت من شيرين القوالة وقالت : هاوية بس بعرف أرسم يعني بس مانشرت رسوماتي في أي مكان
غسان : خلاص أنا عندي ليكي إختبار لو مريتي فيهو وقتها عندي ليك مشروع
قالت بفرح ناسية معاهو الحصل قبل شوية وكمان ناسية زهجا من لصقة غسان : مشروع رسم؟ جد؟ أكيد حا أمر في الإختبار ان شاء الله
ضحك وقال : اشتغل الحماس ههههه طيب مش تعرفي الإختبار أول؟ مش جايز يغلبك؟
نيڤين : انا في الرسم مابعرف حتى أبوي وأمي، واثقة بقدر أمر ان شاء الله
